اكادەميانىڭ باسقارۋشى ديرەكتورى ءانۋار جانعوزيننىڭ ايتۋىنشا, جوبا قالا مەن اۋىل وقۋشىلارى اراسىنداعى ءبىلىم بەرۋ تەڭسىزدىگىن قىسقارتۋعا باعىتتالعان.
ونلاين مەكتەپتە 6-7 سىنىپ وقۋشىلارى وقي الادى. ويتكەنى ءدال وسى كەزەڭدە ولاردىڭ پاندىك بىلىمگە بەلسەندىلىگى ارتادى. ايتا كەتۋ كەرەك, قازاقستاندىق جانە شەتەلدىك ساراپشىلار, سونداي-اق مۇعالىمدەر مەن اتا-انالار جوبا اياسىندا ۇزاق ۋاقىت بويى جۇمىس ىستەدى.
«وتكەن جىلدىڭ ءساۋىر ايىندا ءبىز ونلاين وقىتۋدى قالاي جۇرگىزۋ كەرەكتىگى تۋرالى اۋقىمدى تالداۋ جۇمىستارىن جۇرگىزدىك. بۇل بارلىق وقۋشى قاشىقتان ءبىلىم الۋعا ءماجبۇر بولىپ, قيىندىققا تاپ بولعان كەزەڭ بولاتىن. مۇعالىمدەر, بالالار مەن اتا-انالاردىڭ باسىم بولىگى ءبىلىم الۋ پروتسەسىنىڭ ءبىر ساتتە وزگەرىسكە ۇشىراۋىنا دايىن بولماي شىقتى. ءبىز قاشىقتان وقىتۋ ساپاسى تاقىرىبىندا 100-دەن استام تىكەلەي ەفير وتكىزدىك, ناتيجەلەردى تالدادىق, بارلىق تىلەكتەردى ەسكەردىك جانە ونلاين-مەكتەپ قۇردىق», دەيدى ءا.جانعوزين.
ايتا كەتەيىك, ونلاين-مەكتەپتە وقىتۋ تەگىن جۇرگىزىلەدى. ساباقتى ەلىمىزدىڭ جەتەكشى پەداگوگتەرى – نازارباەۆ زياتكەرلىك مەكتەپتەرى, رەسپۋبليكالىق فيزيكا-ماتەماتيكا مەكتەبى, استانالىق ليتسەيلەر مەن حالىقارالىق مەكتەپتەردىڭ 70-تەن استام مۇعالىمى وتكىزەدى. جوبا ىسكە قوسىلعان ساتتەن باستاپ ماتەماتيكا, اعىلشىن, قازاق جانە ورىس تىلدەرى بويىنشا 40 مىڭنان استام ساعات ءوتتى. مەكتەپتە تيۋتورلاردىڭ قىزمەتى دە قاراستىرىلعان. ولار وقۋشىلاردىڭ ساباققا قاتىسۋى مەن ۇلگەرىمىن باقىلايتىن, ءتۇسىندىرۋ جانە تاربيە جۇمىستارىن جۇرگىزەتىن كونسۋلتانتتاردىڭ ءرولىن اتقارادى.
«ەگەمەن-اقپارات»
