اسا قامقور, ەرەكشە مەيىرىمدى اللانىڭ اتىمەن باستايمىن! اللاعا ماداق, پايعامبارعا سالاۋات بولسىن!
ەلىمىزدە شۋاقتى كوكتەمنىڭ العاشقى كۇنى العىس ايتۋ مەرەكەسىمەن باستالادى. بارشاڭىزدى بىرلىك پەن مەيىرىمگە ۇندەيتىن مەرەكەمىز – العىس ايتۋ كۇنىمەن شىن جۇرەكتەن قۇتتىقتايمىن. ءار وتباسىعا قۇت-بەرەكە, باقىت پەن تابىس تىلەيمىن.
ادامگەرشىلىك پەن يماندىلىقتى ءومىرىنىڭ قازىعى ەتكەن حالقىمىز قيىن-قىستاۋ سىناق جىلدارىندا قامىققان جانعا قامقور بولدى. تاعدىر تاۋقىمەتىن تارتىپ, زوبالاڭ زامانداردا قازاق جەرىنە پانا ىزدەپ كەلگەن ءتۇرلى ەتنوس پەن ءدىن وكىلدەرىن باۋىرىنا باسىپ, بارىمەن بولىسكەن اتا-بابالارىمىزدىڭ بۇل جاقسىلىعى ۇرپاق ءۇشىن ماڭگى ونەگە. ەندەشە, جاقسىلىقتى جادىمىزدان شىعارماۋ – ادامدىق ءىس.
پايعامبارىمىزدىڭ (وعان اللانىڭ سالاۋاتى مەن سالەمى بولسىن) كوركەم مىنەزدەرىنىڭ ءبىرى جاقسىلىق جاساعان ادامعا قۇرمەت كورسەتىپ, ءىلتيپات ءبىلدىرىپ, العىس ايتۋ ەدى. وسىعان بايلانىستى يسلام تاريحىندا مىناداي عيبراتتى وقيعا بولعان. مەككەدە اللا ەلشىسىنە قاتتى قىسىم جاسالعان كەزدە پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ءبىر توپ مۇسىلمانعا ءدىندى ساقتاپ قالۋ ءۇشىن ەفيوپياعا كوشۋدى بۇيىرادى. اللا ەلشىسى ايتقانداي, سول كەزدەگى ەفيوپيا پاتشاسى ءناججاشي ادىلەتسىزدىككە جول بەرمەيتىن باسشى ەدى.
سونىمەن ساحابالار پايعامبارىمىزدىڭ (وعان اللانىڭ سالاۋاتى مەن سالەمى بولسىن) جاناشىرلىعىمەن ەفيوپياعا قونىس اۋدارادى. بۇل وقيعا اللاعا سەرىك قوسۋشى مەككەلىكتەردىڭ ىزاسىن تۋدىرادى. ناججاشيدەن مۇسىلمانداردى كەرى قايتارۋدى سۇرايدى. الايدا ءادىل پاتشا ەفيوپيا جەرىنە پانا ىزدەپ كەلگەن مۇسىلماندارعا قيانات جاسالعانىنا كوز جەتكىزىپ, ولاردى قايتارۋدان باس تارتادى.
وسى وقيعادان كەيىن ارادا ءبىراز ۋاقىت وتەدى. جاعداي تۇراقتالعان كەزدە ەفيوپيادان دەلەگاتسيا كەلەدى. اللا ەلشىسى ورنىنان تۇرىپ, قۇرمەت كورسەتىپ, ءىلتيپات ءبىلدىرىپ, ولاردىڭ اس-سۋىن ازىرلەي باستايدى. جانىنداعى ساحابالار: «ۋا, اللانىڭ ەلشىسى! ءبىز بارمىز عوي» دەپ يشارا ءبىلدىرىپ, داستارقاننىڭ قامىنا كىرىسەدى. سوندا ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «ولار مەنىڭ ساحابالارىمدى قۇرمەتتەگەن, جاقسىلىق جاساعان. مەن دە ولارعا قۇرمەت كورسەتۋدى, جاقسىلىق جاساۋدى جاقسى كورەمىن» دەگەن. ءبىز بۇل وقيعادان جاقسىلىققا جاقسىلىقپەن جاۋاپ بەرۋ – پايعامبارىمىزدىڭ (وعان اللانىڭ سالاۋاتى مەن سالەمى بولسىن) ونەگەلى امالدارىنىڭ ءبىرى ەكەنىن انىق اڭعارامىز. ويتكەنى حاديستەردىڭ بىرىندە: «كىم ادامدارعا (جاقسىلىقتارىنا) العىس بىلدىرمەسە, اللاعا شۇكىرلىك ەتپەگەنى» دەلىنگەن. دەمەك, ادامعا العىس ايتقانىڭ – اللاعا شۇكىر ەتكەنىڭ...
ءبىز اۋەلى ادامدى جوقتان بار ەتكەن اللاعا شەكسىز شۇكىر ايتامىز. اللا تاعالا قۇراندا: «...ەگەر شۇكىر ەتسەڭدەر, ارتتىرا بەرەمىن...» دەيدى («يبراھيم» سۇرەسى, 7-ايات). اللانىڭ ءار جاقسىلىعى مەن نىعمەتىنە شۇكىر ەتۋىمىز ەكى دۇنيەدە باقىت پەن بەرەكەگە كەنەلۋىمىزگە سەبەپشى بولماق.
ۇلان-عايىر جەرىمىزدى قورعاپ, ونى بىزگە امانات ەتىپ قالدىرعان بابالارىمىزعا العىس ايتامىز. ولارعا جاساعان العىسىمىز بەن جاقسىلىعىمىز مىناداي امالداردا كورىنىس تابادى: رۋحىنا قۇران باعىشتاۋ, اماناتىنا قيانات جاساماۋ, وسيەتىن ورىنداۋ, جاقسى ۇرپاق تاربيەلەۋ, اتا-انامىزدىڭ اتىنا كىر كەلتىرمەۋ, ت.ب.
مەيىرىمىن توگىپ, ءسابي كەزىمىزدەن ماپەلەپ وسىرگەن اتا-انامىزعا العىس ايتامىز. اللا تاعالا قۇراندا وزىنە بويسۇنۋدى, سودان كەيىن اتا-اناعا جاقسىلىق جاساۋدى ءامىر ەتىپ: «ادامدارعا اتا-اناسىنا قارايلاسۋدى بۇيىردىق. انانىڭ وعان السىرەگەن ۇستىنە السىرەپ, (توعىز اي بويى) جۇكتى بولىپ, ەكى جىلدا ومىراۋدان ايىرۋى بار. ماعان جانە اكە-شەشەڭە شۇكىر ەت. قايتار ورنىڭ مەن جاق» دەپ ەسكەرتكەن («لۇقمان» سۇرەسى, 14-ايات).
تورقالى توي مەن توپىراقتى ولىمدە قامقور بولعان اعايىن-تۋىسقا, دوس-جارانعا, كورشى-قولاڭعا العىس ايتامىز. ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىم ريزىق-نەسىبەسىنىڭ كوبەيۋىن جانە عۇمىرىنىڭ ۇزاق بولۋىن قالاسا, اعايىن-تۋىستىق قارىم-قاتىناسىن كۇشەيتىپ, وعان قارايلاسسىن», دەگەن.
مەن وسى رەتتە سىندارلى ساتتە حالىققا قامقور بولعان ەل قامىنداعى ازاماتتارعا, دارىگەرلەرگە, قازاقستان مۇسىلماندارى ءدىني باسقارماسىنىڭ يگى باستامالارىنا, قايىرىمدىلىق اكتسيالارىنا قولداۋ كورسەتكەن جومارت جاندارعا ايرىقشا العىسىمدى بىلدىرەمىن. سونداي-اق ءدىني راسىمدەرگە شەكتەۋ قويىلعان ساتتە ءبىر ءۇيدىڭ بالاسىنداي بىرلىگىن تانىتقان جاماعاتقا رياسىز ريزالىق نيەتىمدى جەتكىزەمىن. بارشاڭىزعا مىڭ العىس!
اللا ەلشىسى ءبىر حاديسىندە: «كىم سەندەرگە جاقسىلىق جاساسا, وعان سىيلىق بەرىڭدەر. ەگەر بەرەر سىيلىق تاپپاساڭدار, ول ءۇشىن دۇعا جاساڭدار», دەلىنگەن. وسى رەتتە بارشا مۇسىلمان قاۋىمىن ەلىمىز بەن جەرىمىزدىڭ, حالقىمىز بەن اينالاداعى ادامداردىڭ يگىلىگى ءۇشىن دۇعا جاساۋعا شاقىرامىن. ادامدار اراسىنداعى مەيىرباندىق پەن دوستىق, تاتۋلىق پەن قۇرمەت سىندى قۇندىلىقتاردى ارتتىرا تۇسەتىن ايتۋلى كۇندە اينالامىزعا العىس ايتىپ, تىلەۋلەستىگىمىزدى بىلدىرە جۇرەيىك, اعايىن!
اللا تاعالا ەلىمىز بەن جەرىمىزدى ءتۇرلى سىناقتان ساقتاپ, حالقىمىزدى امان ەتكەي. دەنىمىز قۋاتتى, ءار كۇنىمىز شۋاقتى بولعاي! ءامين!
ناۋرىزباي قاجى تاعان ۇلى,
قازاقستان مۇسىلماندارى ءدىني
باسقارماسىنىڭ توراعاسى, باس ءمۇفتي
