كوكتەم اۋەندەرى كوڭىل كوتەرەدى

اتاپ ايتساق, 5 جانە 9 ناۋرىز ساعات 19.00-دە «Piccolo» كامە­را­لىق تەاترى جوباسى اياسىن­دا تىڭدارمان نازارىنا دج.ءروسسينيدىڭ «جىبەك ساتى» وپەرا-فارسى ۇسىنىلادى. باس كەيىپكەر دجۋليانىڭ بەينەسىندە ءبىرىنشى كۇنى قازاقستاننىڭ ەڭبەك سىڭىرگەن قايراتكەرى سالتانات احمە­توۆا ونەر كورسەتسە, ەكىنشى كۇنى وسى پارتيادا اسەم سەمبينا دەبيۋت جاسايدى. دورۆيل – قازاقستاننىڭ ەڭ­بەك سىڭىرگەن قايراتكەرى جان تا­پين, دجەرمانو – قازاقستاننىڭ ەڭ­بەك سىڭىرگەن قايراتكەرى ازامات جىلتىر­كوزوۆ, بلانزاك – ەۆگەني چاي­نيكوۆ جانە تاعى دا باسقا تالانتتى ارتىستەر ىزدەنىسى كورەرمە­نىنە كوتەرىڭكى كوڭىل كۇي سىي­لاي­­دى دەپ كۇتىلۋدە. «استانا وپە­را» كامەرالىق وركەسترى ديري­جەر رۋسلان ءبايمۋرزيننىڭ جەتەك­شى­لىگى­مەن ونەر كورسەتەدى.

ال 10 ناۋرىز كۇنى تەاتردىڭ ءمار­مار زالىندا «باروككو قۇدىرەتى» كونتسەرتى وتەدى. كورەرمەندەر قا­زاق­­ستاننىڭ ەڭبەك سىڭىرگەن قاي­رات­ك­ەرى ابزال ءمۇحيتديننىڭ جە­تەك­­شىلىگىندەگى «استانا وپە­را» كا­مەرالىق وركەسترىنىڭ سۇيە­مەل­­دەۋىمەن تەاتردىڭ جەتەكشى ءسو­ليسى, باشقۇرتستاننىڭ ەڭ­بەك سى­ڭىر­­گەن ءارتىسى, سوپرانو ال­فيا كا­ريموۆامەن بىرگە اسقاق باروك­كو­نىڭ ارعى داۋىرىنە مۋزىكالىق سايا­حات جاسايدى. حاس شەبەر ارتىس­تەردىڭ وزىندىك ينتەرپرەتاتسياسىن­دا گ.ف.گەندەلدىڭ «مەسسيا» كان­­تاتاسىنان اريا, «الميرا» وپە­­راسىنان الميرانىڭ اريا­سى, «التسينا» وپەراسىنان مور­گانانىڭ اريا­سى, «عاجايىپ قۇ­دايىنان الىستا» كان­تاتاسىنان «تول­قىنى قاتتى تەڭىزدەگى كەمە» ارياسى شىرقالادى. سونداي-اق, كەش باعدارلاماسىنا ي.س.باحتىڭ «ماگنيفيكات» شىعارماسىنان اريا, ا.ءۆيۆالديدىڭ «بايازەت» وپەراسىنان يرەنانىڭ ارياسى مەن «گريزەلدا» وپەراسىنان كونستانتسانىڭ ارياسى ەندى.

14 ناۋرىزدا «FORTE-TRIO شا­قى­رادى» توپتاماسىنان كامە­رالىق مۋزىكا كەشى وتەدى. قازاقستان رەسپۋبليكاسىنىڭ FORTE-TRIO مەملەكەتتىك تريوسىنىڭ مۋزىكانت­تارى ليۋدۆيگ ۆان بەتحوۆەننىڭ وسى جانرداعى ەڭ تانىمال شىعارما­لا­رىنىڭ ءبىرى بولىپ تابىلاتىن فورتە­پيانوعا ارنالعان تريوسىن ورىندايدى. حIح عاسىردىڭ ەكىنشى جارتىسىنداعى فران­تسۋز كومپوزيتورى ە.شوسسوننىڭ فورتەپيانوعا ار­نالعان تريوسى قۇشتار­لىققا تولى سەزىم سىرىن شەرتۋدەن باس­تاپ ءۇمىت ۇزىلگەن قايعىلى ساتتەرگە دەيىنگى ادام كۇيزەلىسىنىڭ كەڭ اۋقى­مىن پاش ەتەدى.

سونىمەن قاتار 19 جانە 20 ناۋ­رىز كۇندەرى  گ.دونيتسەتتيدىڭ «دون پاسكۋالە» كومەديالىق وپەراسى كورەر­مەنىن قۋانتادى. ەڭ تانىمال يتاليالىق وپەرا­لاردىڭ ءبىرىنىڭ قويىلىمى «Piccolo» كامە­رالىق تەاترى جوباسى اياسىندا ىسكە اسىرىلدى. گ.دونيتسەتتيدىڭ مۋزىكالىق جاۋھارىندا بارلىعى – ىستىق ماحاببات تا, جاساندىلىق تا, قاتاڭ ويىن مەن ورىندى قىلىق تا, ءتۇرلى كيىم اۋىستىرىلاتىن كۇلكىلى جا­عدايلار دا, كوڭىل قالۋ مەن اش­كەرەلەۋ دە بار. كومەديالىق قويىلىمدا باستى كەيىپكەر نورينا ءرولىن «قۇرمەت» وردەنىنىڭ كاۆالەرى ايزادا قاپونوۆا مەن قازاقستاننىڭ ەڭبەك سىڭىرگەن قايراتكەرى سالتانات احمەتوۆا سومدايدى. 

تەاتر ۇجىمىنىڭ ۇلىستىڭ ۇلى كۇنى ءاز ناۋرىزعا ارناپ ۇسىناتىن تا­ما­شا تارتۋى – «قوش كەلدىڭ, ناۋ­رىز!» مەرەكەلىك كونتسەرتى. 22 ناۋرىز­دا ەلوردالىق تەاتردىڭ وپە­را سوليستەرى مەن وركەستر ارتىس­تەرى تا­بي­عاتتىڭ كوكتەمگى جاڭا­رۋى, قاي­تا تۇ­لەۋى مەن دوستىق مەرەكە­سى­نە ارنالعان تا­ماشا ونەر باع­دار­­لاماسىن كورەرمەن نازارىنا ۇسىنادى. مازمۇندى كەشتە وتان­دىق كومپوزيتورلاردىڭ اريالارى, اندەرى, رومانستارى, اسپاپتارعا ارنالعان شىعارمالارى, سونىمەن قاتار قوناقجاي قازاق دالاسىندا ءبىر شاڭىراق استىندا بەيبىتشىلىك پەن كەلىسىمدە ءومىر ءسۇرىپ جاتقان ەتنوستاردىڭ مۋزىكالىق داستۇرلەرى كەڭىنەن كورسەتىلەتىن بولادى.

ال 25 ناۋرىز كۇنى ساعات 19.00-دە قازاق­ستان كومپوزيتورلار وداعى «ناۋرىز شاشۋ!» كونتسەرتىن وتكىزە­دى. كەشتە ە.راح­ماديەۆ, ع.جۇبا­نوۆا, ك.دۇيسە­كەەۆ, ب.كى­دىربەك, ا.رايىم­قۇلوۆا, س.ءاب­دى­نۇروۆ, گ.وزەن­باەۆا, ءا.ءابدىنۇروۆ, ا.جايىم, ا.ءتاني, ءا.قادىروۆ, ن.تاڭاتار, ل.جۇ­مانوۆا, ك.يزماي­لوۆا جانە ت.ب. قازاقستاندىق اۆتور­لار­دىڭ كامەرالىق ءارى ۆوكالدىق شىعار­مالارى ورىندالادى. ۇلىق­ مەي­رامعا ارنالعان كەشتە قازاق­ستاننىڭ ەڭبەك سىڭىرگەن قايرات­كەرى ازامات جىلتىركوزوۆ (باري­تون), اسەم سەمبينا (سوپرانو), سون­داي-اق ءالىبي ءابدىنۇروۆ, ارمان جايىم, سابينا ششەرباكوۆا, كا­ري­نا يزمايلوۆا (فورتەپيانو), ناز­گۇل تاڭاتار (دومبىرا), ءازىمحان ابدۋ­لازيم (ۆالتورنا) باستاعان ارتىستەر توبى ونەر كورسەتەدى.

27 ناۋرىزدا «استانا وپەرانىڭ» كىشكەنتاي كورەرمەندەرىنە ارنالىپ ت.بەي­­سەم­بەكتىڭ «سامۇرىق كەل­گەن تاڭ» مۋزىكالىق ەرتەگىسى قازاق تىلىندە ۇسىنى­لادى. ەرتەگى كيە­لى سامۇرىق قۇسىن ىزدەپ شىق­قان ايدار مەن ايجاننىڭ باس­تان كەش­كەن وقيعالارىن بايانداي­دى. ەرجۇرەك باتىرلار مەن ولاردىڭ سەنىمدى دوستارىن عاجايىپ «ماڭگى­لىك ەل» كۇتىپ تۇر.

كوكتەمنىڭ العاشقى ايىنىڭ مەرەكەلىك باعدارلامالار تسيكلىن 28 ناۋرىزدا وتەتىن  «قازاقكۆارتەت شاقىرادى» توپتاماسىنان «بەلا بارتوك­تى تۋ ەتىپ» كونتسەرتى تۇيىن­دەيدى. عازيزا جۇبانوۆا اتىنداعى مەم­لەكەتتىك ىشەكتى اسپاپتار كۆارتەتىنىڭ ۆەنگر كومپوزيتورى بەلا بارتوكتىڭ 140 جىلدىعىنا ارنالعان مۋزىكالىق كەشىندە وتاندىق تالانتتى مۋزىكانتتارمەن بىرگە تانىمال رەسەي كلارنەتشىسى, باشقۇرتستاننىڭ ەڭبەك سىڭىرگەن ءارتىسى ارتۋر نازيۋللين ونەر كورسەتەدى.