قازاقستاندا جۇرگىزۋشى كۋالىگىن ساتىپ الۋدىڭ زاڭدى بولۋى مۇمكىن ەمەس. قر قىلمىستىق كودەكسىنىڭ 383-بابىنا سايكەس, رەسمي قۇجاتتاردى ساتىپ الۋ نەمەسە ساتۋ ءۇشىن 120 اەك (2021 جىلى 350 040 تەڭگە – اۆت.) دەيىنگى مولشەردە ايىپپۇل سالۋ نەمەسە 30 تاۋلىككە دەيىنگى مەرزىمگە قاماۋعا الۋ نەمەسە قوعامدىق جۇمىستارعا تارتۋ جازاسى قاراستىرىلعان.
جۇرگىزۋشى كۋالىگىن زاڭدى تۇردە اۆتوكولىك جۇرگىزۋ ەرەجەلەرى مەن تەحنيكاسىن ۇيرەنىپ, تەوريالىق جانە پراكتيكالىق بولىمدەردەن تۇراتىن ەمتيحان تاپسىرۋ ارقىلى الۋعا بولادى. سودان كەيىن مامانداندىرىلعان حقكو-عا قۇجاتتار پاكەتىن تاپسىرۋ جانە 1,25 اەك (3,646 تەڭگە) مولشەرىندە مەملەكەتتىك باج تولەۋ قاجەت.
الايدا, الاياقتار كولىك جۇرگىزۋ ەمتيحانىن وقىعىسى كەلمەيتىن ادامداردىڭ ارقاسىندا «اقشا تابۋ» مۇمكىندىگىن پايدالانىپ قالماق. ۇستىمىزدەگى جىلدىڭ تامىز ايىندا ءبىز Telegram مەسسەندجەرىندە 60 000 تەڭگەگە جۇرگىزۋشى كۋالىگىن دايىنداۋ تۋرالى ۇسىنىستار بولعانى جايلى جازعان بولاتىنبىز.
قازىرگى جارناما ەسكى جارنامالارعا قاتتى ۇقسايدى. قازاقستاندىقتارعا 2-3 كۇن ىشىندە «زاڭدى» قۇجاتتار بەرىلەدى ەكەن. تەك بۇل جولى ۇسىنىستى قابىلداعان كليەنتتەردىڭ وڭ پىكىرلەرى جوق. ء(بىز انىقتاعانداي, ولار جالعان بولعان).
الاياقتاردىڭ جالعان قۇجاتتارعا ەش قاتىسى بولماۋى دا مۇمكىن, ولار الەۋەتتى ساتىپ الۋشىلاردان «الدىن الا تولەم» العاننان كەيىن ولاردىڭ نومەرلەرىن بۇعاتتاپ, قارىم-قاتىناستى توقتاتادى.
ال قۇجات دايىن بولعان جاعدايدا, كليەنت 60 000 تەڭگەدەن ارتىق شىعىنعا باتۋى مۇمكىن. قر قك 385-بابىنا سايكەس, كورىنەۋ جالعان قۇجاتتى پايدالانعانى ءۇشىن 160 اەك (466 720 تەڭگە) دەيىن ايىپپۇل سالۋ نەمەسە 40 تاۋلىككە دەيىنگى مەرزىمگە قاماۋعا الۋ جازاسى قاراستىرىلعان.
