10-15 جىل بۇرىن ناۋقاستار كۇردەلى وپەراتسياعا جاتۋ ءۇشىن نۇر-سۇلتانعا, ءسال كەيىن وبلىس ورتالىعىنا سابىلاتىن. ونىڭ وزىندە الدىمەن ناۋقاستى پورتالعا قويادى. ارينە, جەدەل وپەراتسيا قاجەت بولماسا. سودان سوڭ ۋاقىتى كەلگەندە بۋما-بۋما قاعاز قۇشاقتاپ ءجۇرىپ, كابينەتتەن كابينەتكە كىرەدى. تاپسىراتىن تالداۋلارى دا از ەمەس. ۇزىن-سونار كەزەك تە بار ەدى.
قازىر مەديتسينا دامىپ كەلەدى. باسشىلار «بارماق باستى, كوز قىستىعا» جول بەرىپ قويماسا, اۋداندارعا دا كوڭىل ءبولىنىپ جاتىر. كوتەرمەاقىسى مەن باسپاناسىن بەرسە, الىس ەلدى-مەكەندەرگە بارۋدان اق حالاتتىلار دا تارتىنبايدى. سونىڭ ءبىر ايعاعى, بيىل 15 اقپاندا التاي اۋدانىنىڭ ورتالىق اۋرۋحاناسىندا انگيوگرافتىڭ جۇمىسى ىسكە قوسىلدى. قاراپايىم تىلمەن ايتساق, وسىدان بىلاي ناۋقاستارعا وپەراتسيالار سكالپەلسىز جاسالاتىن بولادى. ونى تاجىريبەلى مامان, دارىگەر-ينتەرۆەنت دامير مارات ۇلى جۇرگىزەدى.
ينتەرۆەنتسيالىق نەمەسە ەندوۆاسكۋليارلىق حيرۋرگيا – رەنتگەندىك ەندوۆاسكۋليارلىق ءادىسىن قولدانا وتىرىپ, ادام دەنەسىندەگى اقاۋدى سكالپەلسىز قالىپقا كەلتىرۋ. ياعني مەديتسينالىق قۇرالدى زاقىمدالعان مۇشەگە تامىرلار ارقىلى جەتكىزەدى. اۋداندىق اۋرۋحانا وپەراتسياعا قاجەتتى جوعارى تەحنولوگيالىق انگيوگرافيالىق جابدىقپەن قامتاماسىز ەتىلدى. ەندى ناۋقاستارعا وبلىس ورتالىعىنا بارۋدىڭ قاجەتى جوق, كوپتەگەن وپەراتسيالار اۋداندا-اق جاسالادى.
– كەز كەلگەن ينفاركت ەسكى تاسىلمەن ەمدەلمەسە, جۇرەك بۇلشىقەتىنىڭ نەكروزىنا, ولىمگە اكەلىپ سوعۋى مۇمكىن. قازىر بىزدە ستەنوكارديامەن اۋىراتىن 61 جاستاعى ناۋقاس ەم الىپ جاتىر. بۇل ءادىس ونىڭ يشەمياسى بار-جوعىن, بۋىندارىنىڭ جۇمىس ىستەۋىن, تامىرلاردىڭ تارىلعانىن انىقتاۋعا مۇمكىندىك بەرەدى. قاجەت بولسا, ستەنت ورناتىلادى. مامانداردى دايارلاۋ ءۇش جىلعا جۋىق ۋاقىت الادى. سوندىقتان اۋدانعا وبلىس ورتالىعىنان ارنايى دارىگەر-ينتەرۆەنتتى شاقىردىق, – دەيدى اۋداندىق اۋرۋحانانىڭ باس دارىگەرى ولجاس نۇركەنوۆ.
التاي اۋدانى ناۋرىزدان باستاپ بۇكىل جىلدىق كولەمدە جاسالاتىن وپەراتسيانى تولىعىمەن قامتۋدى جوسپارلاپ وتىر. ازىرشە, وپەراتسيا التاي تۇرعىندارىنا عانا جۇرگىزىلەدى. ال الداعى ۋاقىتتا انگيوگراف تولىق قۋاتتا جۇمىس ىستەي باستايدى.
شىعىس قازاقستان وبلىسى,
التاي اۋدانى
