الدىندا اتكوپىر بولىپ جاتقان ماقتانىڭ تومارداي-تومارداي تۇيىرشىكتەرىن قولمەن تارقاتىپ, جۇندەي ءتۇتىپ, جىبەكتەي جۇمسارتىپ, بيپازداپ بابىنا كەلتىرەدى ەكەن. سىرتتاي قاراعاندا ەندىگىسى وڭاي كورىنگەن. كۇنى بۇرىن ماتادان دايىندالعان قاپ پىشىندەس تىسىنا الگى تۇبىتتەي تارقاتىلىپ, ۇلپىلدەك كۇيگە ەنگەن ماقتانى قاتتاپ سالسا, ماتراس دايىن بولارداي. كوزى كورمەيتىن ادامعا ماشاقات ءالى الدا ەكەن. ەندى ماتراستىڭ ىشىندەگى ماقتا ىدىراپ كەتپەۋى ءۇشىن ۇستاپ تۇرۋعا ءتيىستى, كوبەلەك كەيىپتەس تۇيمە-تىرەكتەردى ورنالاستىرۋ كەرەك. الدە سىزعىشپەن, الدە قارىستاپ ولشەيتىن شىعار دەپ ەدىم. جوق, قالىپتاسقان ماشىقپەن اتقان وقتاي ءتۇپ-ءتۇزۋ قىلىپ ءتۇسىردى. ولشەمەي-اق. كورمەسە دە. كوز كورمەسە دە كوكىرەك وياۋ ەكەن.
تسەحتاعى بارلىق جۇمىس قولمەن اتقارىلادى. سوندىقتان دا ساپالى. مۇمكىندىگى شەكتەۋلى جانداردىڭ تىككەن ماتراستارىندا جاتقان ادامنىڭ جامباسىنا باتاتىن بۋىلتىق تۇينەكتەر استە بولمايدى ەكەن. بۇل – ۇلكەن فابريكادان تىگىلگەن بۇيىمنان ءبىر ارتىقشىلىعى. ارتىقشىلىقتىڭ ءونىمدى وتكىزەر كەزدە قولبايلار بوگەتى دە بار. ايتالىق, ءبىر ماتراستى دايىنداۋ ءۇشىن بار شارۋا قولمەن اتقارىلاتىندىقتان كوپ ۋاقىت كەتەدى. شيكىزات تا قىمبات. ونى ءبىر شەتى رەسەيدەن, قىرعىزستان مەن وزبەكستاننان جەتكىزەدى. سوندىقتان دا وزىندىك قۇنىنىڭ باعاسىنا اسەرى بار. تەندەرگە تۇسكەن كەزدە تايتالاسا المايدى. تاپسىرىس قابىلداعان سوڭ كەلىسكەن مەرزىمىندە اياقتاۋ كەرەك. وعان ۇلگەرە الماي قالۋ قاۋپى دە تۋىندايدى. باعانى كوتەرسە, ءونىمى وتپەي قالۋى ابدەن مۇمكىن.
– وسى شاعىن تسەح ارقىلى كۇنكورىسىمىزدى ايىرىپ وتىرمىز, – دەيدى تىگىنشى اننا نەمىكينا, – نەگىزىنەن توسەكتىك ورىن جامىلعىلارىن تىگەمىز. ءار ءونىمنىڭ بارىنشا ساپالى بولعانىن قاتاڭ قاداعالايمىز. تۇتىنۋشىنىڭ تالابىنان شىعۋىمىز كەرەك قوي. ولار ءۇشىن بۇل ونىمدەردى كىمدەردىڭ تىككەندىگى ونشالىقتى ماڭىزدى ەمەس. كەلەسى ءونىم ءوتۋى ءۇشىن بۇگىنگىنى ءمىنسىز ەتۋىمىز قاجەت. جامان تۇماۋ جايلاعان ۋاقىتتا دا وبلىستىق مۇگەدەكتەردىڭ ەرىكتى قوعامىنىڭ جۇمىستى ۇيلەستىرە ءبىلۋىنىڭ ناتيجەسىندە قول قۋسىرىپ قاراپ وتىرعان جوقپىز. ەگەر شيكىزاتى بولىپ تۇرسا, ءبىزدىڭ قىز-كەلىنشەكتەر ۋاقىتپەن ساناسپاي جۇمىس ىستەۋگە بار.
ماكينسك قالاسىندا جيىرمادان استام مۇمكىندىگى شەكتەۋلى ادام جۇمىسقا تارتىلعان ەكەن. باسىم كوپشىلىگى – قىز-كەلىنشەكتەر. نەگىزگى كاسىپتەرى – تىگىنشىلىك. قولدان كەلەرى وسى. ءوڭىر قىزىل ايماقتا بولىپ, قىرسىق شالعاندا كوبى ۇيدە وتىرىپ جۇمىس ىستەگەن. تالپىنعاندارىنا وراي ءتاپ-ءتاۋىر تابىستارى دا بار.
وبلىستىق مۇگەدەكتەردىڭ ەرىكتى قوعامىنىڭ توراعاسى سەرىك اكىمباەۆ قوعام مۇشەلەرىنىڭ جاي-كۇيىن, جان-دۇنيەسىن جاقسى بىلەدى. ءوزى دە بالا كەزىنەن بەرى كوز كەمىستىگىنەن قانشاما قيىندىق كورىپ ءوستى. ايتسە دە جىگەرى جاسىعان جوق. ءبىرجان سال اۋدانىنىڭ بىرنەشە كاسىپورىنىندا رەتىنە قاراي جۇمىس ىستەدى. قولى جاتتىقتى, جۇمىس بارىسىن كوڭىلىنە مىقتاپ توقىدى. سول زەيىن, زەرەكتىگىنە وراي الدىنان جۇمىس ۇركىپ وتىراتىن بولدى. قوعامدىق جۇمىستارعا سول كەزدىڭ وزىندە دە بەل بۋىپ كىرىسىپ كەتەتىن. ەندى مىنە, قوعام توراعاسى. وڭاي-وسپاق شارۋا ەمەس. مىڭداعان ادامنىڭ ماقسات-مۇراتى توعىسقان جەر. ارىز-شاعىمدارىن دا, ءوتىنىش-تىلەكتەرىن دە وسى قوعامعا ايتادى. ال الەۋەتى ازداۋ قوعام ءبارىنىڭ بىردەي ءوتىنىشىن ورىنداپ تاستاۋعا قاۋقارى جەتپەگەنىمەن, قاناتىمەن سۋ سەپكەن قارلىعاشتاي جاقسىلىققا سەبەپشى بولۋعا ۇمتىلادى. ول ءۇشىن ەڭ الدىمەن, جەرگىلىكتى اتقارۋشى ورگاندارمەن ءتىل تابىسىپ, بىرلەسە جۇمىس ىستەگەن ءجون.
– قامقورلىق جاساۋ قازاقتىڭ قانىنداعى قاسيەت قوي. قامقورلىققا ءتىپتى ساۋ ادامداردىڭ وزدەرى ءزارۋ بولىپ جاتادى ەمەس پە؟ ال مۇمكىندىگى شەكتەۋلى ادامداردىڭ مۇقتاجدىقتارىنا قول سوزۋ ادامگەرشىلىك, – دەيدى سەرىك اكىمباەۆ, – قازىرگى كۇنى بىرقاتار جۇمىس اتقارىلىپ جاتىر. ەكى قالا مەن 17 اۋداندا فيليالدارىمىز جۇمىس ىستەيدى. وزگەگە ماسىل بولماۋ ءۇشىن جۇمىس ىستەيمىن, ءوزىمنىڭ اقادال ەڭبەگىممەن كۇن كورەمىن دەگەن ادامدارعا جاعداي تۋعىزۋ پارىز. ءبىز اركىمنىڭ ەڭبەككە قانشالىقتى قابىلەتى بار ەكەندىگىن ساراپتاپ الىپ, جۇمىسقا ورنالاستىرامىز. وزگە دە الەۋمەتتىك-تۇرمىستىق ماسەلەلەردىڭ شەشىلۋىن قاداعالايمىز.
قازىر مەملەكەت تاراپىنان بۇل ماسەلەگە ءجىتى كوڭىل بولىنگەن. مۇمكىندىگى شەكتەۋلى ادامداردىڭ قوعامنىڭ ءبىر مۇشەسى رەتىندە ەمىن-ەركىن جۇمىس ىستەۋىنە جاعداي جاسالىپ وتىر. ەڭ باستىسى, تاعدىردىڭ سالعان ىسىنە ەمەننىڭ ءيىر بۇتاعىنداي قاسقايا قارسى تۇراتىن كۇش-جىگەر بار ولاردىڭ بويلارىندا. سول قاسيەت بار بەينەتتى ىسىرىپ تاستاپ, ۇشپاققا شىعارماق.
اقمولا وبلىسى
