رودجەريو سەني 1973 جىلدىڭ 22 قاڭتارىندا پارانا شتاتىنىڭ وڭتۇستىك-شىعىسىندا ورنالاسقان پاتۋ-برانكۋ دەپ اتالاتىن شاعىن عانا قالادا دۇنيەگە كەلدى. بويى – 188 سانتيمەتر, سالماعى – 82 كيلو. كەيىننەن ونىڭ وتباسى ماتۋ-گروسۋ شتاتىنداعى سينوپ شاھارىنا قونىس اۋداردى. سول جاقتا بوزبالانىڭ فۋتبولعا اڭسارى اۋىپ, كوپ ۇزاماي ول «سان-پاۋلۋ» سكاۋتتارىنىڭ نازارىنا ىلىكتى. 1992 جىلى نەگىزگى قۇراماعا قابىلدانعانىمەن, 19 جاستاعى رودجەريوعا ءوزىنىڭ جۇلدىزدى ءساتىن تۋرا ءتورت جىل كۇتۋىنە تۋرا كەلدى. ويتكەنى, ول كەزدە ايتۋلى كلۋبتىڭ قاقپاسىن الەم چەمپيونى, قۇرلىقارالىق جانە ليبەرتادورەس كۋبوكتارىنىڭ يەگەرى, ايگىلى دزەتتي قورعاعان. 1994 جىلى ول «سانتوسقا» اۋىسقاننان كەيىن سەني «سان-پاۋلۋدىڭ» نەگىزگى قاقپاشىسىنا اينالدى.
شىن مانىندە, سەنيدىڭ كەرەمەت قاقپاشى ەكەنىنە 2005 جىلى جاپونيادا وتكەن كلۋبتىق الەم چەمپيوناتىندا انىق كوز جەتكىزگەن ەدىك. فينالدا «ليۆەرپۋل» مەن «سان-پاۋلۋ» كەزدەستى. ماتچتىڭ 27-مينۋتىندا جارتىلاي قورعاۋشى مانەيرو وڭتۇستىك امەريكادان كەلگەن كوماندانى العا شىعاردى. سودان كەيىن-اق اعىلشىندار تولاسسىز شابۋىلدار ۇيىمداستىرىپ, ءبىر ساتكە دە دامىلداعان جوق. «سان-پاۋلۋدىڭ» قورعاۋشىلارى كوپ قاتەلەسىپ, قاقپاعا تالاي رەت قاۋىپ تە ءتوندى. بىراق بۇل كەزدەسۋدە قاتەلىككە بوي الدىرماعان ءبىر عانا ويىنشى بولدى. ول – رودجەريو سەني. برازيليانىڭ ورەنى ءوز قاقپاسىن سان مارتە اسا قاۋىپتى جاعدايلاردان قۇتقارىپ, تالاي رەت كەرەمەت سەيۆ جاسادى. جەر-جاھاننىڭ جانكۇيەرلەرى رودجەريونىڭ اسقان شەبەرلىگىنە تاڭدانىپ, تامسانا تاڭداي قاقتى. سول ەسەپ ماتچتىڭ سوڭىنا دەيىن وزگەرگەن جوق. اقىرى «سان-پاۋلۋ» الەم چەمپيونى اتاندى! فينالدىق سايىس اياقتالعان سوڭ برازيليالىق قاقپاشى وسى جارىستىڭ ەڭ ۇزدىك ويىنشىسىنا تيەسىلى «التىن دوپتى» يەلەندى.
بۇل رەتتە ءبىز تەك ءوز كوزىمىزبەن كورگەندى عانا اڭگىمەلەپ وتىرمىز. ال كورمەگەنىمىز جانە وسى كۇنگە دەيىن بىلمەگەنىمىز ودان دا كوپ ەكەن. ماسەلەن, سەنيدىڭ ءۇش دۇركىن برازيليا چەمپيونى, ەكى دۇركىن ليبەرتادورەس كۋبوگىنىڭ جانە ءبىر مارتە برازيليا سۋپەركۋبوگىنىڭ يەگەرى, قۇرلىقارالىق كۋبوك پەن وڭتۇستىك امەريكا كۋبوگىنىڭ يەگەرى دەگەن اتاقتارى تاعى بار. وزىنە عانا تيەسىلى جەكە سىيلىقتارىنا كەلەتىن بولساق, ءار جىلدارى ول مىناداي جۇلدەلەردى يەلەندى: الەمنىڭ (2005), وڭتۇستىك امەريكانىڭ (2005, 2006, 2007) جانە برازيليانىڭ ەڭ ۇزدىك قاقپاشىسى (2002, 2003, 2005, 2006), ليبەرتادورەس كۋبوگىنىڭ ەڭ مىقتى قاقپاشىسى جانە ۇزدىك ويىنشىسى (2005), وڭتۇستىك امەريكا كۋبوگىنىڭ ەڭ ۇزدىك قاقپاشىسى (2014), برازيليانىڭ ەڭ ۇزدىك فۋتبولشىسى (2006, 2007). سونىمەن قاتار سان مارتە ءوز ەلى مەن ءوز قۇرلىعىنىڭ شارتتى قۇرامالارىنا ەندى. وسى ورايدا ءبىز تەك نەگىزگى جارىستاردا جەڭىپ العان جۇلدەلەرىن عانا تىلگە تيەك ەتتىك.
برازيليانىڭ ۇلتتىق قۇراماسى ساپىندا سەني 17 كەزدەسۋ وتكىزىپ, ءوز قاقپاسىنا 13 دوپ جىبەرىپ الدى. جاسىل الاڭعا ول نەگىزگى قۇرامدا سيرەك شىققانىمەن, 1997 جىلى كونفەدەراتسيا كۋبوگىنىڭ يەگەرى جانە 2002 جىلى الەم چەمپيونى اتاقتارىن يەلەندى. ال «سان-پاۋلۋدىڭ» ساپىندا رودجەريو 941 كەزدەسۋ وتكىزگەن ەكەن. ءيا, 23 جىل بويى ءبىر عانا كلۋبتىڭ ساپىندا ويناپ, ءبىر عانا كوماندانىڭ نامىسىن قورعاۋ قانداي كەرەمەت!
بىراق رودجەريو سەنيدىڭ نەگىزگى رەكوردى بۇل ەمەس. ونىڭ ەسىمى ەڭ كوپ گول سوققان قاقپاشى رەتىندە الەمدىك فۋتبول تاريحىندا التىن ارىپتەرمەن جازۋلى. ءوزىنىڭ العاشقى دوبىن گولكيپەر 1997 جىلدىڭ 15 اقپانىندا «ۋنيو سان-جاونىڭ» قاقپاسىنا توعىتتى. سول كەزدەن بەرى رودجەريو بارلىعى 131 رەت نىسانانى ءدال كوزدەدى. تارقاتىپ ايتساق, 70 رەت پەنالتيدى جانە 61 رەت ايىپ دوبىن توردا تۋلاتتى. ول از دەسەڭىز, تاعى سەگىز رەت ناتيجەلى پاس بەرگەنىن دە ايتا كەتكەن ابزال. ياعني, سەني سوققان گولدارىنىڭ سانى جاعىنان داڭقتى حوسە-لۋيس چيلاۆەرتتىڭ الدىن ەكى وراپ تۇر. سان مارتە دۋبل اۆتورى اتانعان ايتۋلى قاقپاشى ءوز كارەراسىندا تەك حەت-تريك جاساي الماپتى.
رودجەريو سەني ءوزىنىڭ سپورتتىق جولىن وسىدان بەس جىل بۇرىن, ناقتىلاپ ايتساق, 2015 جىلدىڭ جەلتوقسان ايىندا اياقتادى. ول كەزدە رودجەريونىڭ جاسى 43-كە تاياپ قالعان ەدى. فۋتبولمەن قوش ايتىسقان سوڭ ول برازيليانىڭ ءتۇرلى كوماندالارىن جاتتىقتىردى. بۇل كۇندەرى ايگىلى قاقپاشى ريو-دە-جانەيرونىڭ «فلامەنگو» كلۋبىنىڭ باس باپكەرى قىزمەتىن ابىرويلى اتقارۋدا.
