وبلىس اكىمىنىڭ ورىنباسارى باقىتگۇل حامەنوۆانىڭ مالىمەتىنشە, اتىراۋعا ۆاكتسينالاۋ باستالاردان ءبىر كۇن بۇرىن «سپۋتنيك V» ۆاكتسيناسىنىڭ 1000 دوزاسى جەتكىزىلدى. قازىر ۆاكتسينا اتىراۋ قالاسىنداعى 16, اۋداندارداعى 8 ارنايى اشىلعان ورىندا سالىنىپ جاتىر.
«دارىگەرلەرمەن بىرگە, كوروناۆيرۋسقا قارسى ۆاكتسينانىڭ ەكىنشى كومپونەنتىن الدىم. ۆاكتسيناتسيا ازداپ اۋىرسىنۋمەن قاتار ءجۇردى. بىراق ءبىرىنشى كەزەڭنەن كەيىن جاناما اسەرى بولعان جوق. ۆاكتسينا الۋ – «Covid-19» قاۋىپتى ۆيرۋسىن جۇقتىرماۋدىڭ باستى جولى» دەيدى باقىتگۇل حامەنوۆا.
كوروناۆيرۋسقا قارسى «سپۋتنيك V» ۆاكتسيناسىن سالدىرعان 73 جاستاعى حيرۋرگ مارات ەسجانوۆتىڭ ايتۋىنشا, جاناما اسەرى بايقالماپتى.
«مەن دە 1 اقپاندا ارىپتەستەرىممەن بىرگە كوروناۆيرۋسقا قارسى ۆاكتسينانىڭ ءبىرىنشى كەزەڭىن الدىم. دەنە قىزۋى, السىزدىك, باس اينالۋ سەكىلدى اسەرلەر, باسقا دا اسقىنۋلار بولعان جوق. ۆاكتسيناتسيادان كەيىن 10-15 مينۋت دارىگەرلەر باقىلاۋىندا بولدىق. كەيىن كۇندەلىكتى جۇمىسىمىزعا كىرىستىك» دەيدى مارات ەسجانوۆ.
