العىس ايتۋ كۇنى قازاقستان حالقى اسسامبلەياسىنىڭ قۇرىلعان كۇنىمەن بىرگە تويلانادى. قازاقستانداعى ەڭ جاڭا مەرەكەنىڭ ءوز تاريحى مەن قولتاڭباسى بار. مەنىڭشە, بۇل مەيرام قازاقستان حالقى اسسامبلەياسىنىڭ تۋىندىسى ىسپەتتى. وسى پرەزيدەنتتىك ينستيتۋتتىڭ قابىرعاسىندا العىس ايتۋ كۇنىن تويلاۋ جونىندە باستاما كوتەرىلگەن. قحا وسى ەرەكشە مەرەكەنىڭ پايدا بولۋىنا زور ۇلەس قوستى.
ەلباسى نۇرسۇلتان نازارباەۆ 1995 جىلعى 1 ناۋرىزدا نەگىزىن قالاعان قازاقستان حالقى اسسامبلەياسى رۋحاني مەكتەپ, ءتىپتى اكادەمياعا اينالدى. «جاقسى ادام – وزگەلەرگە كومەكتەسكەن, قامقورلىق تانىتقان ادام» دەگەن ناقىل بار. ءبىز وسىنى كۇندەلىكتى جاساۋىمىز قاجەت. العىس ايتۋ كۇنىمەن شەكتەلىپ قالماي, جىل بويى جالعاستىرۋ كەرەك دەپ ەسەپتەيمىن.
وسى ورايدا, ەلىمىزدەگى ايرىقشا مەيرامدا بارشا قازاقستاندىقتاردىڭ رۋحاني اسقاقتاپ, جان-جۇرەگى تازارۋىن تىلەيمىن. ءدال وسى كۇنى ەڭ جىلى ءسوز – «راحمەت»-ءتى مىڭداعان ادامعا ايتايىق. اتا-انامىزعا, باۋىرلارىمىزعا, دوستارىمىزعا, تۋىستارىمىزعا العىسىمىزدى جەتكىزە بەرەيىك.
انتيكا ءداۋىرىنىڭ ايگىلى فيلوسوفى دەموكريتتىڭ ء«بىز دوستارىمىزدان كومەك قانا كۇتىپ قويمايمىز, ولاردىڭ قول سوزاتىنىنا سەنىمدىلىكتى دە قاجەت ەتەمىز», دەگەن تاماشا ءسوزى بار. دوستارىڭنىڭ جەرگە تاستامايتىنىنا سەنىمىڭ باردا, ءومىردىڭ ءمانى مەن ماڭىزى ارتا تۇسەدى.
قازاقستاندىقتاردا اتا-اناسىنا, تۋعان-تۋىستارىنا, دوستارىنا, باۋىرلارىنا العىس ايتاتىن كوپتەگەن سەبەپ بار. بىراق ەڭ باستى راحمەت – مەيىربان, قۇدايدىڭ مەيىرى توگىلگەن قازاق جەرىنە ايتىلۋعا ءتيىس. ونىڭ وتە تولەرانتتى, عاجايىپ تۇرعىندارى – قازاق حالقىنا ايتۋىمىز قاجەت.
ءبىز بىرەگەيلىك تۋرالى ايتامىز. ال قازاقستان قوعامىنىڭ باستى بىرەگەيلىگى – العىس ايتۋ كۇنى. اتالعان مەرەكە قازاقستاندىقتار رۋحاني ازىق الاتىن, مەملەكەتتىك قۇرىلىمىمىزدى نىعايتاتىن كۇنگە اينالىپ كەلەدى.
ءتىپتى بۇل مەرەكە تەك قازاقستانمەن شەكتەلىپ قالماق ەمەس. قازىرگى تاڭدا شەتەلدەگى دوستارىمىز دا وسى ءبىر ەرەكشە مەيرامدى تويلاپ, ءبىزدىڭ ەلىمىزدە وتكىزگەن ۇمىتىلماس كەزدەرىن ساعىنىشپەن ەسكە الىپ ءجۇر.
اناتولي باشماكوۆ,
قحا كەڭەسىنىڭ مۇشەسى, پرەزيدەنت جانىنداعى مەملەكەتتىك باسقارۋ
اكادەمياسى سولتۇستىك قازاقستان
وبلىسى فيليالىنىڭ پروفەسسورى
