كۇنى كەشە الماتىدا گازبەن جۇرەتىن 150 جاڭا اۆتوبۋس ساتىپ الىندى. قوعامدىق كولىكتەردىڭ جاڭارتىلۋى ەكولوگيانى جاقسارتۋ جولىنداعى قالانىڭ باستى جوبالارىنىڭ ءبىرى. ويتكەنى كوگىلدىر وتىن مۇنايمەن سالىستىرعاندا قورشاعان ورتاعا زالالسىز. سىيىمدىلىعى 90 ادامدى قۇرايتىن سۋ جاڭا اۆتوبۋستاردىڭ ۇزىندىعى – 12, ال ەنى – 2,8 مەتر. بۇگىندە قالادا 20 اۆتوبۋس پاركى جۇمىس ىستەيدى. جىل اياعىنا دەيىن تاعى 83 اۆتوبۋس, ونىڭ ىشىندە 38 ەلەكتروبۋس ساتىپ الۋ كوزدەلگەن. جۋىق ارادا جولاۋشىلار تاسىمالى پاركى 233 ەكولوگيالىق تازا كولىكپەن تولىعا تۇسپەك. مەگاپوليستەگى 147 باعىت بويىنشا قاتىنايتىن 1 940 اۆتوبۋستىڭ 321-ءى كوگىلدىر وتىنمەن جۇرەدى.
شاھار ەكولوگياسىنىڭ احۋالىن تىكتەۋگە باعىتتالعان تاعى ءبىر تىڭ جوبا رەتىندە ەكولوگيالىق كورسەتكىشتەردىڭ ونلاين كارتاسى ىسكە قوسىلعانىن ايتۋعا بولادى. قالانىڭ اۋا اتموسفەراسى جايلى بارلىق مالىمەتتى بىرىكتىرەتىن ديناميكالىق پلاتفورمانى تابيعات جاناشىرلارى دا قولداپ وتىر. ويتكەنى جوبا تۇرعىندارعا قورشاعان ورتانىڭ جاعدايى مەن اۋا ساپاسى تۋرالى كەڭ ماعلۇمات بەرەدى.
– مونيتورينگتىك ستانسالار ءاربىر 20 مينۋت سايىن ونلاين رەجىمدە اۋا ساپاسىن انىقتايدى. مۇنداعى كورسەتكىشتەر گرافيكتەر جانە ساندىق دەرەكتەر تۇرىندە بەرىلەدى. پدك ينديكاتورلارىنىڭ ديناميكاسى دا كورسەتىلەدى. ستانسالار اتموسفەراداعى لاستاۋشى زاتتاردىڭ كولەمىن, سونداي-اق ىلعالدىلىق, تەمپەراتۋرا, قىسىم, جەلدىڭ باعىتى مەن جىلدامدىعىن ولشەيدى. كەزەڭنىڭ ورتاشا ماندەرى جانە ورتاشا كۇندىك كورسەتكىشتەرى ەسەپتەلەدى. جوبانىڭ ماقساتى – ساراپشىلار مەن ماماندارعا ونلاين فورماتتا مالىمەت بەرۋ. سونىمەن قاتار جيناقتالعان كورسەتكىشتەر بويىنشا اۋا ساپاسىنىڭ جانە باسقا پارامەترلەردىڭ وزگەرۋىن بولجاۋعا مۇمكىندىك بەرەتىن مالىمەتتەر بازاسىن قۇرۋ, – دەيدى قالا اكىمدىگىنىڭ ءباسپاسوز قىزمەتى.
الماتىدا اۋا ساپاسىنا مونيتورينگ جۇرگىزەتىن 10 ستانسا بار. اتالعان ستانسالاردىڭ مالىمەتتەرىن قالا كوشەلەرىندەگى LED-ەكرانداردان كورۋگە بولادى. بيىلدان باستاپ قورشاعان ورتاعا تۇسەتىن تەحنوگەندىك جۇكتەمەنى ازايتۋ ماقساتىندا قالاعا كىرىپ-شىعاتىن ترانزيتتىك جۇك كولىكتەرىنىڭ قوزعالىسى شەكتەلۋى مۇمكىن.
الماتى
