قارجى • 12 اقپان، 2021

«AsiaCredit Bank» اق-نىڭ ليتسەنزياسىنان ايىرىلۋى بانك سەكتورىنا قالاي اسەر ەتەدى؟

30 رەت كورسەتىلدى

12 اقپان كۇنى قارجى نارىعىن رەتتەۋ جانە دامىتۋ اگەنتتىگى «AsiaCredit Bank» اق-نى ليتسەنزياسىنان ايىرۋ تۋرالى شەشىمىن جاريا ەتتى. بانك پرۋدەنتسيالىق نورماتيۆتەردى جانە ليميتتەردى جۇيەلى تۇردە بۇزعان. اگەنتتىكتىڭ بىرنەشە مارتە ەسكەرتۋى جانە تالاپ ەتۋىنە قاراماستان بانك كليەنتتەر الدىنداعى مىندەتتەمەسىن ورىنداماعان.

ليتسەنزيادان ايىرعان كۇنگى جاعداي بويىنشا بانك اكتيۆتەرىنىڭ مولشەرى 45،4 ملرد تەڭگە، قارىز پورتفەلى 45،0 ملرد تەڭگە بولسا، 90 كۇننەن استام ۋاقىت بويى تولەنبەگەن نەسيە كولەمى 31،6 ملرد تەڭگەگە جەتكەن. ياعني، بۇل نەسيە پورتفەلىنىڭ 70 پايىزى. 

تەلەگرامداعى Risk Takers كانالى بانك قىزمەتىنىڭ توقتاۋىنا سەبەپ بولعان باستى سەبەپتى اتايدى.   

– «ازياكرەديتبانكتىڭ» بانكروتتىققا بارا جاتقانى 2018 جىلدىڭ قازانىندا-اق تۇسىنىكتى بولعان. 2019 جىلدىڭ تامىز ايىندا بۇل بانك «قوقىس» اكتيۆتەردى جيناپ، قارجىلىق قاداعالاۋشىنىڭ ەسكەرتۋىن الدى. تاۋەكەل-مەنەدجمەنتىنىڭ ءالسىز جۇيەسى جانە بانك مودەلى 2014-2018 جىلدار ارالىعىندا قارىز پورتفەلىنىڭ اگرەسسيۆتى وسىمىنە اكەلىپ، بىرنەشە جىلدان سوڭ ونىڭ (بانكتىڭ) تولىقتاي جويىلۋىنا اسەر ەتتى، – دەيدى كانال اۆتورى تيمۋر ابىلقاسىموۆ. 

ساراپشىنىڭ ايتۋىنشا، ۇلتتىق بانك ەكىنشى دەڭگەيلى بانكتەردىڭ نە ىستەپ، نە قويىپ جاتقانىن قاداعالاپ، باقىلاپ وتىرۋى كەرەك ەدى. الايدا ول ءوز مىندەتىن ورىنداي المادى. ناتيجەسىندە بانك قايتارىلماعان نەسيەلەر بەرۋمەن اينالىسىپ، بۇل ونىڭ جابىلۋىنا اكەلىپ سوقتى دەدى. اۆتوردىڭ سوزىنشە، وسىعان دەيىن «ازياكرەديتبانكتى» مەملەكەتتىك ۇيىمداردىڭ قارجىسى، ونىڭ ىشىندە بجزق-نىڭ دا قارجىسى بولعانى ءۇشىن ليتسەنزياسىنان ايىرا الماي كەلگەن. 

– بانك اكتسيونەرىندە جانە قاداعالاۋشىدا كۆازيمەملەكەتتىك كومپانيالار الدىنداعى قارىزىن وتەۋ بويىنشا كەلىسىم بار بولۋى مۇمكىن. ال دەپوزيتتەردى كەپىلدەندىرۋ قورى ازاماتتار الدىنداعى مىندەتتەمەلەردى جابۋعا ءماجبۇر بولادى. ءبىزدىڭ اقپاراتىمىز بويىنشا، «ازياكرەديتبانك» بىرتىندەپ كەلىسىمدى ورىنداپ، بىرقاتار مەملەكەتتىك ۇيىمدارعا قارجىسىن قايتارادى. اكتسيونەرلەردىڭ بۇل نيەتىن راستايتىن بىردەن ءبىر جاعداي – بجزق الدىنداعى مىندەتتەردى ءىشىنارا وتەۋى. ءبىزدىڭ بولجامىمىز راستالدى. قارجى نارىعىن رەتتەۋ جانە دامىتۋ اگەنتتىنىڭ اقپاراتىنشا، بانك بجزق الدىنداعى قارىزدى وتەگەن. ال ۇزاق ۋاقىت بويى ءوز اقشاسىن الا الماي كەلگەن جەكە تۇلعالار قارجىسىن دەپوزيتتەردى كەپىلدەندىرۋ قورىنان الادى. ەندى تەك تاعدىرى شەشىلمەگەن Capital Bank قالدى. الايدا ونداعى جاعداي الدەقايدا وڭاي. ول جەردە جەكە تۇلعالاردىڭ قارجىسى جوق. تەك اكتسيونەر قايتارىپ بەرۋى ءتيىس كۆازيمەملەكەتتىك كومپانيالار قارجىسى قالعان. سولاردىڭ الدىنداعى قارىزىن قايتارعان سوڭ، Capital Bank تە ليتسەنزياسىنان ايىرىلادى، – دەپ جازادى كانال اۆتورى. 

ساراپشىلاردىڭ ايتۋىنشا، بانكتىڭ جويىلۋى بانك سەكتورى تۇراقتىلىعىنا كەرى اسەرىن تيگىزبەيدى. «ازياكرەديتبانكتىڭ» ۇلەسى دە كوپ ەمەس – 91،6 ملرد دوللار نەمەسە 0،29 پايىز ەكەن.

«ليتسەنزيادان ايىرىلۋى قارجى سەكتورىنا اسەر ەتپەيدى دەپ ايتۋعا كەلمەس. الايدا دەفولتتىڭ بولۋى بىرنەشە جىل بۇرىن بايقالعاندىقتان، رەيتينگ اگەنتتىكتەرى مۇنى ءوز ەسەبىنە كىرگىزىپ ۇلگەردى» دەيدى ەكسپەرت.   

S&P Global Ratings باعالاۋى بويىنشا بانكتەردىڭ ءجيى دەفولتقا ۇشىراۋى جانە ولاردىڭ ليتسەنزياسىنان ايىرىلۋى قازاقستاندىق بانك سەكتورىن 10 تاۋەكەل دەڭگەيىنىڭ (ەڭ جوعارى تاۋەكەل دەڭگەيى) 9-ساناتىنا اۋىستىردى. الدەقايدا تومەن تاۋەكەل كاتەگورياسىنا ورالۋ ءۇشىن بىزگە 5 جىل بويى بانك دەفولتىنا جول بەرمەي جانە ولاردىڭ كاپيتاليزاتسياسىن ارتتىرۋ قاجەت ەكەن. 

Tengenomika كانالى دا بۇل بانكتىڭ ليتسەنزيادان ايىرىلۋىن تاڭدانارلىق جاعداي ەمەس دەپ باعالايدى. 

– 2020 جىلى بانك 71 ەرەجە بۇزۋشىلىق جاساعان. بۇل 2018 جانە 2019 جىلدارمەن سالىستىرعاندا 1،5 ەسە كوپ. 2018 جىلى Standard & Poor's رەيتينگ اگەنتتىگى بانكتىڭ ۇزاق مەرزىمدى جانە قىسقا مەرزىمدى نەسيە رەيتينگىن «B- / B»-دان «CCC+ / C»-عا ءتۇسىرىپ تاستاعان. 2019 جىلدىڭ قورىتىندىسى بويىنشا بانك 5،2 ملرد تەڭگە شىعىنعا باتتى جانە تەرىس قارجى اعىنى 9 ملرد تەڭگەنى قۇرادى. 2020 جىلدىڭ ەكىنشى جارتىسىندا باق-تا بانك كليەنتتەرى دەپوزيتتەن ءوز قارجىلارىن شەشە الماي جاتقانى تۋرالى اقپارات تارادى، – دەپ جازادى كانال. 

بانك دەپوزيتىندە قارجىسى بار جەكە تۇلعالار ءوز اقشاسىن قازاقستاننىڭ دەپوزيتكە كەپىلدىك بەرۋ قورىنان الا الادى. قور وسىعان دەيىن تاراتىلعان «استانا بانك»، «Qazaq Banki»، «ۆاليۋت-ترانزيت بانك» سالىمشىلارىنىڭ دەپوزيتتەگى قارجىسىن تولەپ بەردى. كۇنى بۇگىنگە دەيىن ورىندالعان مىندەتتەمەلەر كولەمى 77 ملرد تەڭگەگە جەتكەن. 

«قور وتەم تولەۋدى باستاۋ كۇنىن زاڭنامادا بەكىتىلگەن مەرزىمدە حابارلايدى. تولەمدەردى جۇزەگە اسىرۋ شاراسى رەسمي حابارلاما قور سايتىندا جانە بۇقارالىق اقپارات قۇرالدارىندا جاريالانعان كۇننەن باستاپ، 5 جۇمىس كۇنى ىشىندە باستالادى» دەلىنگەن حابارلامادا.

قازىر بانكتە 23 174 جەكە تۇلعانىڭ دەپوزيتى بار. وندا 19 ملرد تەڭگە جينالعان. 2019 جىلدىڭ شىلدە ايىنان بەرى بانك بيزنەسمەن وريفدجون شوديەۆتىڭ يەلىگىندە بولعان. وعان Capital Bank-تە تيەسىلى. ەكى قارجى ينستيتۋتى بىرنەشە رەت بىرىگەتىنىن جاريالادى، بىراق باستاما سول كۇيى جۇزەگە اسقان جوق.

سوڭعى جاڭالىقتار

الماتى قالاسى «سارى» ايماقتا

كوروناۆيرۋس • بۇگىن، 10:28

ارقالىقتا مىڭ ادام كۇي تارتتى

ايماقتار • بۇگىن، 08:45

كوشباسشى وزگەرگەن جوق

سپورت • بۇگىن، 08:44

قالا كۇنىندەگى بايگە جارىسى

سپورت • بۇگىن، 08:42

يسپانيادا ولجالى بولدى

تەننيس • بۇگىن، 08:40

ورگانيكالىق قالدىقتاردى وڭدەيدى

قازاقستان • بۇگىن، 08:38

جاسىل مەتاللۋرگيا قازىر دە بار

قازاقستان • بۇگىن، 08:37

ۇقساس جاڭالىقتار