وبلىس ورتالىعىنان تاياق تاستام جەردەگى ۇلان اۋدانىنىڭ ەكونوميكاسى ۋاقىت وتكەن سايىن دامىپ, الەۋمەتتىك عيماراتتار بوي كوتەرۋدە. جاقىندا, تۇڭعىش پرەزيدەنت كۇنى اۋدان ورتالىعى – قاسىم قايسەنوۆ اتىنداعى كەنتتە اۋدان اكىمى ايدوس سادىقوۆ جۇرتشىلىقپەن كەزدەستى, ورتالىق الاڭدا جارمەڭكە ءوتىپ, ەت, ءسۇت ونىمدەرى ارزان باعامەن ساۋدالاندى.
وبلىس ورتالىعىنان تاياق تاستام جەردەگى ۇلان اۋدانىنىڭ ەكونوميكاسى ۋاقىت وتكەن سايىن دامىپ, الەۋمەتتىك عيماراتتار بوي كوتەرۋدە. جاقىندا, تۇڭعىش پرەزيدەنت كۇنى اۋدان ورتالىعى – قاسىم قايسەنوۆ اتىنداعى كەنتتە اۋدان اكىمى ايدوس سادىقوۆ جۇرتشىلىقپەن كەزدەستى, ورتالىق الاڭدا جارمەڭكە ءوتىپ, ەت, ءسۇت ونىمدەرى ارزان باعامەن ساۋدالاندى. كەزدەسۋدە ايدوس قابدۋاحيت ۇلى جىل باسىنان بەرى 25 ميلليارد تەڭگەنىڭ ونەركاسىپ جانە اۋىل شارۋاشىلىعى ونىمدەرىنىڭ شىعارىلعانىن ايتا كەلىپ, جاقىندا «قولجەتىمدى باسپانا» باعدارلاماسى بويىنشا 80 پاتەرلىك تۇرعىن ءۇيدىڭ ىسكە قوسىلاتىنىن, ىلە-شالا 100 پاتەرلىك تۇرعىن ءۇيدىڭ سالىنىپ بىتەتىنىنەن حاباردار ەتتى. ۋكراينكا اۋىلىندا 1000 باستىق بورداقىلاۋ الاڭى, ايىرتاۋ اۋىلىندا دا وسىنداي الاڭ ىسكە قوسىلاتىنىن ايتا كەتتى.
تۇستەن كەيىن ايىرتاۋ اۋىلدىق وكرۋگىنىڭ زاۆيدنوە اۋىلىندا ەكى الەۋمەتتىك نىساننىڭ سالتاناتتى اشىلۋى بولىپ ءوتتى. وعان اۋىل, اۋدان ارداگەرلەرى قاتىستى. گۇلميرا نۇرحانوۆا شاعىن نەسيە الىپ, الەۋمەتتىك دۇكەن اشىپتى. ونداعى باعا ارزان, ماسەلەن, ءبىر بولكە نان 40 تەڭگە, ءبىر كيلو جوعارى سورتتى ۇن 56 تەڭگە تۇرادى. سونداي-اق, شەكىلدەۋىك مايى, قانت, باسقا دا تاۋارلار قالا دۇكەندەرىندەگى باعامەن بىردەي. اۋىل تۇرعىندارى قۋانىشتى. ەندى كەرەگىمىزدى وبلىس ورتالىعىنا بارماي-اق, الەۋمەتتىك دۇكەننەن ساتىپ الاتىن بولدىق, دەيدى ولار.
اۋدان اكىمى ايدوس سادىقوۆ الەۋمەتتىك دۇكەننىڭ اشىلۋىمەن قۇتتىقتاپ بولعان سوڭ دۇكەنگە كىردى. شاعىن, جيناقى دۇكەندە قاجەتتى زاتتاردىڭ بارلىعى بار.
بۇدان كەيىن جينالعاندار 80 ورىندىق ءدامحانانىڭ اشىلۋىنا قاتىستى. ەرلى-زايىپتى جۇمابەك, باقىتجان راعىزباەۆتار «دامۋ» باعدارلاماسى بويىنشا 1 ميلليون تەڭگە نەسيە الىپ, ءدامحانانى ىسكە قوسقان. ونىڭ اشىلۋ سالتاناتىندا اۋدان اكىمى, ارداگەرلەر نادەجدا فەدوروۆا, زيادا ۋاليەۆا ءسوز الىپ, بۇرىندارى اۋىلدا ءدامحانانىڭ بولماۋىنان توي-تومالاق جاساۋدىڭ قيىندىق تۋعىزىپ كەلگەنىن ايتىپ, ەندى وسى ماسەلەنىڭ شەشىلگەندىگىنە ريزاشىلىعىن ءبىلدىردى.
ايتا كەتۋ كەرەك, مۇنىڭ الدىندا اۋىلدىڭ تاعى ءبىر كاسىپكەرى سۇلۋحان اعزاموۆا 70 ورىندىق جەكەمەنشىك بالاباقشا سالىپ بەرگەن ەكەن. بالاباقشاسى, الەۋمەتتىك دۇكەنى مەن ءدامحاناسى بار اۋىلدان باسقالار ۇلگى الىپ جاتسا, قانەكي.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى,
ۇلان اۋدانى.
سۋرەتتە: زاۆيدنوە اۋىلىنداعى الەۋمەتتىك دۇكەننىڭ اشىلۋ سالتاناتى.
