اقتوبە وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «ميگرانت» جەدەل-ىزدەستىرۋ شاراسىن وتكىزدى. «سامارا-شىمكەنت» تاس جولىنىڭ 972 شاقىرىمىندا كولىك قۇرالىن سانكتسياسىز ءتىنتىپ, بىشكەك قالاسىندا تۇراتىن قىرعىزستاننىڭ 44 جاستاعى ازاماتى ايداپ كەلە جاتقان جۇك كولىگىنەن جالپى سالماعى 22 كەلىدەن اساتىن «ماريحۋانا» تابىلىپ, تاركىلەندى.
اقتوبە وبلىسىنىڭ پوليتسيا دەپارتامەنتى قىلمىستىق كودەكستىڭ 296-بابىنىڭ 4-بولىگىنىڭ سانكتسياسىنا سايكەس (اسا ءىرى مولشەردە ەسىرتكى زاتتارىن زاڭسىز ساقتاۋ) تەرگەۋدى باستادى. ەسىرتكى قۇرالدارىن, پسيحوتروپتىق زاتتاردى, سول تەكتەستەردى وتكىزۋ ماقساتىنسىز زاڭسىز دايىنداۋ, وڭدەۋ, ساتىپ الۋ, ساقتاۋ, تاسىمالداۋعا ءۇش جىلدان جەتى جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعانىن ەسكە سالادى.
