ءيا, سول ءبىر ءتۇن, ياعني وتكەن جىلعى 2 مامىر, تاڭعى بەسكە جاقىنداعان كەزدەگى ۇرەيلى ساعاتتاردى ۇمىتا قويعان جوقپىز. كورشى ەلدەگى «ساردوبا» سۋ قويماسىنىڭ بوگەتى بۇزىلىپ, ماقتاارال اۋدانىنىڭ اۋىلدارىن سۋ باستى. ءبىزدىڭ اۋىلىمىزدا سۋ دەڭگەيى كوتەرىلدى. بالالارىمىزدىڭ اماندىعىن ويلاپ, اسىعىس جينالدىق. قۇجاتتارىمىزدى عانا الىپ, بالا-شاعامىزبەن ۇيدەن شىعىپ كەتتىك. كوپتەگەن اۋىلداسىم اتاكەنتتەگى ەۆاكۋاتسيالىق بەكەتتەرگە جايعاستى. ءبىز تۋىسقاندارىمىزدىڭ ءۇيىن پانالادىق. ءسويتىپ جەڭىس اۋىلىنداعى 130 ءۇيدىڭ 2 مىڭعا جۋىق تۇرعىنى قاۋىپسىز جەرگە كوشىرىلدى. اۋىلداعى كوپىردى, وبلىستىق ماڭىزى بار مىرزاكەنت – جەڭىس – جاڭا تۇرمىس اۆتوموبيل جولىن سۋ الىپ كەتۋى سالدارىنان كولىكتەر جۇرە الماي قالدى. كەيىنىرەك بارىپ اۋىلىمنىڭ سۋدىڭ استىندا قالعانىن كوردىم. ۇيلەرىمىز جارامسىز بولىپ قالدى. كىندىك قانىڭ تامىپ, ءومىر بويى تۇرعان جەرىڭنىڭ مۇنداي مۇشكىل ءحالىن كورۋ وتە اۋىر ەدى. ءبىر ساتتە ۇيىمىزدەن, مال-مۇلكىمىزدەن ايىرىلدىق تا قالدىق.
دەگەنمەن, ەل-جۇرت بار, ەل اعالارى بار, دالادا قالمايتىنىمىزدى سەزدىك. اعايىننىڭ, مەملەكەتتىڭ, وبلىس, اۋدان باسشىلارىنىڭ دەر كەزىندە قولداۋ كورسەتۋى ءبىزدى جىگەرلەندىرىپ, ەڭسەمىزدى تۇسىرمەدىك. بۇكىل ەلدىڭ قولداۋىن سەزىندىك. قاۋىپتىڭ الدىن الۋ, ەڭ باستىسى ادام ءومىرىن ساقتاۋ ماقساتىنداعى وبلىس اكىمى ومىرزاق شوكەەۆتىڭ, اۋدان اكىمى باقىت اسانوۆ پەن جاۋاپتى قىزمەتتەگىلەردىڭ جەدەل قيمىلى ءوز ناتيجەسىن بەردى دە. ەلىمىزدىڭ بۇكىل وبلىسى بىزگە كومەك قولىن سوزدى, ازىق-ت ۇلىك پەن گۋمانيتارلىق كومەك تيەلگەن كولىكتەر اعىلىپ كەلىپ جاتتى. كاسىپكەرلەر دە اپاتتان زارداپ شەككەندەرگە قولداۋ كورسەتۋدەن تىس قالمادى. ارنايى اشىلعان قورعا قاراپايىم تۇرعىنداردان, كاسىپكەرلەر مەن ۇيىمداردان, مەملەكەتتىك مەكەمەلەردەن تۇسكەن قارجى قانشاما؟! مەملەكەت باسشىسىنان باستاپ لاۋازىمدى قىزمەتتەگىلەر قيىن ساتتە حالىقتىڭ قاسىنان تابىلدى, جاناشىرلىعىن ءبىلدىردى.
التى ايدان كەيىن اۋدان ورتالىعى – مىرزاكەنت كەنتىنەن سالىنعان جاڭا ۇيىمىزگە جايعاسىپ الدىق. جاڭا شاعىن اۋداندا قالاداعىداي جاعداي جاسالعان. گاز, جارىق, ىستىق سۋ جانە تازا اۋىز سۋ بارلىعى كەلىپ تۇر. ءۇيىمىزدىڭ الدىندا ساياباق بار. 1200 ورىندىق مەكتەپتىڭ قۇرىلىسى ءجۇرىپ جاتىر. ودان بولەك, دارىگەرلىك امبۋلاتوريا مەن پوليتسيا بەكەتىنىڭ قۇرىلىسى اياقتالدى. مۇنداي جاعداي ءبىزدىڭ جەڭىس اۋىلىندا مۇلدە بولماعان ەدى. قازىر قۋانىپ وتىرمىز. وسىنشاما جاعدايدى جاساپ بەرگەن ەل حالقىنا, ەلباسى مەن پرەزيدەنتىمىزگە, جەرگىلىكتى باسشىلارعا راحمەت!
وسى ءبىر قيىندىق ءبىزدى بىرىكتىرە ءتۇستى. ىنتىماق, مەيىرىمدىلىك, جاناشىرلىقتىڭ قىمبات تا قاجەت قاسيەت ەكەنىن ۇعىنا تۇستىك. العىس – ىستىق ىقىلاس, جىلى جۇرەكپەن ايتىلعان ىزگى نيەتتى ءسوز. بىزگە قانشاما ازىق-ت ۇلىك, كيىم-كەشەك پەن گيگيەنالىق زاتتار جىبەرگەن حالقىمىزعا مىڭ العىس! قيىن كەزەڭدە بىرلىگى جاراسىپ, جۇمىلا كومەكتەسكەن ەلىمە باسىمدى ءيىپ راحمەت ايتامىن!
ءيا, ءومىردىڭ تىرەگى ادامگەرشىلىك پەن مەيىرىم ەكەن. كوپشىلىكتىڭ قولداۋىمەن باسىمىزداعى بۇلت سەيىلىپ, وتباسىما كۇلكى مەن شاتتىق قايتىپ ورالدى.
العىس ايتا ءبىلۋ دە – تاربيە. ادام بالاسىنىڭ بويىنداعى ىزگى قاسيەتتەردىڭ كورىنىسى, اتادان بالاعا بەرىلەتىن ۇلگى, ءارى ادەت, ءارى قاسيەت. وسى قاسيەتتىڭ ءمان-ماڭىزىن ۇرپاعىما ۇعىندىرىپ كەلەمىن. ولار دا جىلى جۇرەكتەن, رياسىز كوڭىلدەن شىعاتىن ادەمى سەزىمدەرىن, ياعني العىستارىن قيىن ساتتە قولۇشىن سوزعان بارشا جۇرتقا ايتۋدا.
دىنمۇحامەد ەرمەكوۆ,
ماقتاارال اۋدانىنىڭ تۇرعىنى
تۇركىستان وبلىسى
