«كەلەسى ماڭىزدى ماسەلە – مۇمكىندىگى شەكتەۋلى ادامدارعا بارىنشا قولايلى جاعداي جاساۋ. ەڭ الدىمەن, بارلىق ساناتتاعى مۇگەدەكتىكتى انىقتاۋ راسىمدەرىن تۇبەگەيلى جەڭىلدەتۋ كەرەك. قازىر كۇتىمگە مۇقتاج ادامداردىڭ وزىنە تيەسىلى الەۋمەتتىك قىزمەتتەردى پايدالانۋى وتە قيىن», دەيدى پرەزيدەنت ق.توقاەۆ.
پرەزيدەنتتىڭ ايتۋىنشا, ولار ونسىز دا بەلگىلى نارسەنى دالەلدەۋ ءۇشىن ءتۇرلى كەڭسەنىڭ تابالدىرىعىن توزدىرۋعا ءماجبۇر. تسيفرلىق تەحنولوگيالار مەن اۆتوماتتاندىرۋ داۋىرىندە مۇندايعا جول بەرۋگە بولمايدى. سوندىقتان, جۇمىس ءتاسىلىن دەرەۋ وزگەرتۋ قاجەت.
«بىرىڭعاي اقپاراتتىق قور (بازا) قۇرىپ, جۇرتقا ىڭعايلى ءارى جۇمىس ىستەۋگە وڭتايلى جۇيەنى نەگە جاساماسقا؟ دەنساۋلىق ساقتاۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەلەرىن بىرىكتىرۋ كەرەك. بۇل جۇمىستى جەدەلدەتۋ قاجەت», دەپ تولىقتىردى مەملەكەت باسشىسى.
