ايماقتار • 26 اقپان، 2021

ءار سۋرەتتە – ءومىر ساۋلەسى

وبلىس ورتالىعىنداعى بالالار كوركەمسۋرەت مەكتەبىندە وسى ءبىلىم ۇياسىنىڭ ۇستازى، سۋرەتشى التىن قيسامەدينوۆانىڭ ء«ار سۋرەتتە – ءومىر ساۋلەسى» اتتى جەكە كورمەسى ءوتتى. كورمەگە «قازاق ايەلدەرى»، «مەنىڭ قالام»، «قالا كوشەلەرى، «الماتى» جانە ۇلكەن الماتى كولىنىڭ جانىنداعى تابيعات كورىنىستەرىنە ارنالعان 20-دان استام سۋرەت قويىلعان.

فاريدا بىقاي

ءوزىمىز كورگەندەي، سۋرەت كورمەسىنە ء«ار سۋرەتتە – ءومىر ساۋلەسى» تاقىرىبىنداعى قازاق ايەلدەرىنىڭ ءتۇرلى پورترەتتەرى، عيماراتتار، تاۋ جانە لاندشافتتار، تابيعات كورىنىستەرى بەينەلەنگەن جۇمىستار قويىلىپتى.

پورترەتتەردە ۇلتتىق كيىمدەگى قازاق قىزدارىنىڭ بەينەلەرى ۇسىنىلعان. بۇلار ارقىلى اۆتوردىڭ قازاق ايەلدەرىنىڭ جان دۇنيە سۇلۋلىعىن، نازىكتىگىن، مەيىرىمدىلىگىن كورسەتكەنى بايقالادى.

ءوزىنىڭ ايتۋىنشا، ول كوبىنەسە مايلى كەسكىندەمە، پاستەل سياقتى گرافيكالىق تەحنيكادا جۇمىس ىستەيدى. مايلى بوياۋمەن سالىنعان «الماتى»، «پاۆلودار» بولىمىندەگى كارتينالارى دا ەرەكشە تاسىلمەن بەينەلەنىپتى.

– الماتى تاقىرىبىنا كەلسەك، 2015 جىلى ءبىر توپ سۋرەتشىمەن بىرگە وسى قالا ماڭىنداعى تاۋ ىشىندە، باقتاردا بولىپ، تابيعاتتى تاماشالاعان ەدىك. سۋرەتشى ءۇشىن بۇل شىعارماشىلىق شابىت تۋدىراتىن كوركەم كورىنىستەر عوي. بىزگە سول جولى ۇلكەن الماتى كولىنىڭ ماڭايىندا ەتيۋدتەر، ەسكيزدەر، فوتو ماتەريالدار نەگىزىندە سۋرەت سالۋعا مۇمكىندىك بەرىلدى. نوبايلار اكۆارەلمەن، گۋاشپەن جازىلدى، ودان ءارى وسى ەسكيزدەر نەگىزىندە سۋرەتتەمەلەر جاسالدى، ال وسى سۋرەتتەمەلەر مايلى كەسكىندەمە تەحنيكاسىندا كەنەپتە ورىندالدى، – دەيدى التىن يبرايقىزى.

سۋرەتشى التىن قيسامەدينوۆانىڭ «كەرەكۋ – پاۆلودار» اتتى 30-عا جۋىق سۋرەتى بار، ال بۇل كورمەدەن وبلىس ورتالىعىنىڭ ەسكى اۋماعىنا ارنالعان «چەحوۆ دراما تەاترى»، «كونە قالانىڭ كۇزى»، «اليۋمينستروي اۋدانى»، «ساياجاي شاعىن اۋدانى»، «قارلى قىس» تاقىرىبىنداعى سۋرەتتەرىمەن تانىستىق.

التىن يبرايقىزى سەمەيدەگى پەداگوگيكالىق ينستيتۋتتىڭ مەكتەپتەردەگى كوركەمسۋرەت ءپانىنىڭ مۇعالىمدەرىن دايارلايتىن ءبولىمىن بىتىرگەن. كىشكەنتايىنان ەرتىس وزەنىنىڭ جاعاسىندا تۋىپ-وسكەن قىز سۋرەتشى بولسام دەگەن ارمانىن وسىلاي جۇزەگە اسىردى. وقۋ بىتىرگەن سوڭ، پاۆلودارعا قايتا ورالىپ مەكتەپتەردە، كوللەدجدەردە وقۋشىلارعا، ستۋدەنتتەرگە ساباق بەردى. سۋرەتشى تالانتتى شاكىرتتەر تاربيەلەدى.

پاۆلودار

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز