2021 جىلعى 1 اقپانداعى جاعداي بويىنشا زەينەتكەرلەر سانى 2 ملن 243 مىڭ ادامدى قۇرايدى.
2021 جىلعى 1 اقپانداعى جاعداي بويىنشا زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن ەسكەرە وتىرىپ) – 100 075 تەڭگە.
ەسكە سالايىق, 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى ءار الۋشىعا زەينەتاقى جۇيەسىنە قاتىسۋ ءوتىلىن ەسكەرە وتىرىپ جەكە تاعايىندالادى.
بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى, سونداي-اق مىندەتتى زەينەتاقى جارنالارى تولەنگەن كەزەڭدەر (بۇدان ءارى - مزج) زەينەتاقى جۇيەسىنە قاتىسۋ وتىلگە قوسىلادى.
ەگەر زەينەتاقى جۇيەسىنە قاتىسۋ ءوتىلى 10 جىل نەمەسە ودان از بولسا, سونداي-اق ەگەر مۇلدە جوق بولسا, بازالىق زەينەتاقى ەڭ تومەنگى كۇنكورىس دەڭگەيىنىڭ 54%-ىن قۇرايدى, سودان كەيىن 10 جىلدان اسقان ءار جىل ءۇشىن ونىڭ مولشەرى 2%-عا ارتادى. مىسالى, ەگەر قاتىسۋ ءوتىلى 20 جىل بولسا, بازالىق زەينەتاقى ەڭ تومەن كۇنكورىس دەڭگەيىنىڭ 74%-ىن, 30 جىل – ەڭ تومەن كۇنكورىس دەڭگەيىنىڭ 94%-ىن قۇرايدى. جۇمىس ءوتىلى 33 جانە ودان دا كوپ جىل بولسا, ەڭ تومەن كۇنكورىس دەڭگەيىنىڭ 100%-ى مولشەرىندە بەلگىلەنەدى.
ەگەر ءبىر اي ىشىندە بىرىڭعاي جيناقتاۋشى زەينەتاقى قورىنا بىرنەشە رەت مزج جاسالسا, جيناقتاۋشى جۇيەگە قاتىسۋ مەرزىمى ءبىر ايدى قۇرايدى.
وسىلايشا, مىندەتتى زەينەتاقى جارنالارى نەعۇرلىم تۇراقتى جانە تولىق سالىناتىن بولسا, زەينەتاقى جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.
ءوز كەزەگىندە جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدە الىنعان ورتاشا ايلىق تابىسقا بايلانىستى بولىپ كەلەدى.
