پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلىمىزدىڭ 2021 جىلعى قاڭتارداعى الەۋمەتتىك-ەكونوميكالىق دامۋىنىڭ جانە رەسپۋبليكالىق بيۋدجەتتىڭ اتقارىلۋىنىڭ قورىتىندىلارى قارالدى.
ەلىمىزدىڭ ونەركاسىپ سەكتورىنداعى قازىرگى جاعداي تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ باياندادى. 2021 جىلدىڭ قاڭتار ايىندا ەلىمىزدىڭ وڭدەۋ ونەركاسىبىندە وڭ ءۇردىس ساقتالدى.
ماشينا جاساۋ سالاسىندا ناقتى كولەم يندەكسى 116,2% قۇرادى. اۆتوكولىك قۇرالدارى, ترەيلەرلەر جانە اشىق تىركەمەلەر, ماشينالار مەن جابدىقتار ءوندىرىسى, وزگە دە كولىك قۇرالدارىن, كومپيۋتەرلەر, ەلەكتروندىق جانە وپتيكالىق جابدىقتار جاساۋ, جوندەۋ جانە ورناتۋ ەسەبىنەن ءوستى.
ءمينيستردىڭ ايتۋىنشا, ءتۇستى مەتاللۋرگيادا دا وڭ ديناميكا بايقالدى. ءوسىم 106,6% قۇرادى. وعان تازارتىلعان التىن, تازارتىلعان كۇمىس, قۇيما التىن, تۇيىرشىكتەردەگى كۇمىس, كاتودتى مىستىڭ جانە باسقا دا كورسەتكىشتەردىڭ ءوسىمى ەسەبىنەن قول جەتكىزىلدى. قارا مەتاللۋرگيادا ناقتى كولەم يندەكسى 96,9% قۇرادى. شيكىزاتتىڭ جەتكىلىكسىزدىگىنە, تۇتىنۋشىلاردىڭ تاپسىرىستارىنىڭ ازايۋىنا بايلانىستى شويىن ءوندىرىسى, رەلستەر, بولات قۇبىرلار, ارماتۋرالىق پروكات تومەندەدى.
«سونىمەن قاتار كاسىپورىندارمەن بىرلەسىپ ەكسپورتتىق الەۋەتتى ءونىمدى وتكىزۋدىڭ بالامالى نارىقتارىنا قايتا ءبولۋ جۇمىستارىن جۇرگىزىپ جاتىرمىز. جىل سوڭىنا قاراي بىرلەسكەن جۇمىس ناتيجەسىندە اتالعان كورسەتكىشكە قول جەتكىزۋ جوسپاردا بار», دەدى ب. اتامقۇلوۆ.
فارماتسەۆتيكا ونەركاسىبىندە ءوندىرىس كولەمى 4% ارتتى. «حيمفارم» اكتسيونەرلىك قوعامىندا جانە «Viva pharm» جاۋاپكەرشىلىگى شەكتەۋلى سەرىكتەستىگىندە شىعارىلاتىن ءونىم كولەمى 2 ەسەگە ءوستى. «Dolce» كاسىپورنىندا 18% ارتتى.
نەگىزىنەن, ءوسىم حالىقتىڭ دارىلىك زاتتار مەن مەديتسينالىق بۇيىمدارعا دەگەن سۇرانىسىنىڭ ارتۋى ەسەبىنەن بولدى. دەزينفەكتسيالىق قۇرالدار مەن مينەرالدى تىڭايتقىشتارعا سۇرانىستىڭ ارتۋى حيميا ونەركاسىبىنىڭ ءوندىرىس كولەمىن ارتتىردى. ءوسىم 12,8% قۇرادى. قۇرىلىس ماتەريالدارى ءوندىرىسى 111,8% بولدى. وعان پورتلاند-تسەمەنت, گيپس, سيليكات جانە قوج كىرپىشتەرى, قۇرىلىس ەرىتىندىلەرى ءوندىرىسىنىڭ ارتۋى ەسەبىنەن قول جەتكىزىلدى. بيىل وڭدەۋ ونەركاسىبىندە نەگىزگى كاپيتالعا سالىناتىن ينۆەستيتسيا كولەمى 1,2 ترلن تەڭگە بولادى دەپ جوسپارلانعان. بۇل رەتتە ەڭبەك ونىمدىلىگى 5,6% ءوسۋى ءتيىس.
«يندۋستريالاندىرۋ كارتاسى شەڭبەرىندە بيىل جالپى سوماسى 1,93 ترلن تەڭگەگە 112 جوبانى ىسكە قوسۋ جوسپارلانعان. 13,4 مىڭ جۇمىس ورنى اشىلادى», دەدى مينيستر.
سونىمەن قاتار شەكتەۋ شارالارى كولىك سالاسىنداعى ناقتى كولەم يندەكسىنە تەرىس اسەر ەتۋدە. 2021 جىلى قاڭتار ايىندا بۇل كورسەتكىش 82,6% قۇرادى. بۇل رەتتە ترانزيتتىك كونتەينەرلىك تاسىمالدا 81,4 مىڭ جيىرما فۋنتتىق بالاما كولەمىندە وڭ ديناميكا ساقتالدى. ءوسىم 27% قۇرادى.
«كولىكتىڭ بارلىق تۇرىمەن جۇك تاسىمالداۋ كولەمى 0,28 ملرد توننا نەمەسە وتكەن جىلدىڭ سايكەس كەزەڭىمەن سالىستىرعاندا 93,4% قۇرادى», دەدى ب. اتامقۇلوۆ.
جىل سوڭىنا دەيىن رەسپۋبليكالىق ماڭىزى بار اۆتوجولداردىڭ 90% جانە جەرگىلىكتى جولداردىڭ 76% جاقسى جانە قاناعاتتانارلىق جاعدايعا جەتكىزۋ جوسپارلانىپ وتىر. 6,5 مىڭ شاقىرىم اقىلى جول ەنگىزىلىپ, ۇلتتىق ستاندارتقا سايكەس كەلەتىن جول سەرۆيسىن 66% جەتكىزۋ كوزدەلگەن.
«تەمىرجول كولىگىمەن ترانزيت 23,1 ملن تونناعا دەيىن نەمەسە 12% ارتادى دەپ وتىرمىز. ونىڭ ىشىندە كونتەينەرلەر ءترانزيتىن 1 ملن جيىرما فۋنتتىق بالاماعا جەتكىزەمىز», دەدى مينيستر.
قۇرىلىس سالاسىندا ناقتى كولەم يندەكسى 2021 جىلدىڭ قاڭتار ايىندا 107% بولدى. بارلىق وڭىردە وڭ ديناميكا بايقالادى. تۇرعىن ءۇي قۇرىلىسىندا وسى جىلدىڭ ءبىرىنشى ايىندا 801 مىڭ شارشى مەتر باسپانا پايدالانۋعا بەرىلدى. ياعني, 2020 جىلدىڭ سايكەس كەزەڭىمەن سالىستىرعاندا 109,4%. رەسپۋبليكا بويىنشا بارلىعى 6810 باسپانا پايدالانۋعا بەرىلدى.
«وتكەن جىلمەن سالىستىرعاندا تۇرعىن ءۇيدى پايدالانۋعا بەرۋ كولەمى ماڭعىستاۋ وبلىسىنان باسقا, 16 وڭىردە ارتتى. جالپى بيىل ەلىمىزدە 17 ملن شارشى مەتر تۇرعىن ءۇي سالىنادى. مەملەكەت باسشىسىنىڭ تاپسىرماسىنا سايكەس تۇرعىن ءۇي قۇرىلىسى كەزىندە جەرگىلىكتى قامتۋ ۇلەسىن ارتتىرۋعا ءتيىسپىز. بۇل بيزنەس ءۇشىن قۇرىلىس ماتەريالدارىنىڭ وتاندىق نارىعىن دامىتۋعا قوسىمشا مۇمكىندىك بەرەدى», دەدى مينيستر.
سونداي-اق سالاداعى قاجەتتىلىكتى ايقىنداۋ ماقساتىندا نەگىزگى 24 پوزيتسيا بويىنشا قۇرىلىس ماتەريالدارى نارىعىنا تالداۋ جۇرگىزىلدى.
«بۇگىنگى تاڭدا وتاندىق وندىرۋشىلەر 10 تاۋار پوزيتسياسى بويىنشا ىشكى نارىقتىڭ قاجەتتىلىگىن تولىعىمەن وتەي الادى. 11 پوزيتسيا بويىنشا ەلىمىزدىڭ كاسىپورىندارى شامامەن 50% قامتاماسىز ەتەدى. ال لينولەۋم, تۇسقاعاز, سانفايانس سياقتى 3 پوزيتسيا بويىنشا ىشكى نارىقتا ازىرگە ءوندىرىس جوق», دەپ تۇيىندەدى ب. اتامقۇلوۆ.
