ASSYL DOMBYRA دەپ ايدار تاققان ايشىقتى الامان ءتورت كەزەڭگە سوزىلماق. جىلدار جىلناماسىندا ءتول ونەرىمىزدى تورگە سۇيرەپ كەلە جاتقان ايتىس اقىندارى مەن جىرشى-تەرمەشىلەر وداعىنىڭ توراعاسى ءجۇرسىن ەرماننىڭ 70 جىلدىق مەرەيتويىن ارقاۋ ەتكەن العاشقى توپتا اۋزىمەن قۇس تىستەگەن 16 اقىن ونەر كورسەتتى. الامان دودانىڭ ەكىنشى توبى ءساۋىر ايىنىڭ 10-جۇلدىزىندا, ءۇشىنشى توپ ماۋسىمنىڭ 5-ندە اقسۋاتتا ايتىسادى دەپ جوسپارلانعان. وسىلايشا, بارلىق ءۇش كەزەڭنىڭ قورىتىندىسى بويىنشا سايدىڭ تاسىنداي ىرىكتەلىپ شىققان 24 اقىن قىركۇيەك ايىندا فينالدىق كەزەڭدە باق سىناماق. ASSYLTAS قوعامدىق قورى دەمەۋشىلىك ەتكەن ايتىستى ەلدەگى ەپيدەميالىق جاعدايعا بايلانىستى كورەرمەن قاۋىم ASSYLTAS TV youtube ارناسىنان تىكەلەي ەفيردە تاماشالادى.
ءاسانالى ءاشىموۆ, ءاسيا بەركەنوۆا, اسەلحان قالىبەكوۆا, سۆەتقالي نۇرجانوۆ, قويلىباي اسانوۆ, سەرىك قۇسانباەۆ, ءانۋار ومار, امانجول التاەۆ, سەرىك قاليەۆ, داۋلەتكەرەي كاپ ۇلى سىندى ونەر مايتالماندارى مەن اقىندار قازىلىق ەتكەن ءسوز سايىسىندا ۇلتتىق قۇندىلىقتار ۇلىقتالىپ, قوعامداعى وزەكتى ماسەلەلەر قاۋزالدى. ايتىس دەسە ارقاسى قوزاتىن كوپتىڭ كوڭىلىن, ءشوپتىڭ ءشولىن قاندىرعان اق جاڭبىرشا جادىراتقان جىر دوداسىندا 8 جۇپ ونەر كورسەتتى. ASSYL DOMBYRA ايتىسىنىڭ تالابىنا ساي جەڭىسكە جەتكەن سەگىز اقىن قىركۇيەكتەگى شەشۋشى دوداعا جولداما الۋى ءتيىس ەدى, دەگەنمەن سايىستا ءبىر-بىرىنە دەس بەرمەگەن كەرەكۋلىك اسپانبەك شۇعاتاەۆ پەن ورالدىق جانسايا مۋسينا قازىلار القاسىنىڭ شەشىمىمەن فينالعا قاتار ءوتتى. توپتان وزعان توعىز اقىننىڭ قاتارىندا مەيىربەك سۇلتانحان (قىزىلوردا), شالقارباي ءىزباساروۆ (اتىراۋ), رۇستەم قايىرتاي ۇلى (الماتى), ايتبەك تۇرسىنباەۆ (تاراز), تولەگەن جامانوۆ (قاراعاندى), ەرجان ءامىروۆ (قىزىلوردا), ايبەك جەڭىسقازيندەر (شقو) بار.
جىر الامانىنا قاتىسقان بارلىق 16 اقىنعا دەمەۋشىلەر تاعايىنداعان 150 مىڭ تەڭگە كولەمىندەگى قارجىلاي سىياقى مەن دومبىرا تابىستالدى. باستى سىيلىق – اسىل تاستارمەن كومكەرىلگەن دومبىرانىڭ يەسى ەندى ەكى توپتاعى اقىندار ايتىسى وتكەننەن كەيىن قىركۇيەكتە شىمىلدىعىن تۇرەتىن سوڭعى سىندا انىقتالماق.
– جورگەگىندە جىر قاسيەتىن ەمىپ, ء«سوز قۇدىرەتىن ءوز قۇدىرەتىم» دەپ تانىعان قازاق ءۇشىن ۇلتىمىزدىڭ ۇلى مۇراسىنا بالاناتىن ايتىس ونەرىنىڭ ورنى بولەك. سوندىقتان بولار, سۇلۋ سوزگە سۋساپ كەلگەن تىڭدارماندى سۇمبىلە جىردىڭ سۋاتىنا سۇيرەي جونەلەتىن ايتىسىمىزدىڭ باسىرەسى ساتكە دە بولسا بيىكتەن قۇلاپ كورگەن ەمەس. الماتى – ازاتتىقتىڭ التىن بەسىگى عانا ەمەس, سۇلۋ جىردىڭ سالتانات قۇرعان اياۋلى شاھارى. ۇلت ونەرىن قولداۋ بارىمىزگە ورتاق بورىش, – دەيدى قازاقستاننىڭ ەڭبەك ەرى ءاسانالى ءاشىموۆ.
