وسى ورايدا ورتالىق كوممۋنيكاتسيالار قىزمەتىندە «2021 جىلى – قازاقستانداعى بالالار مەن جاسوسپىرىمدەردىڭ كىتاپ وقۋىن قولداۋ جىلى» اياسىندا ارنايى بريفينگ ءوتتى.
جيىنعا مادەنيەت جانە سپورت ۆيتسە-ءمينيسترى نۇرعيسا داۋەشەۆ, اقىن, قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت, جازۋشى بايانعالي ءالىمجانوۆ, ۇلتتىق اكادەميالىق كىتاپحانانىڭ باسشىسى ءۇمىتحان مۇڭالباەۆا, اتىراۋ وبلىستىق عىلىمي-امبەباپ كىتاپحاناسىنىڭ ديرەكتورى سارا ىزمۇحامەتوۆا قاتىستى.
ايتا كەتەيىك, اتاۋلى جىلدىڭ نەگىزگى ماقساتى – بالالار مەن جاسوسپىرىمدەردىڭ اراسىندا كىتاپ وقۋ مادەنيەتى مەن كىتاپ وقۋ بەلسەندىلىگىن ارتتىرۋ, كىتاپ وقۋ مارتەبەسىن كوتەرۋ جانە وتباسىلىق كىتاپ وقۋ داستۇرلەرىن قولداۋ بولىپ وتىر. شارا اياسىندا ءتۇرلى جوبالار مەن مادەني ءىس-شارالار, حالىقارالىق فورۋمدار, ۇيىرمەلەر, شولۋ مەن تاقىرىپتىق ەكسكۋرسيالار, بايقاۋلار مەن كەزدەسۋلەر, كەشتەر, چەللەندجدەر جۇزەگە اسىرىلىپ, الەۋمەتتىك جەلىلەر مەن باق-تا كەڭىنەن ناسيحاتتالاتىن بولادى.
بريفينگتە العاش بولىپ ءسوز العان مادەنيەت جانە سپورت ۆيتسە-ءمينيسترى نۇرعيسا داۋەشەۆ: «بيىل الۋان ءتۇرلى مادەني-تانىمدىق, وقىتۋ شارالارىن وتكىزۋ جوسپارلانعان. سونىڭ ىشىندە, كىتاپحانالار جۇيەسى مەن قىزمەتىنىڭ زاماناۋي ۇلگىلەرىن ۇيىمداستىرۋ ءىسى جولعا قويىلۋدا. «بالالار مەن جاسوسپىرىمدەردىڭ كىتاپ وقۋىن قولداۋ جىلى» اياسىندا وتەتىن ءىس-شارالارمەن رەسپۋبليكانىڭ بارلىق ايماقتارى قامتىلادى. وقىرمانداردىڭ كىتاپ وقۋىنا بارىنشا جاعداي جاسالادى», دەدى.
وسى جىلدىڭ بالالار مەن جاسوسپىرىمدەردىڭ كىتاپ وقۋ جىلى دەپ جاريالانعانىن قولدايتىنىن جەتكىزگەن قازاقستان جازۋشىلار وداعىنىڭ توراعاسى ۇلىقبەك ەسداۋلەت: «وتاندىق بالالار ادەبيەتىن قازاق تىلىندە جازاتىن جاس جازۋشىلاردى مەملەكەتتىك دەڭگەيدە قولداۋ قاجەت. قازىر بالالاردىڭ كوپشىلىگى كومپيۋتەرلىك ويىنداردى جاقسى كورەدى. ەگەر ءبىز بالالارعا قاجەتتى جۇمىستى ۇسىنا الماساق, ولار بۇل بوس ورىندى باسقا نارسەمەن تولتىرادى. ال بولاشاقتا بۇل بالالار ءبىزدىڭ ەلىمىزدى باسقاراتىن بولادى», دەپ تۇيىندەدى.
بالالاردى كوركەمسوز ارقىلى ويلاۋعا, ويناپ ءجۇرىپ ويلاۋعا ۇيرەتۋ قاجەتتىگىن العا تارتقان بالالار جازۋشىسى بايانعالي ءالىمجانوۆ قازاق بالالار ادەبيەتىنىڭ باي ەكەنىنە توقتالدى. «اۋىلداعى بالالار كىتاپقا ءزارۋ. ال كىتاپ ساتىپ الۋعا جاعدايى جوق.سول سەبەپتى بالالاردىڭ تاقىرىپتىق انتولوگياسىن شىعارۋدى ۇسىنامىن. «وتان», «تۋعان جەر», ء«تىل» تاقىرىپتارى بويىنشا شىعارىلعان انتولوگيانى سايتتارعا ورنالاستىرسا, مۇعالىم دە, بالاباقشا تاربيەشىلەرى دە پايدالاناتىن بولادى. بۇل تاپتىرماس قاجەتتى قۇرالعا اينالادى. جانە بالاعا تۇسىنىكتى ولەڭدى جەتكىزۋگە مۇمكىندىك بەرەدى», دەدى ول.
ايتا كەتەيىك, قازاقستانداعى بالالار مەن جاسوسپىرىمدەردىڭ كىتاپ وقۋىن قولداۋ جىلى كىتاپحانالار قاۋىمداستىعى مەن بىرلەستىكتەرىنىڭ حالىقارالىق فەدەراتسياسىنىڭ (IFLA) پرەزيدەنتى كريستينا ماككەنزي, سونداي-اق قازاقستاننىڭ عىلىمي جانە شىعارماشىلىق ينتەلليگەنتسيا وكىلدەرى مەن وقىرماندار قوعامداستىعى تاراپىنان قولداۋ تاپتى.
