پىكىر • 19 اقپان، 2021

«...كۋرەر كەرەك!»

105 رەت كورسەتىلدى

بۇگىندە «ەكى قولعا ءبىر كۇرەك» ىزدەگەن­دەر­دىڭ الدىنان وسىنداي حابارلاندىرۋ كوپتەپ كەزدەسىپ جاتادى. «ىزدەگەنگە – سۇ­راعان» دەگەندەي، سۇرانىسقا ساي اي­نالامىزدان كۋرەر بولىپ كۇنەلتىپ جۇر­گەندەردى ءجيى بايقايمىز. راسىندا، ەل با­سىنا ىندەت قاۋپى ءتونىپ، ەمىن-ەركىن ءجۇرىس-تۇرىسىمىز شەكتەلگەن شىرعالاڭ شاقتا ۇيدەن شىقپاي، كۋرەر قىزمەتىنە جۇگىنۋدى ءجون كورە باستادىق.

پاندەميا بۇكىل الەمدە ەڭبەك نارى­عى­نا اجەپتاۋىر ىقپال ەتكەنى انىق. قول­دا­نۋشىلاردىڭ ءانونيمدى تۇردە وزدەرى جۇمىس ىستەيتىن ۇيىمدارى تۋرالى مالىمەت الماسۋىنا مۇمكىندىك بەرەتىن Glassdoor.com سايتىنىڭ زەرتتەۋىنشە دۇنيە جۇزىندە ۋاقىتشا سۇرانىستاعى جۇمىستىڭ كوبى رەتەيل كومپانيالاردان تابىلادى ەكەن. ياعني بۇل – ەلەكتروندى ساۋدا كومپانيالارى. ىندەت تۋدىرعان داعدارىس اسەرىنەن جۇمىسىنان ايىرىلعان برونداۋ مەنەدجەرى، كولىك اگەنتى، شوۋ پروديۋسەرى، كونفەرەنتسيا ۇيىمداستىرۋشىسى سياقتى ماماندار وسىنداي كومپانيالارعا جۇمىسقا تۇرىپ، ناپاقاسىن تاۋىپ ءجۇر. ارينە، بۇل رەتتە ونلاين-ساۋدا كورىگىنىڭ قىزۋىنا تۇتىنۋشى تاراپىنان كەز كەلگەن تاۋاردى جەتكىزۋگە سۇرانىستىڭ ارتۋى سەبەپ بولعانى تۇسىنىكتى.

ەڭبەك نارىعىنداعى مۇنداي وزگەرىستەر ءبىزدىڭ ەلىمىزدە دە كەڭ سيپات الىپ وتىر. ىندەت قوس بۇيىردەن قىسقان قيىن شاقتا جۇمىسسىزداردىڭ قاتارى كوبەيىپ، ءبىراز شارۋا تۇرالاپ قالدى. دەگەنمەن كەيبىر ماماندارعا سۇرانىس تا ارتتى. ايتالىق، ەلەكتروندى ەڭبەك بيرجاسىندا جۇمىس بەرۋشىلەر جىل باسىنان بەرى 300-گە جۋىق كۋرەرلىك قىزمەتكە حابارلاندىرۋ جاريالاپتى. ال HeadHunter.kz پورتالىندا ءبىر ايدىڭ ىشىندە 250-گە تارتا كۋرەر ىزدەپتى. ولاردىڭ قىزمەتى رەتىندە قاعاز-قۇجات جەتكىزۋدەن باستاپ، ءتۇرلى ازىق-ت ۇلىك، كولەمىنە قاراي باسقا دا تاۋارلاردى تاسۋ كورسەتىلگەن. سوعان سايكەس جالاقىلارى دا ءارتۇرلى. ەڭ ازى 50 مىڭ تەڭگەدەن باستالىپ، ءارىسى 300 مىڭ تەڭگەگە دەيىن جەتەدى ەكەن. ەگەر كۋرەرلىك قىزمەتتى ۆەلوسيپەدىڭىزبەن كورسەتسەڭىز، جالاقىڭىزعا تاعى اقشا قوسىلادى. ال ءوز كولىگىڭىزبەن قىزمەت ەتسەڭىز، كەمى 150 مىڭ تەڭگەدەن باستاپ ودان ەكى ەسەگە دەيىن ايلىق ۇسىنىلادى. بىراق كۇنكورىس قامىمەن كۋرەرلىكتى قولاي كورگەندەردىڭ كوبى اقىسىن كۇن سايىن الىپ تۇرعىسى كەلەدى. بۇل ۇدەدەن شىعاتىن جۇمىس بەرۋشىلەر دە جەتەرلىك، ياعني كۋرەرلەرگە كۇندەلىكتى جۇمىسىنىڭ كولەمىنە قاراي اقىسىن ەسەپتەپ بەرەدى ءارى بەلسەندى جۇمىس ىستەسە، قوسىمشا بونۋسپەن ىنتالاندىرادى. وسىلايشا، جۇمىسشىلاردىڭ باسەكەگە قا­بى­لەت­ى ارتادى، تابىسى دا مولايادى.

باسىندا ايتقانىمىزداي، قازىرگى تاڭدا قولىمىزدى ۇزارتقان كۋرەرلەردىڭ كومەگىنە ءجيى جۇگىنەمىز. ازىق-ت ۇلىكتەن باستاپ كيىم-كەشەك، قۇرال-سايماندارعا دەيىن ونلاين-دۇكەندەر ارقىلى الدىراتىن بولدىق. ۇيىمىزگە بىرنەشە رەت كەرەگىمىزدى جەتكىزىپ ءجۇ­رىپ، ءجۇزتانىس بولىپ قالعان كۋرەرلەردىڭ ءبىرىن اڭگىمەگە تارتىپ كورىپ، بۇل قىزمەتتىڭ دە جايىنا شامالى قانىقتىق. ءوزىن تالعات دەپ تانىستىرعان جىگىت كۋرەر بولماي تۇرىپ، قالادا ءبىرشاما ۋاقىت تاكسي بولىپ جۇمىس ىستەگەن ەكەن.

«بۇرىن ءبىر مەكەمەدە جۇمىس ىستەگەنمىن. بىراق ايلىعى شايلىعىما جەتپەي، اقىرى تاكسي بولعاندى دۇرىس كوردىم. سودان ءوز ەركىم وزىمدە، تاقىمىمدا تەمىر تۇلپارىم، قالاعان ۋاقىتىمدا جۇمىسقا شىعامىن، كليەنت تابۋعا تاپتىرماس قۇرال بولاتىن ءموبيلدى قوسىمشالار بار. سولاي تاكسيلەتىپ جۇرگەن كەزىمدە اراسىندا كەيبىر كىسىلەر ازىن-اۋلاق زاتىن بەلگىلەنگەن جەرگە ۋاقىتىندا جەتكىزىپ بەرۋدى سۇرايدى، اقىسى قاناعاتتانارلىق. ونىڭ ۇستىنە جولاي تاعى جولاۋشى الىپ الامىن. ءسويتىپ، كۋرەرلىكتىڭ شەت جاعاسىن بىلە باستادىق. كەيىن كارانتين كۇشەيگەندە وسى سالاعا ءبىرجولا اۋىستىم. ويتكەنى ۇنەمى تاپسىرىس بار، اقىسى دا اجەپتاۋىر. باسىندا ازداپ ىڭعايسىزدانىپ، ار سانايتىن سياقتى ەدىم. بىراق «قىسىلا-قىسىلا قىز بولدىق» دەگەندەي، قىسىلتاياڭ كەزەڭدە بۇعان دا كون­دىك­تىك. نان تابۋ كەرەك، جان باعۋ كەرەك»، دەيدى ول.

ەڭبەك رەسۋرستارىن دامىتۋ ورتالىعىنىڭ 1 اقپانداعى مالىمەتى بويىنشا ەلىمىزدە 172 مىڭ جۇمىسسىز تىركەلگەن. ىندەت قاۋپى تونگەن كۇردەلى كەزەڭدە جۇمىسىنان شەتتەتىلىپ، تابىسىنان ايىرىلعاندار كوبەيىپ، مەملەكەت تاراپىنان ونداي ازاماتتارعا الەۋمەتتىك قولداۋ كورسەتىلدى. وتكەن جىلى جۇمىسسىز قالعان 99 مىڭنان اسا ادامعا اتاۋلى الەۋمەتتىك تولەم ۇلەستىرىلدى. الايدا مەملەكەت قولدايدى دەپ قول قۋسىرىپ قاراپ وتىرماي، ءوز بەتىنشە قارەكەت ەتىپ جاتقان جاندار كوپ. «ماڭدايى تەرلەمەگەننىڭ قازانى قاينامايدى» دەگەندەي، قىم-قۋىت تىرشىلىكتە تىرباڭداپ تىرلىگىن جاساپ، ناپاقاسىن تاۋىپ جۇرگەندەردىڭ ەڭبەگى ادال. وسى رەتتە ءبىز ءسوز ەتكەن كۋرەرلىكتى كوپ ادام ۋاقىتشا جۇمىس رەتىندە قاراستىرادى. ولاردىڭ كوبىنىڭ جوعارى ءبىلىمى بار نەمەسە ءوزىنىڭ كاسىبيلىگىنە كۇمانمەن قارايدى. سوندىقتان مۇنداي مامانداردىڭ مەيلىنشە ءوز ءىسىن تابۋىنا سەپتەسۋ ماڭىزدى. بۇگىندە سۇرانىسقا يە ماماندىقتارعا وقىتۋ، قايتا دايارلاۋ كۋرستارى بارشىلىق. قالاي دەگەنمەن، تۇراقتى جۇمىس – ءتۇزۋ تۇرمىستىڭ كەپىلى.

سوڭعى جاڭالىقتار

قازاقستاندا جاڭا كەن ورنى تابىلدى

ەكونوميكا • بۇگىن، 16:21

ەڭ سۇلۋ ۆولەيبولشى كىم؟

سپورت • بۇگىن، 16:15

ەل قورعاعان ەردىڭ ەسىمى جاڭعىردى

رۋحانيات • بۇگىن، 14:49

كورشىنىڭ كوپ-كورىم كومەگى

قوعام • بۇگىن، 14:23

ۇقساس جاڭالىقتار