نارىقتىڭ بۇل سالاسىنداعى جاعداي تۋرالى قازاقستان قارجىگەرلەر قاۋىمداستىعى زەرتتەۋ جاساعان. بىلتىر سەكتوردىڭ تازا ساقتاندىرۋ سىيلىق اقىلارى 12,1 پايىزعا ۇلعايىپ, 473,8 ملرد تەڭگەنى قۇرادى, ال تازا ساقتاندىرۋ تولەمدەرى 2,7 پايىزعا نەمەسە 101,2 ملرد تەڭگەگە دەيىن قىسقارعان. سىياقىنىڭ ءوسۋى سەكتور تابىسىنىڭ ەسەلەپ ارتۋىنا سەرپىن بەردى. ناتيجەسىندە سەكتور تابىسى 458,1 ملرد تەڭگەگە دەيىن كوبەيگەن. ساقتاندىرۋ جانە ينۆەستيتسيالىق قىزمەتتەر اسەرى عانا ەمەس, ساقتاندىرۋ تولەمدەرىنىڭ ازايۋى دا (ونىڭ ىشىندە كارانتين شەكتەۋلەرىنە بايلانىستى جانە ساقتاندىرۋ تولەمدەرىنىڭ تومەندەۋى سەبەپتى) سەكتور تابىسىنىڭ وسە تۇسۋىنە ىقپالىن تيگىزگەن. بۇل رەتتە تازا پايدا – 114,2 ملرد تەڭگە. 2019 جىلمەن سالىستىرعاندا 45,7 پايىزعا جوعارى. ينۆەستيتسيالىق تابىستىڭ 76,8 ملرد-تان 128,0 ملرد تەڭگەگە دەيىن ۇلعايۋى سەكتور پايداسىنىڭ وسۋىنە ىقپالىن تيگىزگەن.
«سەكتور اكتيۆتەرىنىڭ قۇرىلىمىندا ەڭ كوپ ۇلەستى باعالى قاعازدار الادى (بارلىق اكتيۆتەردىڭ 69 پايىزى). باعالى قاعازدار پورتفەلىنىڭ ءوسۋى (+33 پايىز) جانە ونىڭ وڭ ۆاليۋتالىق قايتا باعالانۋى سەكتوردىڭ ينۆەستيتسيالىق قىزمەتتەن تۇسەتىن كىرىسىنىڭ ۇلعايۋىنا (+67 پايىز) الىپ كەلدى» دەلىنگەن قاۋىمداستىق اقپارىندا.
ءبىر قىزىعى قىزمەتتەردىڭ جاپپاي ونلاين فورماتقا كوشۋى ءدال وسى ساقتاندىرۋ سەكتورىنا وڭ اسەرىن تيگىزىپتى.
