ايماقتار • 24 اقپان، 2021

سۋ تاپشىلىعى ماسەلەلەرى تالقىلاندى

49 رەت كورسەتىلدى

بۇگىن قىزىلوردا وبلىسىنا ەكولوگيا، گەولوگيا جانە تابيعي رەسۋرستار ۆيتسە-ءمينيسترى سەرىك قوجانيازوۆ، سۋ رەسۋرستارى كوميتەتىنىڭ توراعاسى نۇرلان الدامجاروۆ كەلدى، دەپ حابارلايدى Egemen.kz

ساپار اياسىندا ۆيتسە-مينيستر مەن كوميتەت توراعاسى وبلىس اكىمى گۇلشارا ابدىقالىقوۆامەن كەزدەسىپ،  سۋ شارۋاشىلىعىنداعى وزەكتى ماسەلەلەردى تالقىلادى.

وسىدان كەيىن وبلىستىڭ ۆەگەتاتسيالىق كەزەڭگە ارنالعان دايىندىق جۇمىستارىن تالقىلاعان ءماجىلىس ءوتتى. جيىنعا مەملەكەتتىك ورگاندار وكىلدەرىمەن قاتار وبلىستاعى ەگىن شارۋاشىلىعىمەن اينالىساتىن ءىرى شارۋاشىلىق جەتەكشىلەرى دە قاتىستى.

ماڭىزدى كەزەڭگە ازىرلىكتى تالقىلاعان باسقوسۋدا وبلىستىق اۋىلشارۋاشىلىعى باسقارماسىنىڭ باسشىسى شاحماردان قويشىباەۆ، ارال-سىرداريا باسسەيندىك ينسپەكتسياسىنىڭ باسشىسى سەيىلبەك نۇرىمبەتوۆ، «قازسۋشار» رمك قىزىلوردا فيليالىنىڭ ديرەكتورى حاميت بەيىمبەتوۆ حابارلاما جاسادى.

سوڭعى 3-4 جىل بەدەرىندە وبلىس ديقاندارى سۋ تاپشىلىعىنىڭ زاردابىن تارتىپ كەلەدى.  بيىل وسىعان بايلانىستى سۋدى كوپ قاجەت ەتەتىن كۇرىش ەگىستىگىنىڭ كولەمى 5 مىڭ گەكتارعا ازايتىلدى. بىراق شاردارا سۋ قويماسى مەن كوكساراي سۋ رەتتەگىشىندەگى احۋالدى تۇراقتى باقىلاپ وتىرعان ماماندار جازدا سۋ تاپشىلىعى تاعى قايتالانۋى مۇمكىن ەكەندىگىن ايتادى. ويتكەنى شاردارادان جوعارى تۇرعان توقتاعۇل، ءاندىجان، شارباق سۋ قويمالارىنداعى جينالعان كولەم كوڭىل كونشىتپەيدى. اۋا رايىن بولجاۋشىلار مالىمەتىنشە دە كوكتەمدە جاۋىن-شاشىن جىلداعىدان از بولاتىن ءتۇرى بار.

ماجىلىسكە سەلەكتور ارقىلى قاتىسىپ وتىرعان اۋداندار باسشىلارى دا جەرگىلىكتى جەردەگى ماسەلەلەردى ايتتى. مىسالى، جاڭاقورعان اۋدانىندا توسپا جوق. داريا ارناسى تومەندەگەن جىلدارى بۇكىل اۋداندى سۋلاندىرىپ وتىرعان كەلىنتوبە كانالىنا سۋ كوتەرىلمەي قالادى. قازالى اۋدانىنا قاي ارنامەن سۋ بەرىلەتىندىگى ءالى ناقتىلانباعان.

جيىندا وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى باۋىرجان شامەنوۆ سوڭعى 3 جىلدا ەكولوگيالىق مۇقتاجدىقتارعا ارنالعان سۋدىڭ ەگىنگە جۇمسالىپ كەلە جاتقانىن ايتىپ ءوتتى. وسىنىڭ سالدارىنان بىلتىر ارالدان كەيىنگى ءىرى سۋ ايدىنى قامباش كولى تارتىلىپ، جاعالاۋىنان 250 مەترگە دەيىن شەگىنىپ كەتكەن. ۆيتسە-مينيستر ايتىلعان ماسەلەلەردىڭ بارلىعىن حاتتاماعا ەنگىزۋدى تاپسىردى. وسىعان بايلانىستى مينيسترلىك ءىس-شارالار قابىلدايدى. ولاردىڭ ورىندالۋىنا وسى ايماققا ارنايى بولىنگەن سۋ رەسۋرستارى كوميتەتىنىڭ وكىلى باقىلاۋ جاسايدى.

وسى كۇنى ەكولوگيا، گەولوگيا جانە تابيعي رەسۋرستار ۆيتسە-ءمينيسترى مەن سۋ رەسۋرستارى كوميتەتىنىڭ توراعاسى ايماقتاعى سۋ شارۋاشىلىعى نىساندارىن ارالادى.  

سوڭعى جاڭالىقتار

ۇقساس جاڭالىقتار