رۋحانيات • 15 اقپان، 2021

سۋرەتكەردىڭ كوركەمدىك الەمى

قازاقستان رەسپۋبليكاسىنىڭ تۇڭعىش پرەزيدەنت – ەلباسىنىڭ جاڭا مۋزەيىندە ەلىمىزگە ەڭبەك سىڭىرگەن قايراتكەر، بەلگىلى سۋرەتشى كاميل مۋللاشەۆتىڭ شىعارمالار كاتالوگىنىڭ تۇساۋكەسەرى جانە جەكە كورمەسىنىڭ اشىلۋ سالتاناتى ءوتتى. ونەرسۇيەر قاۋىمعا دەكوراتيۆتىك مانەرى ايرىقشا «سۇيىمبيكە»، «عابدوللا توقاي»، «بوزوق ارۋى» سىندى ايتۋلى تۋىندىلاردى تارتۋ ەتكەن سۋرەتشىنىڭ 30-عا تارتا جۇمىسى كوپشىلىك نازارىنا ۇسىنىلدى.

ايا ءومىرتاي

كورمەنى اشقان ەلباسى كىتاپحاناسىنىڭ ديرەكتورى باقىتجان تەمىربولات قىلقالام شەبەرىنىڭ ايشىقتى قولتاڭباسى تۋراسىندا ايتا كەلىپ، قازاق بەينەلەۋ ونەرى تاريحىنداعى ورنىن ەرەكشە اتاپ ءوتتى. مادەنيەت جانە سپورت ءمينيسترى اقتوتى رايىمقۇلوۆانىڭ قۇتتىقتاۋ حاتىن وقىپ بەرگەن ۆيتسە-مينيستر نۇرقيسا داۋەشوۆ سۋرەتشىنىڭ ەل مادەنيەتىنە، سونىڭ ىشىندە كوركەمسۋرەت ونەرىنە قالتقىسىز قىزمەت ەتكەنى ءۇشىن العىسىن ءبىلدىردى.

كورمەگە اۋستريا، بەلارۋس، نيدەرلاند، گەرمانيا، رەسەي، جاپونيا، ءۇندىستان، چەحيا، قىرعىزستان، كۋۆەيت، سولتۇستىك ماكەدونيا، تاتارستان ەلشىلەرى مەن باسقا دا ديپلوماتيالىق كورپۋستىڭ وكىلدەرى، گالەرەيالار، مۋزەيلەر مەن مادەني ورتالىقتاردىڭ باسشىلارى، كورنەكتى سۋرەتشىلەر، ونەرتانۋشىلار جانە ونەر قايراتكەرلەرى قاتىستى.

«كاميل مۋللاشەۆ – ەرەكشە كوزقاراسى بار ادام، ناعىز كەسكىندەمە شەبەرى. ول سۋرەتتى وتە نازىك سالادى، سونىمەن بىرگە انىق ءارى شىنايى. بارلىق شىعارمالارىندا ونىڭ جان-دۇنيەسى سەزىلىپ تۇرادى. مەنىڭ ويىمشا، بۇل شەبەردىڭ كارتينالارىن كورگەندەردىڭ ءبارى اۆتور شىعارماشىلىعىنان ءلاززات الىپ، تالانتىنا ءتانتى بولادى»، دەپ اتاپ ءوتتى نيدەرلاند كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى اندرە كارستەنس.

كەش سوڭى اۆتوگراف-سەسسيامەن جالعاسىپ، اۆتور بۇگىنگى جاستارعا جانر، ستيل تۇرعىسىنان ۇلتتىق ونەردىڭ ەندىگى بەتالىسى جايىندا اڭگىمەلەپ بەردى. ك.مۋللاشەۆتىڭ كاتالوگى قازاقستان رەسپۋبليكاسى مادەنيەت جانە سپورت مينيسترلىگى مەن «استانا» حالىقارالىق ۋنيۆەرسيتەتىنىڭ قولداۋىمەن باسىلىمعا شىققان. كورمە اقپان ايىنىڭ سوڭىنا دەيىن جالعاسادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز