قازاقستان • 26 اقپان، 2021

سەناتورلار كولىك قاۋىپسىزدىگى دەڭگەيىن تومەن دەپ سانايدى

2 رەت كورسەتىلدى

قر پارلامەنتى سەناتىندا پالاتا توراعاسىنىڭ ورىنباسارى اسقار شاكىروۆتىڭ توراعالىق ەتۋىمەن حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسى بولدى. "ۇلتتىق قاۋىپسىزدىك تۋرالى" زاڭنىڭ كولىك قاۋىپسىزدىگىن قامتاماسىز ەتۋ بولىگىنىڭ ىسكە اسىرۋ بارىسىن تالقىلاۋ كۇن تارتىبىندەگى نەگىزگى ماسەلە بولدى، دەپ حابارلايدى Egemen.kz.

توراعا ورىنباسارى ءوز سوزىندە مەملەكەت باسشىسى سەرپىندى ينفراقۇرىلىمدىق جوبالار، قىزمەت كورسەتۋ دەڭگەيى مەن ترانزيت باعىتتارداعى جىلدامدىقتى ارتتىرۋ ەسەبىنەن قازاقستاننىڭ باسەكەگە قابىلەتتىلىگىن ارتتىرۋ ماقساتىن العا قويعانىن ەسكە سالدى. اتاپ ايتقاندا، 24 مىڭ شاقىرىم جولدى، ياعني بارلىق رەسپۋبليكالىق جولدار مەن ونداعى قىزمەت كورسەتۋلەردى 2025 جىلعا دەيىن قايتا قۇرۋ جانە قامتاماسىز ەتۋ مىندەتى قويىلدى.

سەناتورلار وسىعان دەيىن ۇكىمەت اتىنا جولداعان دەپۋتاتتىق ساۋالىندا ەلىمىزدىڭ ترانزيتتىك الەۋەتىن دامىتۋ ماسەلەسىن ايتقان بولاتىن.

"كولىك قاۋىپسىزدىگىن قامتاماسىز ەتۋ دەڭگەيىنىڭ جەتكىلىكسىزدىگى، وسى سالاداعى مەملەكەتتىك ساياساتقا حالىقتىڭ ريزاشىلىق دەڭگەيىنىڭ تومەندىگى سالاداعى ماڭىزدى پروبلەمالاردىڭ ءبىرى بولىپ تابىلادى. كولىكتەگى قاۋىپسىزدىك دەڭگەيىن ارتتىرۋدى مەملەكەتتىك ساياساتتاعى باسىم مىندەتتەردىڭ ءبىرى رەتىندە قاراستىرۋ قاجەت"، - دەدى اسقار شاكىروۆ.

وتىرىس بارىسىندا باس پروكۋراتۋرانىڭ، ۇلتتىق قاۋىپسىزدىك كوميتەتىنىڭ، يندۋستريا جانە ينفراقۇرىلىمدىق دامۋ، سىرتقى ىستەر جانە قورعانىس مينيسترلىكتەرىنىڭ، باسقا دا مەكەمەلەر مەن قوعامدىق ۇيىمداردىڭ وكىلدەرى قاتىستى.

سەناتورلار كولىك قاۋىپسىزدىگى سالاسىنداعى قۇقىقتىق، ۇيىمداستىرۋ جانە تەحنيكالىق پروبلەمالار، سونداي-اق بەلگىلەنگەن ماسەلەلەردى شەشۋ جونىندەگى قابىلدانىپ جاتقان شارالار تۋرالى حاباردار ەتىلدى. اتاپ ايتقاندا، سالالىق زاڭنامانى ىسكە اسىرۋ بارىسى، اۋە كەمەلەرىن پايدالانۋشىلاردىڭ سەرتيفيكاتتاۋ تالاپتارىنا تۇزەتۋلەر بويىنشا باستاما جاساۋ، كولىك سالاسىنا ينۆەستيتسيا تارتۋ جونىندەگى حالىقارالىق ىنتىماقتاستىقتى كەڭەيتۋ تۋرالى ايتىلدى.

حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد وتىرىستى قورىتىندىلاي كەلىپ، ەلىمىزدىڭ ەكونوميكالىق قاۋىپسىزدىگىنىڭ قۇرامداس بولىگى بولىپ تابىلاتىن كولىك قاۋىپسىزدىگى دەڭگەيىن ارتتىرۋ جونىندە بارلىق مەملەكەتتىك ورگانداردىڭ كەلىسىلگەن قىزمەتى قاجەتتىگىن اتاپ ءوتتى. ول سونداي-اق وتىرىس بارىسىندا سەناتورلار ايتقان ۇسىنىستاردى مەملەكەتتىك ورگانداردىڭ ەسكەرەتىنىنە سەنىم ءبىلدىردى.

دەپۋتاتتار ءوز كەزەگىندە زاڭ شىعارۋ ارقىلى كولىك قاۋىپسىزدىگى پروبلەمالارىن شەشۋگە كومەكتەسۋگە دايىن ەكەندىكتەرىن اتاپ ءوتتى.

سوڭعى جاڭالىقتار

ءسوزدىڭ جەتى بوياۋى

تانىم • كەشە

ورازانىڭ ءار ءساتى ساۋاپ

رۋحانيات • كەشە

ۇقساس جاڭالىقتار