بۇگىن, ەلورداداعى دوستىق ۇيىندە «قان تاپسىر دا, ادام ومىرىنە اراشا ءتۇس!» اتتى اكتسيا وتكىزىلىپ, وعان نۇر-سۇلتان قالاسى قازاقستان حالقى اسسامبلەياسىنىڭ وكىلدەرى, ەلوردا تۇرعىندارى مەن جالپى ەرىكتىلەر قاتىستى.
اكتسيا ۇيىمداستىرۋشىسى-نۇر-سۇلتان قالاسى قازاقستان حالقى اسسامبلەياسى.
اكتسيا وتكىزۋدەگى نەگىزگى مىندەت-ادامداردىڭ ومىرىنە اراشا بولۋ ءۇشىن قوعامدى اقىسىز تۇردە قان دونورى بولۋعا شاقىرۋ. ءاربىر ازاماتتىڭ ءوز ەركىمەن قان تاپسىرۋىنىڭ جۇيەلىلىگىن قالىپتاستىرۋ.
بۇل اكتسيا جىل سايىن ءداستۇرلى تۇردە وتكىزىلىپ كەلەدى. وتكەن جىلى وسى يگىلىكتى شارا قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ترانسفۋزيولوگيا عىلىمي-وندىرىستىك ورتالىعىمەن بىرلەسىپ وتكىزىلگەن بولاتىن. اتاپ ءوتۋ كەرەك, وسى جولى دا ەلوردامىزداعى ەتنومادەني بىرلەستىكتەردىڭ وكىلدەرى دونور بولۋعا بەلسەندىلىك تانىتتى.
سانيتارلىق-ەپيدەميولوگيالىق قاتاڭ تالاپتاردى نەگىزگە الا وتىرىپ, قان تاپسىرۋعا كەلگەن ەرىكتىلەرگە قاتىستى مالىمەتتەر ءجىتى تەكسەرۋدەن وتكىزىلدى. ول بويىنشا ادام تۋبەركۋلەزبەن, ۆيرۋستىق گەپاتيتپەن, بەزگەكپەن, برۋتسەللەزبەن نەمەسە رەۆماتيزممەن اۋىرسا, ونىڭ قانى قابىلدانبايدى. سونداي-اق جوعارى نەمەسە تومەن ارتەريالىق قىسىمى بار, ەپيلەپسيالىق قۇرىسۋلار مەن ومىرلىك ماڭىزدى ورگاندارى اۋىراتىن ادامدار دا قان تاپسىرا المايدى. وسىنداي تالاپتاردى باسشىلىققا العان ماماندار ءاربىر ازاماتتى ءجىتى باقىلاۋدان وتكىزىپ, اكتسيانىڭ ءساتتى وتكىزىلۋىنە ۇلەستەرىن قوستى.
جالپى, قان تاپسىرىپ تۇرۋدىڭ ادام اعزاسىنا پايداسى مول. قاندى بەلسەندى تاپسىراتىن دونورلار جۇرەك-قان تامىرلارى اۋرۋىمەن سيرەك اۋىرادى جəنە قان كەتۋ – ولار ءۇشىن قاۋىپتى جاعداي ەمەس. قان الىنعان سايىن ادام بويىنداعى قان جاڭارىپ وتىرادى, قان اينالۋ پروتسەسى جاقسارادى. بۇل ءوز كەزەگىندە كوپتەگەن اۋرۋلاردىڭ الدىن الادى. ماسەلەن, تۇراقتى قان تاپسىرىپ تۇراتىن ادامدار تاپسىرمايتىندارعا قاراعاندا 5 جىلعا ارتىق ءومىر سۇرەتىنى عىلىمي تۇردە دالەلدەنگەن. ال ءبىر رەت قان تاپسىرعان دونور ورتا ەسەپپەن ءۇش ادامنىڭ ءومىرىن قۇتقارادى.
قازاقستان رەسپۋبليكاسى دەنساۋلىق ساقتاۋ مينيسترلىگىنىڭ دەرەگىنە جۇگىنسەك, ەلىمىزدە جىل سايىن 200 مىڭنان ارتىق ادام قان تاپسىرادى جانە ولاردىڭ شامامەن 18 مىڭى قاندى 3 رەتتەن ارتىق تاپسىرعان. نۇر-سۇلتان قالاسىنىڭ وزىندە جىل سايىن شامامەن 40 دوناتسيالاۋ جۇزەگە اسىرىلادى. سونىمەن بىرگە, ەلىمىزدە جىلىنا 360 مىڭنان ارتىق دوزا قان قۇيىلادى ەكەن. وسىنداي اۋقىمدى جۇمىستاردىڭ ءتيىستى دارەجەدە ورىندالۋىنا نۇر-سۇلتان قالاسى قازاقستان حالقى اسسامبلەياسى دا ءوز ۇلەسىن قوسۋدا.
