ءبىلىم وشاعىنا جازۋشىنىڭ ەسىمى 2017 جىلى بەرىلگەن بولاتىن. سول كۇننەن باستاپ مىڭنان استام وقۋشى ءبىلىم الىپ جاتقان مەكتەپ ۇجىمى قالامگەردىڭ مۇراسىن جاڭعىرتىپ, جان-جاقتى ناسيحاتتاۋ ماقساتىندا جۇيەلى جۇمىس ىستەدى.
مۋزەيدىڭ اشىلۋ سالتاناتىندا وبلىس اكىمىنىڭ ورىنباسارى اينا ءمىسىرالىموۆا, جازۋشى-دراماتۋرگ جابال ەرعاليەۆ, زامانىندا ساكەن سەرىمەن كورشى تۇرعان ەل اعاسى مەيرام عيباديلوۆتار سەرىدەن قالعان ءسوز جاس ۇرپاقتى تاربيەلەۋگە ۇلكەن ىقپالىن تيگىزەتىندىگىنە ايرىقشا توقتالدى.
– بۇل يگى قادامنىڭ جاس ۇرپاققا تيگىزەر پايداسى وتە زور. جازۋشىنىڭ جۇردەك قالامىنان تۋىنداعان رۋحاني باي مۇرانى زەردەلەپ وقىپ, كوركەم ءسوزدىڭ قۇدىرەتىن ۇعاتىن بولادى. قازىر بىزدە «ساكەنتانۋ» فاكۋلتاتيۆى جۇرگىزىلەدى. الداعى ۋاقىتتا «ساكەن وقۋلارى» بايقاۋىن ۇيىمداستىرماقپىز, – دەيدى مەكتەپ ديرەكتورى بايان سارسەمباەۆا.
يماندى شارۋانىڭ وڭىنان ساباقتالۋىنا وبلىستىق مادەنيەت باسقارماسى مەن مالىك عابدۋللين مۋزەيىنىڭ ۇجىمى مول ۇلەس قوسقاندىعىن دا ايتا كەتۋىمىز كەرەك. مۋزەي ديرەكتورى قۇدايبەرلى مىرزابەك باستاعان ۇجىم مول ەڭبەك ءسىڭىرىپتى. مالىك عابدۋللين مۋزەيىنە جاڭعىرتۋ جۇمىستارى جۇرگىزىلگەندە, ءسال ەسكىرگەن بۇيىمداردى لاقتىرىپ تاستاماي, پايدالانۋ قاجەتتىگى تۋرالى وي تۋىنداسا كەرەك. وسىنداي ۇقىپتىلىقتىڭ ارقاسىندا 2019 جىلى قالا ىرگەسىندەگى كراسنويار اۋىلىندا حالىق اقىنى كوكەن شاكەەۆ مۋزەيى اشىلسا, بۇگىنگى كۇنى ءبىلىم وشاعىنىڭ قاسىندا قابىرعالى قالامگەرگە ارنالعان مۋزەي ۇيىمداستىرىلىپ وتىر.
باردى ۇقساتا ءبىلۋدىڭ ءبىر بەلگىسى وسى شىعار. اشىلۋ سالتاناتىندا «جاپانداعى جالعىز ءۇي» رومانى بويىنشا اسەرلى مونولوگ وقىلىپ, «زاماناي» كوركەم فيلمىنەن ءۇزىندى كورسەتىلدى. ساكەن سەرىنىڭ سەگىز قىرلى, ءبىر سىرلى ونەرپاز بولعاندىعىن دا جەرلەستەرى جاقسى بىلەدى. اۋديوتاسپادا ساقتالىپ قالعان جازۋشىنىڭ ءوز داۋىسىمەن سالعان ءانى جينالعان جۇرتتىڭ جۇرەگىن شىمىرلاتتى.
ۇلتتىڭ رۋحاني قۇندىلىعىنا ويىپ تۇرىپ ولجا سالعان قالامگەر مۇراسى جاس ۇرپاقپەن قايتا قاۋىشىپ, ماڭگىلىك عۇمىرى ساباقتالدى. ەل ءوز ەرلەرىن وسىلاي ارداقتاسا, جاراسىمدى ەمەس پە؟!
كوكشەتاۋ
