قازاقستان • 01 ناۋرىز، 2021

قۋاتتى قۇرىلىمنىڭ شۋاقتى مەرەكەسى

48 رەت كورسەتىلدى

1 ناۋرىز بۇكىل الەمدە دۇنيەجۇزىلىك ازاماتتىق قورعانىس كۇنى رەتىندە كەڭىنەن اتالىپ وتىلەدى. ءبىزدىڭ ەلىمىزدە دە بۇل كۇن تاريحي مەرەكە، ويتكەنى ازاماتتىق قورعانىس سالاسىن قامتاماسىز ەتەتىن قازاقستاننىڭ توتەنشە جاعدايلار قۇرىلىمى ەل ومىرىندە ۇلكەن مانگە يە.

بۇل مەرەكە بار قاجىر-قايراتىن حالىقتى ءتۇرلى قاۋىپ-قاتەردەن قورعاۋعا جۇمىلدىراتىن قۇتقارۋشىلارعا قۇرمەت رەتىندە سالتانات قۇرادى.  1990 جىلى 18 جەلتوقساندا وتكەن حالىقارالىق ازاماتتىق قورعانىس ۇيىمى باس اسسامبلەياسىنىڭ 9 سەسسياسىندا  كوكتەمنىڭ العاشقى كۇنىن دۇنيەجۇزىلىك ازاماتتىق قورعانىس كۇنى رەتىندە اتاپ ءوتۋ تۋرالى شەشىم قابىلدانعان بولاتىن. سول جىلى حالىقارالىق ۇيىمنىڭ جارعىسىن 18 مەملەكەت قولدادى. اراعا جەتى جىل سالىپ، پرەزيدەنت جارلىعىمەن «دۇنيەجۇزىلىك ازاماتتىق قورعانىس ۇيىمىنىڭ جارعىسىنا قازاقستان رەسپۋبليكاسىن قوسۋ تۋرالى»  جاڭا زاڭ قولدانىسقا ەندى. قازىرگى تاڭدا بۇل ۇيىمعا 50-دەن استام مەملەكەت مۇشە. اتالعان زاڭ اياسىندا قازاقستان توتەنشە جاعدايلار سالاسىندا وزگە مەملەكەتتەرمەن حالىقارالىق ىنتىماقتاستىققا قول جەتكىزدى. داستۇرگە اينالعان بۇل مەرەكە جىل سايىن ءتۇرلى ۇرانمەن وتەدى. بيىلعى مەرەكە «قۋاتتى ازاماتتىق قورعانىس ۇلتتىق ەكونوميكانى ساقتاۋ ءۇشىن!» ۇرانىمەن باستاۋ الىپ وتىر.

وسىناۋ دارا تۇرار داتا ەلىمىزدە قايتا قۇرىلعان توتەنشە جاعدايلار مينيسترلىگىنىڭ قۇرامىنا وتكەن  ب. مومىش ۇلى اتىنداعى 28237 اسكەري ءبولىمى ءۇشىن دە ەرەكشە كۇن. ويتكەنى قالىڭ ەلدى ايتىپ كەلمەيتىن اپاتتان، تابيعاتتىڭ توسىن مىنەزىنەن، تابيعي جانە تەحنوگەندىك سيپاتتاعى توتەنشە جاعدايلاردان اراشالايتىن اسكەري ءبولىمنىڭ مەملەكەتتىك كۇشتىك قۇرىلىمدار قاتارىندا وزىندىك ورنى، وزىنە ءتان  دەربەس تاريحى بار.  قۇرىلعان كۇننەن باستاپ بەدەرلى جىلدار بەلەسىندە ءبولىم جەكە قۇرامى ەرلىكتەر مەن باتىرلىق ۇلگىلەرىنە تولى داڭقتى جاۋىنگەرلىك جولدان ءوتتى. ءتۇرلى اپاتتار مەن تابيعي جانە تەحنوگەندىك سيپاتتاعى توتەنشە جاعدايلاردى جويۋمەن قاتار قۇتقارۋ جۇمىستارىن جۇرگىزۋ بويىنشا رەسپۋبليكا  وڭىرلەرىندە قىرۋار جۇمىستار اتقاردى، سونىمەن قاتار ەل كولەمىندەگى جانە تمد ەلدەرى اراسىندا وتكەن بىرلەسكەن وقۋ-جاتتىعۋلارعا قاتىستى. جۇزدەن اسا اسكەري قىزمەتشىلەر اتقارعان قىزمەتتەرىنە ادالدىعى ءۇشىن ءتۇرلى وردەن-مەدالدارمەن ماراپاتتالدى.

بۇگىندە ەل پرەزيدەنتى قاسىم-جومارت توقاەۆتىڭ شەشىمىمەن قايتا قۇرىلعان توتەنشە جاعدايلار مينيسترلىگىنىڭ قۇرامىنا كىرگەن اسكەري ءبولىم ازاماتتىق قورعانىس سالاسىندا وزدەرىنە جۇكتەلگەن مىندەتتەردى ءمىنسىز، ءارى تاباندىلىقپەن اتقارىپ كەلەدى. اسكەري سالانىڭ ايناسىنا اينالعان قۇرىلىمنىڭ قۋاتى ارتا بەرگەي!

 الماتى

 

 

سوڭعى جاڭالىقتار

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار