قازاقستان • 19 اقپان، 2021

شەتەلدەردەگى سوتتالعان وتانداستارىمىز ەلگە قايتارىلادى

7 رەت كورسەتىلدى

سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسى ءوتتى. وندا دەپۋتاتتار «قازاقستان رەسپۋبليكاسى مەن كورەيا رەسپۋبليكاسىنىڭ اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭ جوباسىن تالقىلادى.

زاڭ جوباسى سوتتالعان ادامداردى بەرۋدە ىنتى­ماقتاستىقتى جاقسارتۋ ماقساتىندا ازىرلەندى، بۇل ولارعا باس بوستاندىعىنان ايىرۋ، قاماۋدا ۇستاۋ جانە بوستاندىقتان ايىرۋدىڭ باسقا دا تۇرىندە وزدەرى ازاماتتارى بولىپ تابىلاتىن مەملەكەتتە جازاسىن وتەۋگە مۇمكىندىك بەرەدى.

باس پروكۋراتۋرانىڭ مالىمەتتەرى بويىنشا، قازىرگى ۋاقىتتا كورەيا رەسپۋبليكاسىندا سوتتالعان قازاقستان ازاماتتارىنىڭ جالپى سانى – 23.

«شەتەلدەردەگى ازاماتتاردى قورعاۋ – ەلىمىزدىڭ باستى مىندەتتەرىنىڭ ءبىرى. سوندىقتان شارتتى راتيفيكاتسيالاۋ سوتتالعان ادامداردىڭ ازاماتتىق قوعامعا قايتا كىرىگۋىنە ىقپال ەتەدى»، دەدى سەناتور سۇلتانبەك ماكەجانوۆ.

وتىرىستا، سونداي-اق «قازاقستان رەسپۋبليكا­سىنىڭ كەيبىر زاڭنامالىق اكتىلەرىنە ادۆوكاتتىق قىزمەت جانە زاڭ كومەگى ماسەلەلەرى بويىنشا وزگەرىس­تەر مەن تولىقتىرۋلار ەنگىزۋ تۋرالى» زاڭ جوباسى دا قارالدى. زاڭ جوباسى ازاماتتاردىڭ بىلىكتى زاڭ كومەگىن الۋ قۇقىعىن ىسكە اسىرۋ كەپىلدىكتەرىن ارت­تىرۋعا، ادۆوكاتۋرا جانە زاڭ كونسۋلتانتتارى ينس­تيتۋتىن ودان ءارى دامىتۋعا، ولاردىڭ قىزمەتىن اۆتو­ماتتاندىرۋعا جانە وڭتايلاندىرۋعا باعىتتالعان.

كوميتەت توراعاسى ۆلاديمير ۆولكوۆتىڭ ايتۋىنشا، زاڭ جوباسىن قابىلداۋ قازاقستاننىڭ بارلىق اۋماعىندا ادۆوكاتتىق قىزمەتتى بىركەلكى رەتتەۋگە مۇمكىندىك بەرەدى. بۇل ادۆوكاتتار كورسەتەتىن زاڭ كومەگىنىڭ ساپاسىن ارتتىرۋدى قامتاماسىز ەتۋگە ءتيىس.

زاڭ جوباسى تۇجىرىمدامالىق تۇردە ءبىرىنشى وقىلىمدا قارالدى.

سوڭعى جاڭالىقتار

الماتىدا قىلمىس ازايدى

ايماقتار • كەشە

ۇقساس جاڭالىقتار