كورەي حالىقتىق دەموكراتيالىق رەسپۋبليكاسنىڭ باسشىسى كيم چەن ىن ارميانى بارىنشا جوعارى دايىندىق ساپىنا كەلۋگە شاقىردى. بۇل تۋرالى وڭتۇستىككورەيالىق «رەنحاپ» اگەنتتىگىنىڭ دەرەگىنە سىلتەمە جاساعان Lenta.ru حابارلادى.
كيم چەن ىننىڭ 24 جەلتوقساندا نامپحو قالاسىنداعى كورەيا حالىق ارمياسى 526-بولىمىنە كەلگەن كەزىندە سوعىستىڭ ەسكەرتۋسىز باستالىپ كەتۋ مۇمكىندىگىن ايتقان. «وسىعان بايلانىستى, ارميا جاۋىنگەرلىك دايىندىق ساپىنا بارىنشا جىلدام كوشۋى ءتيىس», – دەدى ول.
كيم چەن ىن بۇل ساپاردى ءوز اكەسى كيم چەن ءيردىڭ كورەي حالىق ارمياسىنىڭ قولباسشىسى اتانۋىنىڭ كەزەكتى جىلدىعىنا وراي باستادى. بۇل وقيعا 1991 جىلعى 24 جەلتوقساندا بولعان ەدى. ەلدىڭ باسشىسىن الىپ جۇرگەندەردىڭ قاتارىندا كحدر ارمياسى ساياسي بيۋروسىنىڭ باسشىسى چحۆە پەن حە دە بولدى. اگەنتتىكتىڭ بايانداۋىنشا, كيم چەن ىن ءوز جەزدەسى چان سون تحەكتى اتتىرىپ جىبەرگەننەن كەيىن, ەلدەگى ەكىنشى تۇلعا ءرولى قازىر تاپ وسى چحۆە پەن حەگە بەرىلگەن سياقتى.
ەلدەگى ەكىنشى ادام سانالىپ كەلگەن چان سون تحەكتىڭ ولتىرىلگەنى 13 جەلتوقسان كۇنى بەلگىلى بولدى. وعان «قيالعا بەرىلىپ, قىلمىستىق ىستەرگە ۇرىندى» دەگەن ايىپ تاعىلدى.
وسىلايشا كۇتپەگەن جەردەن سوعىستىڭ تۇتانىپ كەتۋى تۋرالى دابىل كحدر ارمياسىن قازىر تابانىنان تىك تۇرعىزىپ جاتىر. سونىمەن بىرگە, بيىلعى 20 جەلتوقسان كۇنى سولتۇستىكتىڭ وڭتۇستىككە كەز كەلگەن ۋاقىتتا, الدىن الا ەسكەرتۋ جاساماستان, «اياۋسىز سوققى» بەرىپ قالۋى مۇمكىن ەكەنى جازىلعان فاكس جونەلتكەنى بەلگىلى بولىپ وتىر.
ايدار ورىسباەۆ.
دەرەككوز: Lenta.ru
فوتو: Itar-tass.com
