قازىرگى تاڭدا جاڭا نىساننىڭ جوبالاۋ قۇجاتتارى دايىن تۇر. جاقىن ارادا قۇرىلىس جۇمىستارى باستالادى. عيمارات ءتورت بولمەدەن تۇرادى, ياعني اكىمشىلىك, مۋزەي ەكسپوزيتسياسى, قوناق بولمەسى جانە شارۋاشىلىق ورىندارى قاراستىرىلعان. سونداي-اق بۇل ورتالىقتا ساياحاتشىلار مەن زياراتشىلارعا قىزمەت كورسەتۋدىڭ ارنايى تەتىگى دە قاراستىرىلعان.
«ساپار ورتالىعىنىڭ سالىنۋى «ازىرەت سۇلتان» مەملەكەتتىك تاريحي-مادەني قورىق-مۋزەيىن دامىتۋ, قورىق-مۋزەيگە قاراستى تاريحي-مادەني ەسكەرتكىشتەردى قايتا جاڭعىرتۋ جۇمىستارى قاتارىنا جاتادى. بۇل ءىس ءوز ورايىندا ەلىمىزدەگى تۋريزم سالاسىن دامىتۋعا زور سەرپىلىس بەرەرى انىق», دەيدى مەكەمە باسشىسى نۇربولات احمەتجانوۆ.
قولدا بار تاريحي دەرەكتەر مەن اڭىز-افسانالارعا سۇيەنسەك, ءجۇسىپ اتا قوجا احمەت ءياساۋيدىڭ زامانداسى ءارى شاكىرتى بولعاندىعى ايتىلادى. ونىڭ كەسەنەسى تۇركىستان قالاسىنان 25 شاقىرىم جەردەگى ەسكى يقان ەلدى مەكەنىندە ورنالاسقان. جەرگىلىكتى ماڭىزى بار بۇل نىسانعا 2005 جىلى ارحەولوگيالىق زەرتتەۋلەر جۇرگىزىلىپ, قۇرىلىستىڭ ىرگەسى حV عاسىردا قالانعاندىعى انىقتالعان كورىنەدى.
