ءوتىپ بارا جاتقان 2013 جىل ەلىمىز ءۇشىن دە, ونەر مەن مادەنيەت, عىلىم مەن ساياسات سالاسىنداعى جەكەلەگەن تۇلعالار ءۇشىن دە جەمىستى ءارى جەڭىستى بولدى. شۇكىر, اۋىز تولتىرىپ ايتارلىق جەتىستىكتەرىمىزدى ءبىر ەسكە ءتۇسىرىپ الۋ ارتىق بولماس دەپ ويلايمىز.
بەكزات ونەر – كلاسسيكالىق مۋزىكانىڭ حانشايىمى نۇرجامال ۇسەنباەۆا ۇستىمىزدەگى جىلى «التىن ەۋروپا» ماراپاتىن يەلەنگەن ەدى. جەمىستى جىل قورىتىندىلانىپ جاتقان ساتتە تانىمال انشىگە حابارلاستىق.
ءوتىپ بارا جاتقان 2013 جىل ەلىمىز ءۇشىن دە, ونەر مەن مادەنيەت, عىلىم مەن ساياسات سالاسىنداعى جەكەلەگەن تۇلعالار ءۇشىن دە جەمىستى ءارى جەڭىستى بولدى. شۇكىر, اۋىز تولتىرىپ ايتارلىق جەتىستىكتەرىمىزدى ءبىر ەسكە ءتۇسىرىپ الۋ ارتىق بولماس دەپ ويلايمىز.
بەكزات ونەر – كلاسسيكالىق مۋزىكانىڭ حانشايىمى نۇرجامال ۇسەنباەۆا ۇستىمىزدەگى جىلى «التىن ەۋروپا» ماراپاتىن يەلەنگەن ەدى. جەمىستى جىل قورىتىندىلانىپ جاتقان ساتتە تانىمال انشىگە حابارلاستىق.
– نۇرجامال حانىم, بيىلعى جىل ءسىز ءۇشىن تابىستى بولدى. كلاسسيكالىق مۋزىكاداعى جەتىستىگىڭىزدەن باسقا, تاعى قانداي قۋانىشتاردى باستان وتكەردىڭىز؟
– وسى 2013 جىل مەنىڭ جەكە ءومىرىم ءۇشىن دە, ونەرىم ءۇشىن دە وتە تابىستى, قۋانىشقا بولەگەن جىل بولدى. وتباسىمداعى قىزىقشىلىقتىڭ ەڭ ۇلكەنى – قارلىعاش قىزىمنىڭ شاڭىراعىندا اجار ەسىمدى نەمەرەمىز دۇنيەگە كەلدى.
ساحناعا شىعۋ, ارينە, مەن ءۇشىن ۇلكەن جاۋاپكەرشىلىك جانە قۋانىش. ونەردى سۇيەتىن كوپشىلىك الدىنا شىعىپ, ولارعا كلاسسيكالىق ونەردىڭ مايەگىن بەرە ءبىلۋ ءبىر ماسەلە بولسا, ۇلى تۋىندىلاردى تابيعاتىنا ساي شەبەرلىكپەن ورىنداۋ ول دا ۇلكەن ەڭبەكتى تالاپ ەتەدى. سوندىقتان دا بيىلعى جىلى ونەردەگى تابىسىم دا, قۋانىشىم دا ەۋروپالىق ونەر وداعىنىڭ بەرگەن «التىن ەۋروپا» («Golden Europea»)دەپ اتالاتىن مارتەبەلى ماراپاتقا يە بولدىم. چەحيا استاناسى پراگادا ورنالاسقان دۇنيەجۇزىندەگى ەڭ ۇزدىك كونتسەرتتىك زالداردىڭ ءبىرى رۋدولفينۋمدە ونەر كورسەتتىم. اۋىر دەرتكە شالدىققان بالالارعا قولداۋ كورسەتىپ, ولاردىڭ زاماناۋي تەحنولوگيالىق قۇرالدارمەن جابدىقتالعان ۇزدىك ەمحانالاردا ەم قابىلداۋىنا مۇمكىندىك تۋدىرۋ ماقساتىندا وتكىزىلگەن كونتسەرت ەدى بۇل.
رۋدولفينۋم كونتسەرتتىك زالىنىڭ اكۋستيكاسى كەرەمەت, ول جەردە الەمنىڭ ەڭ الدىڭعى قاتارلى ونەر قايراتكەرلەرى ءان سالعان. ول جەردە «پراگا كوكتەمى» سەكىلدى ءداستۇرلى شارالار جوعارى دەڭگەيدە وتكىزىلىپ تۇرادى. مەنىڭ دە باعىما سول رۋدولفينۋمدا ونەر كورسەتۋ جانە ونىڭ ۇستىنە سول كونتسەرتتەن تۇسكەن قارجىنى سىرقات بالالارعا دەپ قايىرىمدىلىق قورىنا سالۋ مۇمكىندىگى بۇيىردى.
– ەۋروپا تورىندە قانداي تۋىندىلار شىرقالدى جانە سىزگە دەيىن بۇل ماراپاتتى كىمدەر يەلەنگەن ەدى؟
– سول كونتسەرتتە مەن الەم, ەۋروپا جانە قازاق كومپوزيتورلارىنىڭ كلاسسيكالىق تۋىندىلارىن ورىندادىم. كونتسەرت سوڭىندا ەۋروپالىق ونەر وداعىنىڭ وكىلدەرى ساحناعا شىعىپ, ماعان «التىن ەۋروپانى» تابىستاعاندا ءارى قۋاندىم, ءارى تاڭعالدىم. ويتكەنى, مەن كونتسەرتتىڭ سوڭىنا دەيىن ونداي ۇلكەن سىيعا يە بولاتىنىمدى بىلمەگەن ەدىم.
بۇل ماراپاتقا ەڭ ءبىرىنشى يە بولعان پلاسيدو دومينگو ەدى. ودان كەيىن مۇنداي ۇلكەن مارتەبەگە يە بولۋ مەن ءۇشىن ۇلكەن قۇرمەت بولدى. بۇل مەنىڭ جەكە ونەرىمدەگى عانا ەمەس, قازاق حالقىنىڭ بەكزات ونەردەگى بيىگى دەپ ەسەپتەيمىن.
نەگىزى بۇل ماراپاتتى ەۋروپالىق ونەر وداعى «ورىنداۋشىلىق شەبەرلىگىنە», «ونەردەگى قايىرىمدىلىعى ءۇشىن» دەيتىن ءتۇرلى ەڭبەكتەردى باعالاپ بەرەدى. مەنەن كەيىن «التىن ەۋروپاعا» چەحتىڭ فيليپ باندجاك دەيتىن باريتونى يە بولدى. بۇل ناگراداعا اتالمىش ونەر وداعىنىڭ ءوزى مەنىڭ ونەردەگى 30 جىلدىق ەڭبەگىمدى باعالاپ, وسى كۇنگە دەيىن الەمنىڭ قاي جەرىندە, قانداي ساحنالارىندا كونتسەرت قويعانىمدى ەسكەرىپ ۇسىنىپ وتىرعانىن بىلگەنىمدە ەۋروپالىقتاردىڭ شىنايى ونەرگە دەگەن قۇرمەتى مەن جاۋاپكەرشىلىگىنە ريزا بولدىم.
– الداعى 2014 جىلداعى كونتسەرتتىك جوسپارلارىڭىز؟
– كەلەر جىلى قازاقستاننىڭ بارلىق ءوڭىرىن ارالاپ, ءوزىمنىڭ ونەردەگى 30 جىلدىق ەڭبەگىمە ەسەپ بەرۋ كونتسەرتىمدى وتكىزۋدى ويلاستىرىپ وتىرمىن. قازاق, يتاليان, ورىس, فرانتسۋز كلاسسيكاسىنان, كوپتەگەن وپەرالارداعى ءىرى تۋىندىلاردى, كامەرالىق كونتسەرتىمدى حالقىما جولداسام دەيمىن. ءوز تاراپىمنان «ەگەمەن قازاقستان» گازەتىنىڭ قالىڭ وقىرمان قاۋىمىنا الداعى كەلە جاتقان جىلقى جىلى تابىستى, بەرەكەلى, مولشىلىق زاماننىڭ باسى بولسىن دەگىم كەلەدى. دارەجەسى مەن دەڭگەيى بيىك كلاسسيكالىق ونەردى اسقاقتاتقان قازاق ەلى قاشاندا تىنىش, باقۋاتتى جانە ابىرويى اسقاق بولا بەرسىن. ەلىمىزدىڭ نامىسىن الەم الدىندا بيىكتەتىپ, جاقسى اتىمىز جاھانعا جايىلسىن دەگەن ىزگى تىلەگىمدى جولدايمىن!
اڭگىمەلەسكەن
قانات ەسكەندىر,
«ەگەمەن قازاقستان».
