قوعام • 25 اقپان، 2021

الماتىدا مىڭنان استام ايەل ساقتاندىرۋ ەسەبىنەن ەكو جاساتا الادى

50 رەت كورسەتىلدى

قازاقستاندا ەكستراكورپورالدى ۇرىقتاندىرۋ پروتسەدۋراسىنىڭ قولجەتىمدىلىگى ارتتى. بۇرىن تەگىن مەديتسينالىق كومەك شەڭبەرىندە عانا جاسالاتىن جوعارى تەحنولوگيالىق قىزمەتتىڭ بۇل ءتۇرى 2020 جىلدان باستاپ مەديتسينالىق ساقتاندىرۋ پاكەتىنە ەنگەن بولاتىن، دەپ حابارلايدى Egemen.kz.

«الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليال باسشىسى تىلەۋحان ابىلداەۆتىڭ ايتۋىنشا، ەكستراكورپورالدى ۇرىقتاندىرۋ باعدارلاماسى 2010 جىلدان باستاپ مەملەكەتتىك تاپسىرىس بويىنشا جۇزەگە اسىرىلىپ كەلدى. بيىل ەلىمىز بويىنشا 7000 جۋىق ۇمىتكەر «اڭساعان ءسابي» ارنايى پرەزيدەنتتىك باعدارلاماسى شەڭبەرىندە ەكو جاساتىپ، اتا-انا باقىتىن سەزىنۋگە مۇمكىندىك الماق.

«ماسەلەن، 2020 جىلى الماتى قالاسىندا 643 ەكو جاسالعان. وعان 563 ملن تەڭگە ءبولىندى. بيىل 1238 مانيپۋلياتسيا جوسپارلانعان. وعان قاراستىرىلعان سوما 2 ەسە ارتىپ، 1،1 ملرد تەڭگەنى قۇراپ وتىر»، - دەدى فيليال ديرەكتورى.

بيىل وڭتۇستىك استانادا اتالمىش باعدارلاماعا 7 مەديتسينا ۇيىمى قاتىسىپ جاتىر. ولاردىڭ ءبارى دە مەديتسينالىق ساقتاندىرۋ قورىمەن كەلىسىمشارت بەكىتكەن:

  • «Private clinic» جشس
  • «اكۋشەرلىك، گينەكولوگيا جانە پەريناتولوگيا عىلىمي ورتالىعى» اق
  • «PERSONA» جشس
  • «ەكومەد» فيرماسى» جشس
  • «رەپرودۋكتيۆتىك مەديتسينا ينستيتۋتى» جشس
  • «كلينيكا AMD» جشس
  • «نۇراي» ەكو كلينيك جشس

 

ەكو باعدارلاماسىنا قاتىسۋ ءۇشىن تىركەلگەن ەمحاناعا بارىپ ارنايى ەسەپكە تۇرۋ قاجەت. ءتيىستى كورسەتىلىمدەر بولعان جاعدايدا دارىگەرلەر كۆوتاعا كەزەككە قويادى. كۆوتا جەرگىلىكتى قوعامدىق دەنساۋلىق باسقارماسىنداعى ارنايى كوميسسيا شەشىمىمەن بەرىلەدى.

ەستەرىڭىزگە سالا كەتسەك، قوسالقى رەپرودۋكتيۆتىك ادىستەردى پايدالانۋ پروتسەسى قر دسم 2020 جىلى 15-جەلتوقسانداعى بۇيرىعى نەگىزىندە جۇزەگە اسىرىلادى. بۇيرىقتا جاساندى ۇرىقتاندىرۋعا قويىلاتىن تالاپتار تولىق جازىلعان. ماسەلەن، ەكو باعدارلاماسىنا كۆوتا بويىنشا جاسى 18 بەن 42 ارالىعىنداعى، سوماتيكالىق، ەندوكريندىك دەنساۋلىعى بىرقالىپتى ايەلدەر قاتىسا الادى. انتيميۋللەر گورمونى كورسەتكىشى (امگ) 1،0 نانوگرامم/ميلليليتردەن جوعارى، فولليكۋلوستيمۋلياتسيالىق گورمون (فسگ) كورسەتكىشى – 12-دەن تومەن، ال، فولليكۋلداردىڭ جالپى سانى – التاۋدان كەم بولماۋى ءتيىس.

ەكستراكورپورالدى ۇرىقتاندىرۋ ءادىسى – دۇنيەجۇزىندە بەلەڭ الىپ جاتقان بەدەۋلىك پروبلەماسىنا قارسى كۇرەستىڭ ەڭ ءتيىمدى تاسىلدەرىنىڭ ءبىرى. الەم ەلدەرى بۇل ءادىستى پايدالانىپ كەلە جاتقانىنا 40 جىلدان اسقان، ال قازاقستاندا اتالعان پروتسەدۋرا 1996 جىلى قولدانىسقا ەندى. قازىرگى تاڭدا رەسپۋبليكا بويىنشا 22 مىڭنان استام ءسابي وسى باعدارلاما نەگىزىندە دۇنيە ەسىگىن اشقان.

جالپى، قازاقستاندا بەدەۋلىك دياگنوزىمەن ەسەپتە تۇرعان ايەلدەر سانى 11 مىڭنان اسىپ جىعىلادى.

سوڭعى جاڭالىقتار

ءسوزدىڭ جەتى بوياۋى

تانىم • كەشە

ورازانىڭ ءار ءساتى ساۋاپ

رۋحانيات • كەشە

ۇقساس جاڭالىقتار