ورتالىقتىڭ نەگىزگى ماقساتى – ۇلتتىق مادەنيەت پەن تاعلىمدى تاريحتى, تۇنىق تاربيە مەن ونەگەلى ادەبيەتتى ونە بويلارىنا تەرەڭ سىڭىرگەن زيالى قاۋىم وكىلدەرى مەن قوعام قايراتكەرلەرى, اقىن-جازۋشىلار مەن قالامگەر-تىلشىلەردىڭ ەلەۋلى ەڭبەكتەرى ارقىلى پاراساتتى قوعام قالىپتاستىرۋ. بۇل رەتتە سىبايلاس جەمقورلىققا قارسى ءىس-قيمىل اگەنتتىگى مادەنيەت جانە سپورت مينيسترلىگىمەن بىرلەسىپ, ەل اۋماعىندا ورنالاسقان كىتاپحانالاردا «پاراساتتى جول» ورتالىعىن اشۋ باستاماسىن قولعا العان.
كىتاپحانادا وتكەن يگى شارادا بىرەگەي جاڭا جوبانىڭ ماقساتى مەن مىندەتى ورتاعا سالىنىپ, ورتالىقتىڭ الداعى جۇمىس جوسپارى تانىستىرىلدى. كەلەلى جيىنعا ەلىمىزگە بەلگىلى جازۋشى مارحابات بايعۇت, سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ميراس قارعاباي, قارىمدى قالامگەرلەر مەن قوعام بەلسەندىلەرى, باق وكىلدەرى, سونداي-اق وبلىسقا قاراستى اۋداندىق ورتالىقتاندىرىلعان كىتاپحانالار جۇيەسىنىڭ ماماندارى بەينەبايلانىس ارقىلى قاتىستى.
پايىمدى پىكىرلەر مەن ورامدى ويلار ورتاعا سالىنعان شارادا ءسوز العان ميراس اسقارباي ۇلى يگى باستاما تۇركىستان وڭىرىندە ادالدىق اتموسفەراسىن قالىپتاستىرۋدا ايرىقشا ماڭىزعا يە ەكەندىگىن اتاپ ءوتتى. سونداي-اق جيىنعا قاتىسۋشىلار وبلىسقا قاراستى 392 كوپشىلىك كىتاپحانالاردا «پاراساتتى جول» ورتالىعىن اشۋ تالاي جاستىڭ ساناسىنا سىلكىنىس جاساۋعا جانە وقىرمان قاۋىمنىڭ تانىم-تۇيسىگىنە ىزگى وي قالدىرۋعا, بارماق باستى, كوز قىستى ارەكەتتەردەن الشاق بولىپ, ىزگىلىكتى ىستەردىڭ ءىزىن جالعاستىرۋعا ەداۋىر ىقپال ەتەتىنىنە سەنىمدى ەكەندىكتەرىن ءبىلدىردى.
