باياناۋىل مەملەكەتتىك ۇلتتىق تابيعي ساياباعىنىڭ ەكسكۋرسيا جونىندەگى نۇسقاۋشى مەملەكەتتىك ينسپەكتورى التىنبەك قۇرمانوۆ ساياباقتا سىلەۋسىن دە, بۇلان, ارقار, قابان دا بار ەكەنىن اتاپ ءوتتى. ولاردىڭ ءبارى ەرەكشە قورعالعان.
– بىزدە مونيتورينگ جۇرگىزەتىن عىلىمي ءبولىم بار. كۇن سايىن قىزمەتكەرلەر كورگەن اڭدارىنا ەسەپ جۇرگىزىپ, عىلىمي بولىمگە تاپسىرىپ وتىرادى. بىزدە مەكەندەيتىن اڭداردىڭ قانشا بار ەكەنىن, ولاردىڭ ازىعى بار-جوعىن انىقتاپ وتىرامىز, – دەيدى التىنبەك قۇرمانوۆ.
ينپەكتوردىڭ ايتۋىنشا, قىس ايلارىندا ساياباقتا اڭدار سانى كوبەيەدى.
– سىلەۋسىندەر تاۋدا قويان اۋلاپ جەيدى. ءوز بەتىمەن ءومىر سۇرە الادى. ازىعى بار بولعان سوڭ ءجۇر. جالپى, باياناۋىلدا قىس ايلارىندا دەمالۋشىلار بولمايدى. سوندىقتان اڭداردىڭ كوبى كەلە باستايدى. جازدا داڭعىر-دۇڭگىر مۋزىكا بولادى. اڭدار تىنىش جاققا كەتىپ قالادى, – دەيدى التىنبەك قۇرمانوۆ.
