جاستار فەستيۆالى جالاۋىن كوتەردى

وبلىستىق جاستار فەستيۆالىنىڭ شىمىلدىعىن اۋدان جاستارى “ەقىۇ – قازاقستاننىڭ الەمدىك ابىرويى” دەگەن تاقىرىپپەن اشتى. اتالعان كەزدەسۋگە الماتى وبلىسىنىڭ اۋدان, قالالارىنان اعا ۇرپاق وكىلدەرى مەن جاستار جي­نالىپ, ونىڭ ماز­مۇنىن تولىقتىردى. ەۋروپاداعى قاۋىپ­سىزدىك جانە ىنتىماق­تاستىق ۇيىمىنا ازيا جانە تمد مەملەكەتتەرى اراسىنان توراعالىق ءتىز­گىنىن تۇڭعىش ۇستاعان ەلى­مىزدىڭ اسقاق ابىرويى جايلى جاستار الدىندا ءسوز سويلەگەن اۋدان اكىمى ماحاببات بيگەلديەۆ ءاردايىم جاستاردىڭ العى شەپتەن كورىنىپ, ەكونوميكانى نىعايتۋ­داعى ىرگەلى ىستەرىن ورتاعا سالسا, وب­لىستىق ىشكى ساياسات باسقار­ما­سىنىڭ باستىعى گ.سۇلەيمەنوۆا بيىلعى وبلىستىق فەستيۆالدىڭ وسىندا ءوتۋى تەگىن ەمەستىگىن جەت­كىزدى. جامبىل اۋدانى باتىرلار مەن اقىنداردىڭ قۇتتى مەكەنى بولعاندىقتان جىل سايىن ورەلى ىستەرىمەن ەرەكشەلەنگەنىنە, مەملە­كەتتىك جاستار ساياساتىن جۇزەگە اسىرۋدا ايماقتا اۋقىمدى جۇمىس­تار جۇزەگە اسقانىنا توقتالدى. ەل تاريحى مەن مەملەكەت باس­شىسىنىڭ سارابدال ساياساتىن ار­قاۋ ەتكەن الۋان تاقىرىپتاردى كوتەرگەن اۋدان جاستارى ورتالىق الاڭدا لەگ-لەگىمەن جالىندى ءسوز, ەلجاندىلىق كوزقاراسىمەن جار­قى­راي كورىندى. جاس جۇرەككە وت بەرە­تىن, ەلىم-جەرىم دەپ ەمىرەنە­تىن, مەملەكەتىم دەپ مەرەيلەنەتىن شۇعىلالى ساتكە جينالعاندار تارا­پىنان قولداۋ تاپتى. ون جا­سار وعىلان, جەلكىلدەگەن جىگىت, بوي تۇزەگەن بويجەتكەننىڭ ەلگە, جەرگە دەگەن شىنايى سەزىمدەرى بۇگىنگى بەيبىت ءومىردىڭ بايانىن, كەڭ-بايتاق قازاق­ستاننىڭ ابىرويىن, تۋعان جەر توپىراعىنىڭ قاسيەتىن سەزىنۋىمەن ەرەك­شەلەندى. اسقاق پوەزيا اۋەگە شا­رىق­تاپ, كورىكتى سوزدەر كوكەيگە قۇيىلدى. ­فەستيۆالدا اعا ۇرپاق وكىلدەرى اتىنان وبلىستىق ارداگەرلەر كەڭەسىنىڭ ءتور­اعاسى ەگەۋبەك دالباعاەۆ سويلەپ, جاس­تارعا باتا بەردى. جامبىل جاس­تارى­نىڭ ورتاق تىلەگىن شوقان ءۋالي­حانوۆ اتىن­داعى ورتا مەكتەپ­تىڭ 11-سىنىپ وقۋشىسى, گرەكيادا وتكەن حالىق­ارالىق وليمپيادانىڭ التىن جۇلدەسىن يەلەنگەن ءبىلىم وزاتى دىنمۇحامەد ەرمەك جەتكىزدى. جيىن­دا اۋدان جاستارىنىڭ ۇندەۋى قابىلداندى. مەملەكەتتىك جاستار ساياساتىن جۇزەگە اسىرۋعا ەلەۋلى ۇلەس قوسقان اۋدان وزاتتارى وبلىس­تىق ىشكى ساياسات باسقارماسىنىڭ جانە جامبىل اۋدانى اكىمىنىڭ العىس حاتتارىمەن ماراپاتتالدى. كۇمىسجان بايجان. الماتى وبلىسى.