اۆتواۋەسقويلارعا وزدەرىمەن بىرگە جۇرگىزۋشى مەن كولىك قۇرالىن تىركەۋ كۋالىكتەرىن الىپ جۇرمەۋگە بولادى. وسى قۇجاتتاردىڭ جوقتىعى ءۇشىن ازاماتتار اكىمشىلىك جاۋاپكەرشىلىككە تارتىلمايدى. جۇرگىزۋشىلەر وزىمەن بىرگە جەكە باسىن كۋالاندىراتىن قۇجاتتىڭ تۇپنۇسقاسىن الىپ ءجۇرۋى ءتيىس.
ىشكى ىستەر ءمينيسترى ەرلان تۇرعىمباەۆ اتاپ وتكەندەي, جۇرگىزۋشىلەردىڭ وزىمەن بىرگە بۇل قۇجاتتاردى الىپ ءجۇرۋ جانە جۇرگىزۋشى قۇجاتتارىن كورسەتۋ مىندەتىن الىپ تاستاۋ – بۇل زاماناۋي تەحنولوگيالىق «سەرۆيستىك» پوليتسيانى دامىتۋعا باعىتتالعان تاعى ءبىر قادام.
قۇقىق قورعاۋ ورگاندارىنىڭ قىزمەتكەرلەرى ءاۆتوموبيلدىڭ تيەسىلىگىن اقپاراتتىق جۇيەلەر ارقىلى تەكسەرەدى. قىزمەتتىك پلانشەتتەردە «اكىمشىلىك وندىرىستەردىڭ بىرىڭعاي ءتىزىلىمى» باعدارلاماسى ورناتىلعان, وندا جۇرگىزۋشى مەن اۆتوكولىك تۋرالى بارلىق دەرەكتەر: اۆتوكولىك قۇرالى كىمگە تيەسىلى ەكەنى, قانداي قۇقىق بۇزۋشىلىقتار تىركەلگەنى, تەحنيكالىق بايقاۋدان وتكەن-وتپەگەنى جانە ساقتاندىرۋ ءپوليسى رەسىمدەلگەنى تۋرالى دەرەكتەر بولادى. بۇگىندە پاترۋلدىك پوليتسيانىڭ ساپتىق بولىمشەلەرىندە وسىنداي 8 649 پلانشەت بار.
جەكە باستى كۋالاندىراتىن قۇجاتتارعا قازاقستان رەسپۋبليكاسى ازاماتىنىڭ پاسپورتى, جەكە كۋالىك, ازاماتتىعى جوق ادامنىڭ كۋالىگى جاتادى. ستۋدەنتتىك بيلەت, قىزمەتتىك كۋالىك بۇل تىزىمگە كىرمەيدى.
بۇدان باسقا, قابىلدانعان تۇزەتۋلەردىڭ شەتەلدىك نومىرلەرى بار اۆتوماشينالارعا, سونداي-اق قازاقستاننان تىس جەرلەردە جۇرگىزۋ قۇقىعىنا كۋالىك العان جۇرگىزۋشىلەرگە قاتىسى جوق. ولار جۇرگىزۋ كەزىندە جۇرگىزۋشى كۋالىگىن جانە كولىك قۇرالىن تىركەۋ كۋالىگىن كورسەتۋگە مىندەتتى.
ءىىم باسشىسى ەرلان تۇرعىمباەۆ: «مەملەكەت كولىكتى باسقارۋدى ايتارلىقتاي جەڭىلدەتتى, بىراق جۇرگىزۋشىلەر جول قوزعالىسىنىڭ باسقا قاتىسۋشىلارىنىڭ قاۋىپسىزدىگى ءۇشىن ءوز جاۋاپكەرشىلىگىن ەستە ساقتاعانى ابزال», دەپ اتاپ ءوتتى.
