ىشكى ىستەر ءمينيسترى ەرلان تۇرعىمباەۆ م. ەسبولاتوۆ اتىنداعى ءىىم الماتى اكادەمياسىنا باردى. ۆەدومستۆو باسشىسىنىڭ ساپارى № 1 فاكۋلتەت – باسشىلىق قۇرامدى دايارلاۋ جانە № 2 فاكۋلتەت – ىشكى ىستەر ورگاندارىنىڭ ورتا باسشى قۇرامىن دايارلاۋ فاكۋلتەتتەرىنىڭ اشىلۋىمەن تۇسپا-تۇس كەلدى.
– مەملەكەت باسشىسىنىڭ ىشكى ىستەر ورگاندارىنىڭ كادرلىق الەۋەتىن دايىنداۋ جانە ارتتىرۋ تۋرالى تاپسىرماسى اياسىندا پوليتسيا باسقارمالارىنىڭ باستىقتارى مەن ولاردىڭ ورىنباسارلارىنان باستاپ اۋماقتىق پوليتسيا دەپارتامەنتتەرىنىڭ باستىقتارىنا دەيىنگى باسشى قۇرام لاۋازىمدارىنا بارلىق تاعايىنداۋلار, سونداي-اق پرەزيدەنتتىك كادر رەزەرۆىنە كانديداتتاردى قابىلداۋ كورسەتىلگەن فاكۋلتەتتەردە وقۋدان وتكەننەن كەيىن عانا جۇرگىزىلەتىن بولادى, – دەپ حابارلادى مينيستر اكادەميانىڭ پروفەسسورلىق-وقىتۋشىلىق قۇرامىمەن كەزدەسۋ كەزىندە.
ۆەدومستۆو باسشىسىنىڭ مالىمەتىنشە, تىڭداۋشىلاردىڭ ءبىرىنشى لەگى وسى جىلدىڭ 29 ناۋرىزىندا كەلەدى. دارىسكەرلەر پۋلىنا ءىىم ورتالىق اپپاراتىنىڭ باسشىلارى, ءىىو ارداگەرلەرى, مەملەكەتتىك ورگانداردىڭ, ازاماتتىق قوعام ينستيتۋتتارىنىڭ وكىلدەرى, قازاقستاندىق جانە شەتەلدىك كورنەكتى عالىمدار, قوعام قايراتكەرلەرى كىرەدى.
مينيسترگە عىلىم, ءبىلىم جانە پوليتسيانىڭ پراكتيكالىق قىزمەتىن ينتەگراتسيالاۋ ماقساتىندا اكادەميادا عىلىمي-زەرتتەۋ ينستيتۋتىن قۇرۋ جوباسى, سونداي-اق حالىقارالىق ىنتىماقتاستىق, ستراتەگيالىق دامۋ, يدەولوگيالىق جانە يميدجدىك جۇمىستى جوبالىق باسقارۋ بولىمدەرى تانىستىرىلدى.
– بۇل وزگەرىستەردىڭ بارلىعى ىشكى ىستەر ورگاندارىن رەفورمالاۋ شەڭبەرىندە جۇزەگە اسىرىلۋدا. ۆەدومستۆولىق ءبىلىم بەرۋدى دامىتۋعا باسا نازار اۋدارا وتىرىپ, ءبىز جاڭا فورماتتاعى كادرلار دايارلاۋدىڭ ىرگەتاسىن قالايمىز. الماتى اكادەمياسى قىزمەتىنىڭ باسىم باعىتى زاماناۋي تالاپتارعا جاۋاپ بەرەتىن جوعارى بىلىكتى قىزمەتكەرلەردى دايارلاۋ بولادى, – دەپ اتاپ ءوتتى ىشكى ىستەر ءمينيسترى ەرلان تۇرعىمباەۆ.
