جامبىل تويىنا دايىندىق بارىسىمەن تانىستى

جامبىل جىلىنىڭ مەجەسىندە اتقارىلار جۇمىستىڭ ءبىر پاراسىن باعامداپ, اقىن تۋعان اۋدانداعى مەرەيتويعا دايىندىقتى پىسىقتاۋ ءۇشىن الماتى وبلىسىنا مەملەكەتتىك حاتشى قىرىمبەك كوشەرباەۆ كەلدى. ونىڭ جۇمىس ساپارى جامبىل جاباەۆتىڭ ادەبي-مەموريالدى مۋزەيىنەن باستالدى. قوناقتار الدىمەن مۋزەي الدىنا قويىلعان اقىننىڭ ەسكەرتكىشىنە گۇل شوقتارىن قويىپ, تاعزىم ەتتى. بۇگىندە جىر الىبىنىڭ ءوزى تۇرعان ءۇي مۋزەي رەتىندە جابدىقتالعان. قىرىمبەك كوشەرباەۆ مۋزەيدىڭ ىشكى بولمەلەرىن, اقىننىڭ تۇتىنعان بۇيىمدارىن, مۋزەي قابىرعاسىنا جاعالاي ىلىنگەن ءومىرى مەن تۆورچەستۆوسى تۋرالى جادىگەرلەردى تاماشالادى. ال وبلىس اكىمى اماندىق باتالوۆ قوناقتارعا ادەبي مۋزەي كەيىنگى جىلدارى كەڭەيتىلىپ, قوسالقى عيماراتپەن تولىقتىرىلعانىن ايتىپ, مەرەيتويعا دايىندىق جۇمىسىنان حاباردار ەتتى. قۇرمەتتى قوناقتارعا جاڭادان باسىلعان جامبىل مەن مۇقا­عاليدىڭ جىر كىتاپتارىن سىيعا تارتتى. بۇدان كەيىن قوناقتار جامبىلدىڭ رۋحاني ۇستازى ءسۇيىنباي ارون ۇلىنىڭ جانە كومپوزيتور ءارى ديريجەر نۇرعيسا تىلەنديەۆتىڭ ماڭگىلىك مەكەنىنە بارىپ, ارۋاقتارعا ءتاۋ ەتتى. 

– 28 اقپان – جىر الىبىنىڭ تۋعان كۇنى. سونىڭ قارساڭىندا مەرەيتويلىق ءىس-شارالار نۇر-سۇلتان قالاسىندا باستالىپ, قازاقستاننىڭ بارلىق وڭىرىندە جانە شەتەلدە جاپپاي وتەتىن بولادى. بۇگىن ءبىز ەلباسىنىڭ جانە پرەزيدەنتتىڭ تاپسىرمالارىمەن الماتى وبلىسىنا ارنايى كەلىپ, جامبىل اتامىزدىڭ باسىنا ءتاۋ ەتىپ, ءىس-شارالاردىڭ العاشقى قادا­مىن باستاپ وتىرمىز. وتكەن جىلى حاكىم ابايدىڭ 175 جىلدىعىن اتاپ وتسەك, بيىل جامبىل بابامىزدىڭ مەرەي­تويى. ەكەۋى دە ءبىر داۋىردە, ءبىر زا­ماندا ءومىر سۇرگەن – الىپتار. جام­بىل اقىندى ايتىس ونەرىنىڭ شىڭىن­دا تۇر دەسەك, ونىڭ سونداي بيىككە ورلەۋىنە ىقپال ەتكەن, ءوزى ء«پىرىم» دەيتىن – ءسۇيىنباي ارون ۇلى. سوندىق­تان XXI عاسىردىڭ ءتۇرلى ءۇن قاتۋ­لارىنا لايىقتى جاۋاپ بەرۋ ءۇشىن ءبىز وسىنداي ۇلكەن ساباقتاستىق پەن يگى ءداس­تۇردى جالعاستىرا وتىرىپ, ءوزىمىز­دىڭ رۋحاني باستاۋلارىمىزدى, ۇلى تۇلعالارىمىزدى تانىپ-ءبىلۋىمىز كەرەك, – دەدى ساپار بارىسىندا مەملەكەتتىك حاتشى قىرىمبەك كوشەرباەۆ.

جال­پى, جەتىسۋ ءوڭىرى جامبىل جاباەۆ­تىڭ مەرەيتويىنا بايلانىس­تى بىرقاتار ءىس-شارا جوسپارىن ازىرلەپ وتىر. ونىڭ ىشىندە اقىن تۋرالى بيوگرافيالىق ءفيلمنىڭ ءتۇسىرىلىمى, ءومىرى مەن شىعارماشىلىعىنا قاتىستى كىتاپتار شىعارۋ, اقىندار ايتىسىن وتكىزۋ, مادەني ەسكەرتكىشتەر ورناتۋ, سۋرەتشىلەردىڭ حالىقارالىق پلەنەرىن وتكىزۋ سياقتى اۋقىمدى مىندەتتەر اتقارىلماق. 

سونداي-اق قازاقستان رەسپۋب­لي­كا­سىنىڭ مەملەكەتتىك حاتشىسى قى­رىمبەك كوشەرباەۆ الماتى وبلىسىنا جۇمىس ساپارى اياسىندا وڭىردەگى «رۋ­حاني جاڭعىرۋ» باع­دار­لا­ماسىنىڭ جۇزەگە اسۋ بارىسىمەن تانىستى. قارا­ساي جانە جام­بىل اۋداندارىنداعى بىرقاتار الەۋمەتتىك-مادەني نىساندى ارالاۋعا مەملەكەتتىك حاتشىمەن بىرگە الماتى وبلىسىنىڭ اكىمى امان­دىق باتالوۆ, الماتى قالاسىنىڭ اكىمى باقىتجان ساعىنتاەۆ, مادەنيەت جانە سپورت ءمينيسترى اقتوتى رايىمقۇلوۆا, جازۋشىلار وداعىنىڭ توراعاسى ۇلىق­بەك ەسداۋلەت تە قاتىستى.

قوناقتار الدىمەن ۇشقوڭىر اۋى­لىندا اشىلعان قازاقستان رەس­پۋب­ليكاسى تۇڭعىش پرەزيدەنتى – ەلبا­سى­نىڭ «اتامەكەن» تاريحي-مادە­ني ورتا­لى­عىنا اتباسىن تىرەدى. مۇندا ەل­باسى نۇرسۇلتان نازارباەۆ­تىڭ قازاق­ستان­نىڭ تاۋەلسىزدىك جو­لىن­داعى تا­ري­حي ءرولىن ايشىقتايتىن مۋزەي ەكس­پو­زيتسيالارىمەن تانىستى. مۋزەي­دىڭ ار­نايى تىلەك كىتاپشا­سىنا مەملە­كەت­تىك حاتشى ءوز قول­تاڭ­باسىن قال­دىر­دى. كەلەسى كەزەكتە مەم­لەكەتتىك حات­­شى «رۋحاني جاڭعىرۋ» باعدارلا­ما­سى اياسىنداعى «تۋعان جەر» جوباسى­مەن سا­لىنعان «ۇشقوڭىر» دەنە شىنىق­تىرۋ-ساۋىقتىرۋ كەشەنىنىن ارالاپ, كوردى.

الماتى وبلىسى