ۆيولونچەلدەن شىققان اۋەنمەن كسەنيا پانكراتوۆا سىبەنىڭ بەتىندە سىرعانادى. ادەمى كورىنىس. ەلىمىزدىڭ كورىكتى جەرلەرىن اۋەزدى اۋەنمەن, مىڭ بۇرالعان بيمەن تانىتۋدى ماقسات ەتكەن ولاردىڭ ءالى دە تىڭ جوبالارى بار كورىنەدى.
– ابايدىڭ تۋعان جەرىندە «كوزىمنىڭ قاراسىن» ورىندادىم. ەرتىستەگى كوپىردىڭ بيىگىنە شىعىپ الىپ ورىنداعان سوڭ با, ەلدىڭ نازارىن بىردەن اۋداردى. سودان كەيىن سىبە كولىنىڭ كوركىن كورسەتەيىك دەپ مۇز بەتىندە «اق باياندى» ورىندادىم. بولاشاققا دا وسىنداي جوبا-جوسپارلار بار, – دەدى جاس ونەرپاز باعجان وكتيابر.
قازاقتىڭ اندەرىنە جازىلعان اۋەندەردى قازاقتىڭ كورىكتى جەرىندە ورىنداۋدىڭ دا ماقساتى بار. ياعني قازاقتاي ەلدى, كەڭ بايتاق جەردى باعجاننىڭ اۋەنى, كسەنيانىڭ ءبيى ارقىلى الەمگە تانىتۋ. بۇل جوبانى وبلىستىڭ تۋريستىك اقپاراتتىق ورتالىعىنىڭ ماماندارى ۇيىمداستىرىپ, ۆيولونەچەليست باعجان وكتيابر مەن مانەرلەپ سىرعاناۋشى كسەنيا پانكراتوۆانى الماتىدان ارنايى شاقىرتقان.
كوپىردىڭ بيىگى مەن مۇز ايدىنىنداعى كورىنىس بەينەگە ءتۇسىرىلىپ, الەۋمەتتىك جەلىلەردە تارادى. كورگەندەر جىلى لەبىزىن ءبىلدىردى. الايدا كسەنيا پانكراتوۆانىڭ ايتۋىنشا, كۇن رايى بۇزىلىپ كەتپەگەن جاعدايدا بۇدان دا كەرەمەت كورىنىس بولار ەدى.
– قىمباتتى جەرلەستەرىم, وسىنداي سۇلۋ تابيعاتتى كوزدىڭ قاراشىعىنداي ساقتاۋىمىز كەرەك. ءبىزدىڭ ونەرىمىزگە قۇرمەت ءبىلدىرىپ, شاقىرىپ جاتقان شىعىس قازاقستاننىڭ حالقىنا راحمەت, – دەدى ك. پانكراتوۆا.
ايتقانىنداي, مەيماندار كەلگەن كۇنى كوگىلدىر مۇزدىڭ بەتىن اپپاق قار باسىپ قالعان. سوندىقتان دا, مۇزدىڭ بەلگىلى ءبىر اۋماعىن قولمەن تازالاۋعا تۋرا كەلدى. ازىرشە, بۇل ۇلكەن جوبانىڭ باسى.
شىعىس قازاقستان وبلىسى
