ايماقتار • 13 اقپان، 2021

«سىر جۇرتى» تانىمدىق-پاسسيونارلىق جوباسى جۇزەگە اسىرىلادى

51 رەت كورسەتىلدى

تاۋەلسىزدىكتىڭ 30 جىلدىعى مەرەكەسىنە وراي وبلىستىق باسقارمالار مەن سالالىق مەكەمەلەر «رۋحاني جاڭعىرۋ» باعدارلاماسى جانە «تاۋەلسىزدىك بارىنەن قىمبات» ماقالاسى نەگىزىندە «سىر جۇرتى» تانىمدىق-پاسسيونارلىق جوباسىن ازىرلەدى، دەپ حابارلايدى Egemen.kz

جوبا «سىر ساڭلاقتارى»، «تۋعان جەر – تۇنعان شەجىرە»، «تال بەسىكتەن – جەر بەسىككە دەيىن»، «سىر ەلى – جىر ەلى»، «سىر ءوڭىرى – ۇلتتىق قۇندىلىقتاردىڭ تەمىرقازىعى» سەكىلدى 5 باعىتتان تۇرادى. مۇنداعى باستى ماقسات ءوڭىردىڭ تاريحي-ساياسي جانە مادەني-رۋحاني دارالىعىن ايشىقتاپ، وسكەلەڭ ۇرپاققا تاۋەلسىزدىكتىڭ قۇندىلىعىن ۇعىندىرۋ. جوبا الداعى 3 جىلعا جوسپارلانعان.

«جوباعا ەنگىزىلگەن بەس باعىتتىڭ وزىندىك ەرەكشەلىكتەرى بار. ءبىز تۇركى جۇرتىنا ورتاق تۇلعا قورقىت اتادان باستاپ، سىردا ءومىر سۇرگەن تاريحي تۇلعالار تۋرالى تەلەحابارلار دايىنداپ، عىلىمي ىزدەنىس جۇمىستارىن جۇرگىزىپ، تاريحي ورىندارعا ەكسكۋرسسيالار ۇيىمداستىرماقپىز. سالت-داستۇرلەر مەن ادەپ-عۇرىپتاردى، تاربيە داعدىلارىن، ءداستۇرلى وتباسى قۇندىلىقتارىن، سالاۋاتتى ءومىر سالتىن ناسيحاتتايمىز. جاستار اراسىندا جىرشى-جىراۋلىق، اقىندىق، كۇيشىلىك جانە ورىنداۋشىلىق ونەردى ناسيحاتتاۋعا قولداۋ بىلدىرەمىز. مادەنيەتتانۋشىلار، تاريحشىلار، فيلوسوفتار مەن الەۋمەتتانۋشى مامانداردىڭ قاتىسۋىمەن لەكتوريلەر، زيالى قاۋىم وكىلدەرىمەن كەزدەسۋلەر، سۇحباتتار ۇيىمداستىرۋ سەكىلدى ءتۇرلى فورماتتى شارالار وتەدى»، دەدى وبلىس اكىمىنىڭ ورىنباسارى سەرىك احمەت.
جوبانىڭ ءبىرىنشى كەزەڭى باستالاتىن 2021 جىلى ءتۇرلى فورماتتا 113 شارا ۇيىمداستىرۋ جوسپارلانعان.

سوڭعى جاڭالىقتار

ۇقساس جاڭالىقتار