قازىر ەسكە تۇسىرسەك, كەزىندە قاراعاندى وڭىرىندە ءىرىلى-ۇساقتى 60-قا جۋىق ماشينە جاساۋ زاۋىتتارى بولعان ەكەن. وتپەلى كەزەڭ قيىندىعى الدىمەن وسى سالاعا اۋىر ءتيىپ, ول ءبىراز جىلعا تۇرالاپ قالدى. سوڭعى ۋاقىتتاردا تەڭ جارتىسى ءىستى قايتا جاڭعىرتىپ, بۇرىنعى قارىمدى قالپىنا كەلتىرىپ كەلەدى. ءوندىرىستى دامىتۋ وتاندىق ۇلەسپەن بايلانىستى بولىپ تۇرعاندا ونى كوتەرۋ بۇگىنگى باسىم مىندەتتەردىڭ ءبىرى رەتىندە العا قويىلىپ وتىر. ءبىر ءتاۋىرى بۇعان مۇمكىندىك بارشىلىق. ساقتالعان وندىرىستىك الاڭدار, تەحنيكالىق قۋات, بىلىكتى ماماندار وڭدەۋ ونەركاسىبى تىنىسىن كەڭەيتۋدى جەڭىلدەتەرلىك العىشارتتار.
وسىعان بايلانىستى بەلگىلەنگەن باعدارلاما بويىنشا ماشينە جاساۋ كونسورتسيۋمى قۇرىلدى. 1000-عا تارتا ادامنىڭ ەڭبەككە تارتىلۋىنا جول اشاتىن اتالعان قۇرىلىمعا ازىرگە 11 زاۋىت ەنگەن. ازىرگە دەيتىنىمىز, ولاردىڭ قاتارى تولىعا تۇسپەك.
كونسورتسيۋم ءبىرىنشى كەزەكتە كەن-شاحتا جابدىقتارىن جاساۋدى جانداندىرۋدى قولعا الۋدى كوزدەيدى. اتاپ ايتقاندا, كومىر قاباتتارىن دايىنداۋ كەشەندەرىنە, كونۆەيەرلەرگە مەحانيكالاندىرىلعان تىرەۋلەردى شىعارۋ ءوندىرىسىن قۇرۋ جۇرگىزىلىپ جاتىر. ال كەلەشەكتە باستى كاسىپورىنداردىڭ نەگىزىندە كوممۋنالدىق جانە اۋىلشارۋاشىلىق تەحنيكالارى ءۇشىن قوسالقى بولشەكتەر قۇراستىرۋ جالعاستىرىلادى. دوڭعالاقتى جەڭىل تراكتورلار جاساۋ دا ويدا بار. مۇنى ەكسكاۆاتور زاۋىتى مويىنعا جۇكتەۋگە دايىن. سونداي-اق, كوتەرۋ كولىگى جابدىقتارى, جۇك ليفتىلەرى, ەنەرگەتيكالىق اگرەگاتتار قازاقستاندىق تۇتىنۋشىلار قولىنا تيەتىن بولادى. ءسويتىپ اتالعان زاتتاردىڭ تاپشىلىعى, سىرتتان قىمبات باعاعا ساتىپ الىنۋى تومەندەي باستايدى. وسىلايشا ماشينە جاساۋ سالاسىن ساۋىقتىرۋ ارقىلى وبلىستىڭ قاجەتتى تەحنولوگيالىق قۇرال-جابدىقتارمەن ءوزىن-ءوزى تولىق قامتاماسىز ەتۋىن قالىپتاستىرۋ جاڭا ەكونوميكالىق تالاپتان تۋىنداعان مىندەت.
بۇل كۇندە ونىڭ قىزمەتىن ءۇيلەستىرۋگە باعىتتالعان شارالاردىڭ الدى باستالىپ كەتتى. سول ءۇشىن قۇرىلعان تەحنوپاركتە ماشينە جاساۋ زاۋىتتارىنا ارنالىپ ايماقتىق ءىرى كونسترۋكتورلىق بيۋرو جۇمىس ىستەگەلى تۇر. بارلىق جاڭا تەحنولوگيا, ۇتىمدى ىزدەنىستەر سوندا تالدانىپ, وندىرىسكە جولداما الادى. عىلىمي-زەرتتەۋ ينستيتۋتتارى دا وسى ىسكە جۇمىلادى.
كونسورتسيۋم قۇرامىنداعى ءبىرلەسكەن ماشينە جاساۋ زاۋىتىن قۇرۋعا “ارسەلور ميتتال تەمىرتاۋ” كومپانياسى ىنتا تانىتتى. قاجەتتى جابدىقتاردى تۇتىنۋعا تاپسىرىس بەرۋشىلەر اراسىندا مەموراندۋم جاسالىپ, سوعان سايكەس وندىرىلەتىن ءونىمدەر تاياۋ ارادا قولدارىنا تيمەك.
بۇعان دەيىن اتاق-داڭقى الىسقا تانىمال بولعان سالانىڭ قايتادان ءوڭىر ونەركاسىبىندە جەتەكشى ورنىن ورالتۋىنا مۇمكىندىگى كەڭ. ابدەن ويلاستىرىلىپ, مىندەتتەر ناقتى بەلگىلەنىپ باستالعان وسىناۋ ماڭىزدى جوبانىڭ تىڭعىلىقتى ىسكە اسىرىلۋىنا ءۇمىت ۇلكەن. وبلىستىڭ باستى نازارىنداعى شارانىڭ ورىندالۋ بارىسى تۇراقتى باقىلاۋعا الىنعان.
كەيىنگى بىرەر جىلدان بەرى بەلورۋستىق ىسكەر توپتار وكىلدەرىنىڭ وبلىسقا كەلىپ-كەتۋى جيىلەي باستادى. جاقىندا وسى ەل ءىرى كاسىپورىندارى باسشىلارى مەن جاۋاپتى ماماندارىنان قۇرالعان دەلەگاتسيا كەزەكتى جۇمىس ساپارىمەن بولىپ قايتتى. ءوندىرىستى ءوڭىردىڭ ەكونوميكالىق كۇش-قۋاتىنا قانىق مەيماندار بۇل جولى ەكىجاقتى بايلانىستى تەرەڭدەتۋگە كەڭ مۇمكىندىكتەر بارىن انىقتادى.
ايماق پەن بەلورۋسيا اراسىنداعى تاۋار اينالىمى بۇگىندە 85 ميلليون تەڭگەنى قۇراپ وتىرسا, ونى ۇلعايتا بەرۋ ورتاق باستى ماقسات. 7 بىرلەسكەن كاسىپورىننىڭ جەمىستى قىزمەتى سوعان قولايلى جاعداي تۋعىزادى. ەندى قاراعاندىنىڭ وزىندە ايگىلى بەلاز ماشينەلەرىن قۇراستىرۋ باستالماقتاعى ەڭ ءىرى جوبالاردىڭ ءبىرى. سونىڭ ارقاسىندا وڭىردە بۇرىن سوڭدى بولىپ كورمەگەن جاڭا ءوندىرىس قالىپتاسقالى وتىر.
مينسك دوڭعالاقتى جۇك سۇيرەگىش تەحنيكالارى زاۋىتى ءونىمى وبلىستا قايتا جاندانۋعا بەت العان ماشينە جاساۋ ونەركاسىبىنە ۇلكەن كومەك بولعالى تۇر. جەرگىلىكتى ءارىپتەستەرىمەن ىسكەرلىك كەزدەسۋدە اتالعان زاۋىت وكىلى سەرگەي فەوفيلوۆ ورتاعا سالعانداي, ەل يندۋسترياسىنىڭ بۇل الىبى بىلتىر وندىرىلەتىن ءونىم كولەمىن 50 پايىزعا ارتتىرىپ, بەتونسورعىش سياقتىلى ءوتىمدى زاتتار شىعارۋدى دا يگەرگەن. ونىڭ ءبىراز بولىگىن ساتىپ الۋعا “قازاقمىس” كورپوراتسياسى تاراپىنان ىنتا تانىتىلدى.
ىنتىماقتاس مەملەكەت وكىلدەرى تىكەلەي كوز جەتكىزگەندەي بەلاز قۇراستىرۋعا ىڭعايلانعان قاراعاندى زاۋىتىندا دايىندىق جۇمىستارى اياقتالىپ كەلەدى. ءوز ءتاجىربيەلەرىن ۇيرەتۋگە, شەبەرلىكتەرىن بولىسۋگە كەلگەن جەرلەس ماماندارىنىڭ بايان ەتۋى بويىنشا جاڭا كاسىپورىننىڭ تەحنيكالىق تا, كادرلىق تا الەۋەتى قويىلعان مىندەتتى ىسكە اسىرۋعا جەتكىلىكتى. جاز ورتاسىنا تامان ول ىسكە كىرىسەدى دەپ كۇتىلۋدە.
ايقىن نەسىپباي.
قاراعاندى.
سوڭعى جاڭالىقتار
زاڭگەرلەر جاڭا كونستيتۋتسيانىڭ تۇجىرىمداماسىن تالقىعا سالدى
اتا زاڭ • كەشە
ەكونوميكالىق قىلمىسقا قاتىسى بارلار تىزىمگە الىنادى
ەكونوميكا • كەشە
