اتالعان تۋرنير قاتەرلى ىندەتكە بايلانىستى ەلىمىزدە جاريالانعان توتەنشە جاعداي كەزىندە ءوزىنىڭ قىزمەتتىك مىندەتىن لايىقتى ورىنداپ, ازاماتتاردىڭ تىنىشتىعى مەن قاۋىپسىزدىگىن قامتاماسىز ەتۋ جولىندا قاپىدا قازا تاپقان پوليتسيا قىزمەتكەرى, ءىىى دارەجەلى «ايبىن» وردەنىنىڭ يەگەرى ابدىقانوۆ داستان ماراتجان ۇلىنىڭ ەرلىگىن جاس ۇرپاققا ناسيحاتتاۋ جانە ەسكە الۋ ماقساتىندا ۇيىمداستىرىلىپ وتىر.
باتىر ەسىمىن ۇلىقتاعان اشىق بىرىنشىلىك 21 اقپان كۇنى نۇر-سۇلتان ۋاقىتىمەن 17:00-دە playok.com پلاتفورماسىندا باستالعان بولاتىن. تۋرنيرگە ەلىمىزدىڭ تۇكپىر-تۇكپىرىنەن 247 سپورتشى قاتىستى. جارىستىڭ سايتتاعى ناتيجەسىنە سايكەس 1-5 ورىن العان سپورتشىلار جارىس دەمەۋشىسىنىڭ ارنايى قارجىلاي سىيلىقتارىمەن ماراپاتتالدى.
زياتكەرلەردىڭ شەبەرلىگىن شىڭداعان باسەكەدە قىزىلوردالىق دامير احمەتوۆ 1-ورىندى جەڭىپ السا, اقتوبەلىك مەدەت حۋساينوۆ 2- ورىنعا يە بولدى. ال جۇلدەدى 3-ورىنعا پاۆلودارلىق باۋىرجان ابىلايحانوۆ تابان تىرەدى. تاعى ءبىر قىزىلوردالىق ءبىرجان ەلەۋسىنوۆ 4-ورىننان كورىنسە, ۇزدىك بەستىكتى اقتوبەلىك گۇلجانات الدابەرگەنوۆا تۇيىندەدى.
جارىس ءالى دە جالعاسىپ جاتىر. 23 اقپان كۇنى 1-5 سىنىپ وقۋشىلارى (ۇلدار,قىزدار) اراسىندا, 26 اقپان كۇنى 6-8 سىنىپ وقۋشىلارى (ۇلدار, قىزدار) جانە 27 اقپان كۇنى 9-11 سىنىپ وقۋشىلارى (ۇلدار, قىزدار) اراسىندا ساعات 10:00-16:00 ارالىعىندا الماتى قالالىق تۋرنير وتەدى.
وففلاين جارىستىڭ ناتيجەسىنە سايكەس 18 ويىنشى: ءى ورىننان - 3 جۇلدە, ءىى ورىننان - 3 جۇلدە, ءىىى ورىننان - 3 جۇلدە, ء ىV ورىننان - 3 جۇلدە, V ورىننان - 3 جۇلدە, ءVى ورىننان - 3 جۇلدە جارىس دەمەۋشىلەرى تاعايىنداعان قارجىلاي سىيلىقتارىمەن, مەدالدارىمەن جانە ارنايى ماقتاۋ قاعازدارىمەن ماراپاتتالادى. ماراپاتتاۋ ءراسىمى الماتى قالاسى «Alatau Creative Hub» عيماراتىندا 27 اقپان كۇنى 17:00 دە وتەدى.
تاۋەلسىزدىك العان جىلداردان بەرى ءبىر عانا الماتىنىڭ وزىندە 70-تەن استام پوليتسيا قىزمەتكەرى جۇمىس بابىندا قازا تاۋىپتى. ولاردىڭ ەرەن ەرلىگى مەن انتىنا ادالدىعى ۇرپاققا ۇلگى بولىپ قالا بەرمەك. اۋىر جەلدىڭ وتىندە ءجۇرىپ ارمانىنان الىستاپ قالعان داستان ابدىقانوۆتىڭ ەسىمى دە ەل ەسىندە.
