ايماقتار • 22 اقپان، 2021

شىمكەنتتە قىتايدىڭ 62 ازاماتى جۇمىسقا زاڭسىز قابىلدانعان

9 رەت كورسەتىلدى

ىشكى ىستەر مينيسترلىگى وسى جىلدىڭ اقپان ايىندا «ميگرانت» جەدەل الدىن الۋ ءىس-شاراسىنىڭ ەكى كەزەڭىن وتكىزدى، دەپ حابارلايدى Egemen.kz

پاندەميا كەزىندە قازاقستان اۋماعىندا بولعان مىڭداعان شەتەلدىكتەر ەلدەن شىعا الماي قالعان. ءىىم كوشى-قون قىزمەتىنىڭ، شەت مەملەكەتتەر وكىلدىكتەرىنىڭ جانە كوشى-قون جونىندەگى حالىقارالىق ۇيىمنىڭ كومەگىمەن بۇل ادامداردىڭ قۇجاتتارىن رەسىمدەۋگە كومەك كورسەتىلدى.

«جىل باسىنان بەرى پوليتسيا قىزمەتكەرلەرى 133 مىڭ زاڭسىز ميگرانتتىڭ ەلدەن ءوز ەركىمەن كەتۋىنە كومەكتەستى. تولقۇجاتىنىڭ قولدانۋ مەرزىمى وتكەن 675 شەتەلدىك قايتىپ ورالۋعا ارنالعان كۋالىك الدى»، دەپ اتاپ ءوتتى ءىىم باسشىسى ەرلان تۇرعىمباەۆ.

سونىمەن قاتار كوشى-قون زاڭناماسىن قاساقانا بۇزۋ فاكتىلەرى دە انىقتالعان. جەدەل-پروفيلاكتيكالىق ءىس-شارا بارىسىندا 582 جۇمىس بەرۋشى شەتەلدىك جۇمىس كۇشىن ءتيىستى رۇقساتسىز پايدالانعانى ءۇشىن جاۋاپكەرشىلىككە تارتىلدى. زاڭسىز كوشى-قوندى ۇيىمداستىرۋ فاكتىلەرى بويىنشا 28 قىلمىستىق ءىس تىركەلدى. ماسەلەن، شىمكەنت قالاسىندا وزبەكستاننىڭ 70 ازاماتى مەن قىتايدىڭ 62 ازاماتىن جۇمىسقا زاڭسىز قابىلداعان بىرقاتار زاڭدى تۇلعا انىقتالدى. قازىرگى ۋاقىتتا زاڭسىز كوشى-قوندى ۇيىمداستىرۋ فاكتىسى بويىنشا سوتقا دەيىنگى تەرگەۋ باستالدى.

سونداي-اق جەدەل-پروفيلاكتيكالىق ءىس-شارا بارىسىندا ىزدەۋدە جۇرگەن 140 قىلمىسكەر ۇستالدى. ولاردىڭ ىشىندە 129 قازاقستاندىق، تمد ەلدەرىنىڭ 10 ازاماتى، سونداي-اق، سەكسۋالدىق سيپاتتاعى زورلىق-زومبىلىق ارەكەتتەرى جانە بوپسالاۋ فاكتىسى ءۇشىن حالىقارالىق ىزدەۋدە جۇرگەن تۇركيا ازاماتى بار.

«قازاقستاندىقتار عانا ەمەس، شەتەلدىكتەر دە وزدەرىن قاۋىپسىز سەزىنۋى ءتيىس. بۇل – پوليتسيانىڭ نەگىزگى مىندەتى. سونىمەن بىرگە، ءبىزدىڭ ەلدە ۋاقىتشا جۇرگەن قوناقتار زاڭداردى قۇرمەتتەۋگە جانە ەلدە بولۋ ەرەجەلەرىن بۇزباۋعا مىندەتتى. سوندىقتان كوشى-قون قىزمەتىنىڭ بۇل باعىتتاعى جۇمىسى تۇراقتى تۇردە جۇرگىزىلۋى ءتيىس، دەپ اتاپ ءوتتى مينيستر ەرلان تۇرعىمباەۆ.

كوشى-قون قىزمەتى كوميتەتىنىڭ مالىمەتىنشە، كوشى-قون زاڭناماسىن قاساقانا بۇزۋشىلارعا قاتىستى زاڭسىز يمميگرانتتاردى شىعارۋعا 969 سوت شەشىمى شىعارىلعان.

سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • كەشە

ۇقساس جاڭالىقتار