سونىمەن قاتار ۆاكتسينانى كولىكپەن جەتكىزۋدى دۇرىس ۇيىمداستىرۋ جانە ونى تالاپقا ساي ساقتاۋ ءۇشىن مۇزداتقىش قوندىرعىلار, رەفريجەراتورلار جانە تەرموكونتەينەرلەر ساتىپ الىنعان.
– ەكپە سالۋ ءىسىنىڭ اشىقتىعىن قامتاماسىز ەتۋ ءۇشىن ءبىز بۇرىن بولىپ كورمەگەن ءىس-شارالارعا باردىق: ءاربىر ەكپە كابينەتىنە ول جەردە بولعان جاعدايدى ونلاين رەجىمدە كورسەتىپ وتىراتىن بەينەكامەرالار ورناتتىق. مۇنىڭ ءوزى ءبىزدىڭ جانە ازاماتتارىمىزدىڭ ۆاكتسينالاۋ بارىسىنىڭ قاۋىپسىزدىگىنە دەگەن سەنىمىن كۇشەيتەدى. ياعني كەرەك بولعان جاعدايدا بىزدە ەكپە سالىنعانى تۋرالى فاكتىنىڭ راستىعىن دالەلدەۋگە مۇمكىندىك بار. جانە بۇل بەينەتۇسىرىلىمدەر جىلدىڭ سوڭىنا دەيىن ساقتالادى, – دەيدى وبلىستىڭ باس دارىگەرى.
قاراعاندى وبلىسىندا ۆاكتسينالاۋ كولەمى اي وتكەن سايىن ۇلعايا بەرمەك. جەرگىلىكتى دەنساۋلىق ساقتاۋ باسقارماسى جىل اياعىنا دەيىن ءوڭىردىڭ 700 مىڭعا جۋىق تۇرعىنىن ەكپەدەن وتكىزۋدى جوسپارلاعان. ازىرگە كەيبىر مالىمەتتەرگە قاراعاندا, مەديتسينا سالاسىنداعى 600-دەن استام قىزمەتكەر ۆاكتسينا سالدىرىپتى.
ەسكە سالار بولساق, ەلىمىزدەگىدەي قاراعاندى وبلىسىندا دا ۆاكتسينالاۋ ءىس-شاراسىنا الدىمەن مەديتسينا قىزمەتكەرلەرى تاۋەكەلگە بەل بۋىپ, ءۇن قوستى. جالپى جوسپار بويىنشا كوروناۆيرۋسقا قارسى ەكپەنى ءبىرىنشى كەزەكتە ينفەكتسيالىق اۋرۋحانالاردىڭ, مەديتسينالىق جەدەل جاردەم مەن جانساقتاۋ بولىمشەلەرىنىڭ, العاشقى مەديتسينالىق-سانيتارلىق كومەكتىڭ, قابىلداۋ بولمەسىنىڭ, سانەپيدقىزمەتتىڭ 100 مىڭداي قىزمەتكەرى الادى دەگەن بولجام بار. ەكىنشى كەزەڭدە جالپى ءبىلىم بەرەتىن مەكتەپتەردىڭ, جوعارى وقۋ ورىندارىنىڭ پەداگوگتەرى جانە مەديتسينالىق قىزمەت كورسەتۋ سالاسىنىڭ وكىلدەرىنەن تۇراتىن 150 مىڭعا جۋىق ادام ۆاكتسينالانباق. ال ءۇشىنشى كەزەڭنىڭ ۇلەسىنە مەكتەپ-ينتەرناتتىڭ, مەكتەپكە دەيىنگى بالالار مەكەمەلەرىنىڭ پەداگوگتەرىن, ستۋدەنتتەردى, سوزىلمالى اۋرۋلارى بار تۇرعىنداردى قوسقاندا بارلىعى 600 مىڭ ادام كەلەدى دەگەن جوسپار بار.
قازىرگى تاڭدا «جاسىل ايماققا» قايتا ورالعان قاراعاندى وبلىسىنداعى ەپيدەميالىق احۋال تۇراقتالىپ كەلەدى. مىسالى, ينفەكتسيالىق ستاتسيونارلاردا 500 پاتسيەنت ەم الىپ جاتىر. بۇل بار بولعانى جالپى توسەكتىك ورىن قورىنىڭ 11%-ىن عانا قۇرايدى.
دارىگەر ماماندار كوروناۆيرۋس ينفەكتسياسى ۆاكتسيناعا باعىناتىن سىرقات تۇرىنە جاتادى دەپ ەسەپتەيدى. سونداي-اق ولار ەلىمىز بويىنشا سالىنىپ جاتقان ۆاكتسينا تۇرلەرىنىڭ قاتاڭ تەكسەرۋ-سۇرىپتاۋدان وتكەنىن, سول سەبەپتى دە پرەپاراتتاردىڭ قاۋىپسىزدىگى مەن تيىمدىلىگىنە كۇمانمەن قاراماۋ كەرەك ەكەنىن ايتادى. سوندىقتان ماماندار جۇرتتى مەسسەندجەرلەردەگى نەشە ءتۇرلى كۇماندى اقپاراتتاردىڭ جەتەگىندە كەتە بەرمەي, رەسمي دەرەك كوزدەرىنىڭ شىنايى مالىمەتتەرىنە دەن قويۋعا شاقىرادى.
وسى ورايدا ايتا كەتۋ كەرەك, وبلىستا العاشقى كۇندەرى ەكپە سالدىرعان مەديتسينا قىزمەتكەرلەرىنىڭ ىستىعى كوتەرىلىپ, ول 37,8 گرادۋسقا دەيىن جەتكەن بولاتىن. قاراعاندى وبلىستىق دەنساۋلىق ساقتاۋ باسقارماسىنا قاراستى قوعامدىق دەنساۋلىق ساقتاۋ قىزمەتىنىڭ جەتەكشىسى بيبىگۇل تولەگەنوۆا مۇنى جاقسى كورسەتكىش دەپ باعالايدى. «نەگە دەسەڭىز, – دەيدى ول, – تەمپەراتۋرا كوتەرىلگەن سايىن انتيدەنە بەلسەندى تۇردە قالىپتاسىپ, يممۋندىق جۇيە جاقسى جۇمىس ىستەي باستايدى».
سونداي-اق مامان ۆاكتسينالاۋدىڭ پاندەميادان ساقتاپ قالاتىن جالعىز عانا جول ەكەنىن ايتادى. «ەكپە سالدىرۋ ناۋقانى تۋرالى جاعىمسىز پىكىرلەر تەك الەۋمەتتىك جەلىلەردە عانا ايتىلىپ ءجۇر. ال ەمحانالارداعى جاعدايعا قاراساق, ادامدار كۇندە حابارلاسىپ, مۇمكىندىكتەرىنە قاراي ەكپە سالدىرۋعا نيەتتى بولىپ جاتىر», دەيدى وبلىستاعى قوعامدىق دەنساۋلىق ساقتاۋ قىزمەتىنىڭ جەتەكشىسى.
جاسىراتىنى جوق, قازىر قوعامدا «نەگە تەك رەسەيلىك «سپۋتنيك V» عانا؟» دەگەن پىكىرلەر ايتىلىپ قالىپ ءجۇر. بۇل جەردە ماماندار كەلتىرگەن ءۋاج بەن دالەلگە نازار اۋدارساق, جاعداي شىنىندا دا كۇردەلى ەكەن. ماسەلەن, كەيبىرەۋلەر ايتقانداي, امەريكالىق Phizer كومپانياسىنىڭ ءونىمىن ساتىپ العانىمەن, ونى ەلىمىزگە جەتكىزۋدىڭ جولى ءتىپتى دە وڭاي ەمەس كورىنەدى. ول پرەپاراتتى تەك قانا -80 گرادۋس تەمپەراتۋرانى قاتاڭ ساقتاي وتىرىپ تاسىمالداۋ كەرەك. شەتەلدىك ۆاكتسينانى امالداپ جەتكىزگەن كۇننىڭ وزىندە ونى پايداعا جاراتۋ ءۇشىن تەك الماتى مەن نۇر-سۇلتان قالالارىندا عانا ورتالىق اشۋ مۇمكىندىگى بار ەكەن. باسقا وڭىرلەرگە جەتكىزۋ ازىرگە قولدان كەلمەيتىن شارۋا دەگەندى ايتادى ماماندار.
ۆاكتسينالاۋعا قاتىستى تاعى ءبىر جاڭالىق: 15 اقپاننان باستاپ قاراعاندى فارماتسەۆتيكالىق كەشەنىندە ترانسفەرتتىك تەحنولوگياعا ارقا سۇيەپ وندىرىلگەن ەكپە كونۆەيەردەن شىعۋى مۇمكىن. ال الدىمىزداعى ءساۋىر ايىندا وتاندىق QazCovid-in ۆاكتسيناسى وندىرىلە باستايدى دەگەن دەرەك بار.
قاراعاندى وبلىسى
