«Petro Retail» جشس-ءنىڭ «Qazaq oil» كەشەنى قالا ىرگەسىندەگى بىرقازان ەلدى-مەكەنىنىڭ تۇسىنان سالىنعان. جاڭا بەكەتتىڭ اشىلۋىنا قالا اكىمىنىڭ مىندەتىن اتقارۋشى بەكتاس نۇريدينوۆ قاتىسىپ, كەشەننىڭ جۇمىسىنا ساتتىلىك تىلەدى.
«جالپى كاسىپكەرلىكتى دامىتۋعا قالا اكىمدىگى تاراپىنان ۇلكەن قولداۋ كورسەتىلىپ كەلەدى. بۇگىنگى كەشەننىڭ اشىلۋى وسىنىڭ ءبىر كورىنىسى. كاسىپكەرگە قالا اكىمدىگىنىڭ كورسەتكەن قولداۋىنىڭ ارقاسىندا كەشەن سالۋعا جەر ءبولىنىپ, قالاعا قوسىمشا ينۆەستيتسيا تارتىلدى. قازىرگىدەي قيىن كەزەڭگە قاراماي كاسىپ اشىپ, تۇرعىندار جۇمىسپەن قامتىلىپ, قالامىزدا كاسىپكەرلىك نىساندارىنىڭ سانى ارتىپ كەلەدى» - دەگەن بەكتاس بالعاباي ۇلى قالا اكىمدىگى كاسىپ باستاۋعا نيەتتى ازاماتتارعا قاشان دا قولداۋ بىلدىرەتىندىگىن ايتتى.
جاڭا كەشەندە كەلۋشىلەر ءۇشىن بولشەك ساۋدا پۋنكتى مەن تاماقتانۋ ورنى قاراستىرىلعان. ءبىر تاۋلىكتە 700 كولىككە دەيىن قىزمەت كورسەتە الاتىن بەكەتتە 23 ادام جۇمىسپەن قامتىلعان. نىسانعا «Petro Retail» جشس-ءنىڭ 700 ملن تەڭگە جۇمساعان.
«Petro Retail» جشس وكىلى ايدار بالعوجاەۆتىڭ ايتۋىنشا رەسپۋبليكا بويىنشا 400-گە جۋىق «Qazaq oil» بەكەتى حالىققا قىزمەت ەتەدى. بيىل قىزىلوردا وبلىسىنىڭ ارال, قارماقشى اۋداندارىندا جانە قىزىلوردا قالاسىندا 4 نىسان ءوز جۇمىسىن باستاعان. سونىمەن قاتار جاقىن كۇندەرى 98 ماركالى بەنزين وتىنىن قالا نارىعىندا العاش بولىپ ساتىلىمعا شاعىراۋدى جوسپارلاپ وتىرعاندىقتارىن دا اتاپ ءوتتى.
ايتا كەتەيىك, «قازاۆتوجول» اق-نىڭ وڭىرلىك فيليالى مەن جەرگىلىكتى اتقارۋشى بيلىك كەلىسىمىنە سايكەس «باتىس ەۋروپا-باتىس قىتاي» حالىقارالىق كولىك ءدالىزىنىڭ بويىندا 41 جول بويى سەرۆيستىك نىسان سالىناتىن جەر بەلگىلەنگەن. ونىڭ ىشىندە 10 جوبا قالا ۇلەسىندە بولسا, قازىر 6 جوبا ىسكە قوسىلدى. بۇگىن جۇمىسىن باستاعان «Qazaq oil» كەشەنى جەتىنشى جوبا بولىپ وتىر.
