يتاليا سەناتى وتكەن اپتادا جاساقتالعان ماريو دراگيدىڭ ۇكىمەتىن قولداپ، وعان سەنىم ءبىل­دىردى. جاڭا سايلانعان ۇكىمەت باس­شى­سىنىڭ كومانداسىن 262 دەپۋتات قولداسا، 40 سەناتور قارسى داۋىس بەردى.

يتاليا پرەزيدەنتى سەردجيو ماتتارەلا ەلدەگى دەنساۋلىق ساق­تاۋ سالاسىنداعى جانە ەكونوميكالىق داع­دارىستى رەتكە كەلتىرۋ ءۇشىن جاڭا ۇكىمەت قۇرىلۋى قاجەت ەكەنىن حابار­لا­عان-دى. يتاليادا قاڭتار ايىندا كوالي­تسيالىق ۇكىمەتكە كىرەتىن ء«تىرى يتاليا» پارتياسى دجۋزەپ كونتە باسقارعان ۇكىمەتتى سىنعا الىپ، ۇكىمەتتەگى قىزمەت­تەرىنەن باس تارتقان ەدى. سونىڭ سەبەبىنەن ساياسي داعدارىس باستالىپ، پرەزيدەنت سەرد­جيو ماتتارەللا ەۋروپالىق ورتا­لىق بانكتىڭ بۇرىنعى باسشىسى ماريو دراگيگە ۇكىمەتتى جاساقتاۋعا ۇسىنعان ەدى.

يتاليا كونستيتۋتسياسىنا ساي­كەس، جاڭادان جاساقتالعان ۇكىمەت پارلا­مەنت­تىڭ سەنىمىن الۋعا مىندەتتى. ەلدەگى باق دراگي كومانداسى كىشى پالاتا­نىڭ دا قولداۋىن يەلەنەدى دەگەن بول­جام ايتادى. ويتكەنى ول ەلدەگى بار­لىق ساياسي توپتاردىڭ كوڭىلىنەن شىققان. دەگەنمەن پارلامەنتتىڭ كىشى پالاتا­سىنىڭ داۋىس بەرۋى بۇگىن وتەدى. جالپى، يتاليا حالقىنىڭ دا ساياساتكەرگە دەگەن كوزقاراسى جاقسى. ول ەل ىشىندە تەحنو­كراتيالىق يدەيالارىمەن تانىلعان، ەل بىرلىگىن نىعايتۋ كوزقاراسىن ۇستانادى. ەۋروپالىق ورتالىق بانكتىڭ باسشىسى قىزمەتىندە ەۋرو باعامىنىڭ تۇراقتى بولۋىن قامتاماسىز ەتە الۋى دا ونىڭ بىلىكتى باسشى ەكەنىن ايقىن دالەلدەدى.

ۇكىمەت باسشىسى رەتىندە ەلدەگى ءتۇرلى ساياسي پارتيالاردى بىرىكتىرىپ، ولاردى پاندەمياعا قارسى كۇرەس، ەكونوميكانى قايتا تۇلەتۋ جولىندا يىق تىرەسىپ جۇمىس ىستەۋگە شاقىردى. سەنات الدىندا 50 مينۋت مالىمدەمە جاساپ، قور­شاعان ورتاعا نازار سالاتىن، رەفورمالاردى تسيفرلاندىرۋعا باعىتتايتىن كەز كەلگەنىن ايتتى. «بىرلىك – سەزىم ەمەس، مىندەت. ال بۇل مىندەت ءبارىمىزدى بىرىكتىرەتىن ءبىر فاكتورعا بايلانىستى. ول – يتالياعا دەگەن ماحاببات»، دەدى پرەمەر-مينيستر سەناتورلاردىڭ الدىندا.

ءبىر قىزىعى، ونىڭ جوسپارى ەلدەگى سولشىلدار مەن وڭ قاناتتاعىلارعا قاتار ۇنادى. دەموكراتيالىق پارتيانىڭ كوش­باسشىسى نيكولا زينگارەتتي يتا­ليالىقتارعا «حالىق تىزگىنى بىلىكتى مامان­نىڭ قولىندا» دەدى. وڭ قاناتتىڭ جەتەك­شىسى ماتتەو سالۆيني ءوز قولداۋىن دراگيگە جاقسى دەنساۋلىق ساقتاۋ جۇيەسى، سا­لىق پەن قوعامدىق قىزمەتتى قىسقارتۋ كە­رەكتىگى تۋرالى ۇسىنىستارىمەن ءبىل­دىردى.

ءىرى اۋە كومپانيالارى دا جاپا شەكتى

Air France پەن KLM جاھاندىق پاندەميا سالدارىنان 7،1 ملرد ەۋرو كولەمىندە كىرىستەن قاعىلدى.

اۋە كومپانيالارىنىڭ اقپاراتىنا سۇيەنسەك، 2020 جىلى فرانتسيالىق جانە نيدەرلاندىق تاسىمالداۋشىلاردىڭ تۇتىنۋشىلارى 67 پايىزعا قىسقارعان. ال تۇسەتىن قارجى كولەمى 2019 جىلمەن سالىستىرعاندا 59 پايىزعا ازايعان.

كومپانيالاردىڭ باسشىسى بەن­جامين سميت «2020 جىلى ەكى كومپانيا بۇعان دەيىن اۋە تاسىمالى يندۋستريا­سى باستان كەشپەگەن داعدارىسقا ۇشى­رادى»، دەدى. سونىمەن بىرگە باسشى ەكى كومپانياعا دا فرانتسيا جانە ني­دەر­لاند ۇكىمەتى قولداۋ بىلدىرگەنىن مالىم­دەدى.

فرانتسيا مەن نيدەرلاند ۇكى­مەتتەرىنىڭ روجدەستۆودان كەيىن قايتا ۇشۋعا رۇقسات بەرۋى كومپانيالارعا اسا ۇلكەن پايدا اكەلمەگەنى ءمالىم بولدى. «2021 جىلدى ۆاكتسينالاۋ مەن شەكا­رالاردىڭ اشىلۋىمەن باستادىق»، دەدى ب.سميت.

MLex نارىق اناليزىمەن اينالىساتىن ۇيىم ۇكىمەتتەردىڭ ءوز ەلىنىڭ تاسى­مال­داۋشىلارىنا كومەكتەسۋگە كەلىسكە­نىن حابارلادى. ۇيىمنىڭ ەۋرووداق­تاعى وكىلى نيكولاس حيرست ء«بىز ەۋرو­پا ۇكىمەتتەرىنىڭ اۋە كومپانيالارىنا بو­لەتىن ميللياردتاعان قارىز، قولداۋ مەن گرانتتارىن كورىپ ءجۇرمىز. البەتتە بۇل قاراجاتتىڭ بارلىعى تەڭ ۇيلەستى­رىل­مەدى»، دەدى.

اۋە تاسىمالداۋشىلارىمەن قاتار ۇشاق جاساۋشى كومپانيالار دا شىعىنعا ۇشىرادى. ماسەلەن، Airbus 2020 جىلى 1،1 ملرد ەۋرودان ايىرىلعانىن ءمالىم ەتتى. كومپانيا باسشىسى گيوم فوري وت­كەن جىلدى ء«بىز كۇتكەننەن مۇلدە بولەك بولدى» دەپ قورىتىندىلادى. «2021 جىل دا بەلگىسىزدىككە تولى. پاندەميا ءالى دە قوعامعا، ادام ومىرىنە، ەكونوميكاعا اسەرىن تيگىزىپ كەلەدى»، دەدى ول.

2020 جىلى كومپانيانىڭ كىرىسى 49،9 ملرد ەۋروعا ازايعان. 2019 جىلى Airbus 70،5 ملرد ەۋرو كولەمىندە پايدا كورىپتى. وسى سەبەپپەن كومپانيا ماۋسىم ايىنا قاراي 15 مىڭ قىزمەتكەرىن قىسقارتاتىنىن حابارلادى. بۇل مەكە­مە قىزمەتكەرلەرىنىڭ 11 پايىزى جۇمىس­سىزدار قاتارىنا قوسىلادى دەگەن ءسوز. وعان قوسا ۇشاق جاساۋشى كومپانيا 2020 جىلى تەك 566 ۇشاقتىڭ جاسالعانىن مالىمدەدى. ال 2019 جىلى 768 اۋە كەمەسى دايىندالعان.