رۋحانيات • 25 اقپان، 2021

ەل قورعاعان ەردىڭ ەسىمى جاڭعىردى

23 رەت كورسەتىلدى

كەشە قىزىلجارداعى ابىلايدىڭ اق ۇيىندە «قوس باتىردىڭ ءبىرى – قۇلەكە» اتتى عىلىمي-تاجىريبەلىك كونفەرەنتسيا بولىپ ءوتتى، دەپ حابارلايدى Egemen.kz.

قۇلەكە باتىر ابىلاي حاننىڭ وڭ تىزەسىن باسىپ وتىرعان سەنىمدى سەرىكتەرىنىڭ ءبىرى. ەل مەن جەردى قورعاۋدا ۇشى-قيىرسىز ەڭبەك سىڭىرگەن باتىر. ول تۋرالى حالىق اۋزىندا ءتۇرلى اڭىزدار دا كوپ. قالماقتىڭ باتىرى باعاناتىنى جەكپە-جەكتە جەڭىپ، اتا-جۇرتتى جاۋدان بوساتقان. ابىلايدىڭ تاپسىرماسىمەن ەلشىلىك قىزمەتتەر دە اتقارعان. باتىر دەگەن تەك جاۋعا شاپقانداعى قايرات قانا ەمەس، ەلدى باسقارىپ، بيلىك ايتۋداعى ادىلدىك، تاپقىرلىق، شەشەندىك. قۇلەكە وسىنىڭ بارىنە شەبەر بولعان. قۇلەكەنى قوس باتىردىڭ ءبىرى دەيتىن سەبەبى ونىڭ ەسىمى ۇنەمى ءوزىنىڭ اعايىنى قۇلسارى باتىرمەن قاتار اتالادى. قۇلسارى اۋليە ادام بولعان، ول دا ابىلاي حاننىڭ تاپسىرمالارىن ورىنداعان ەلشىسى.

قۇلەكە تۋرالى تاريحي قۇجاتتاردا دەرەكتەر مول.  ونىڭ ورىنبور قالاسىنا بارىپ، قۇپيا-كەڭەسشى ي.نەپليۋەۆپەن كەزدەسكەندىگى تۋرالى دا قۇجات بار. بۇل تۋرالى «رۋسسكو-كازاحسكيە وتنوشەنيا ۆ حVI-XVIII ۆەكاح» دەگەن قۇجاتتا كورسەتىلگەن.

قۇلەكە باتىردىڭ اتا-تەگى ارعىن ىشىندەگى اتىعاي. ونىڭ ىشىندە بايىمبەتتەن تارايدى. قۇلەكەنىڭ بابەكە، موڭكە، تىلەۋكە (شال اقىن)، شارداق، قازاقباي، ءجۇسىپ ەسىمدى التى ۇلى دا بەلگىلى ادامدار بولعان. سونىڭ ىشىندە شال اقىن اتانعان بالاسى تىلەۋكەنىڭ ولەڭدەرى مەن اندەرى قازاقتىڭ كەڭ دالاسىنا تاراعان. قۇلەكە باتىر تۇركىستانداعى قوجا احمەت ياسساۋي كەسەنەسىنە قازاقتىڭ اتاقتى ادامدارىنىڭ قاتارىنا جەرلەنگەن.  

قۇلەكەنىڭ بەرتىنگى ۇرپاقتارى دا وسال ەمەس، سونىڭ ىشىندە بەلگىلى ەكونوميست، مەملەكەتتىك سىيلىقتىڭ لاۋرەاتى، اكادەميك قوشان امانجولوۆتىڭ ەسىمىن بارشا قازاقستاندىقتار جاقسى بىلەدى.  

عىلىمي-تاجىريبەلىك كونفەرەنتسياعا باتىردىڭ ۇرپاعى امانجول قوشانوۆ، تاريح عىلىمدارىنىڭ دوكتورى، گەنەرال-لەيتەنانت اباي تاسبولاتوۆ، م.قوزىباەۆ ۋنيۆەرسيتەتىنىڭ پروفەسسورى زارقىن تايشىباي، باتىردىڭ تاعى ءبىر ۇرپاعى، الماتى قالاسىنىڭ تۇرعىنى، تانىمال جۋرناليست، بوستاندىق اۋدانى ارداگەرلەر كەڭەسىنىڭ توراعاسى حاميت ءبىرجانوۆ، پەتروپاۆل قالالىق ارداگەرلەر القاسىنىڭ توراعاسى جانگەلدى ءتاجين جانە باسقالار قاتىسىپ، ءسوز سويلەدى.

جيىندا سويلەگەن شال اقىن اۋدانىنىڭ اكىمى راحات سماعۇلوۆ اۋدان ورتالىعى سەرگەەۆكا كەنتىندە قۇلەكەنىڭ ەسىمىنە ءبىر كوشە جانە سالىنىپ جاتقان سپورت كەشەنى بەرىلگەنى تۋرالى حاباردار ەتتى. كونفەرەنتسيا جۇمىسىنا ابىلاي حان رەزيدەنتسياسى مۋزەي كەشەنىنىڭ ديرەكتورى ايان ساداەۆ مودەراتورلىق ەتتى. زۋمەرمەن بولعان كونفەرەنتسياعا وقىتۋشىلار، ستۋدەنتتەر، ولكەتانۋشىلار قاتىسىپ وتىردى.

سوڭعى جاڭالىقتار

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار