شاۋىلدىردە شىر ەتىپ دۇنيە ەسىگىن اشقان ءشامشىنىڭ ءومىر جولى, شىعارماشىلىعى سۋرەتتەلگەن قويىلىمدى ساحناعا وبلىستىڭ جاستار تەاترى الىپ شىقتى. سازگەردىڭ ءومىرى مەن ونەرىن جىمداستىرا وتىرىپ جازىلعان درامادا ونىڭ اندەرىنىڭ شىعۋ تاريحى كورەرمەنگە ادەمى جەتكىزىلگەن.
سپەكتاكل جەلىسى بويىنشا, ءنازيپا ەسىمدى قىزعا عاشىق بوزبالا اكە-شەشەسىنىڭ قالاۋىمەن مال دارىگەرىنىڭ وقۋىنا اتتانادى. وقۋعا كەتكەن ول اسكەر قاتارىنان بىراق شىعىپ, ەلىنە ورالادى. انگە اۋەس جىگىت اسكەردە ءجۇرىپ, داۋىسىن جوعالتىپ الىپتى. ال اۋىلدا قالعان ءنازيپاسى ومىردەن وزىپتى. ءشامشىنىڭ ۆەتەرينارلىق وقۋىنا قارسى بولىپ, انمەن اينالىس دەگەن دە سول قىز ەدى. قارالى حاباردى ەستىگەن بويدا جاس جىگىت ءومىرىن انگە ارناماق نيەتتە تاشكەنتكە وقۋعا بارادى. كەيىن سول جاقتان جامال وماروۆانىڭ كومەگىمەن الماتىعا ورالعان. ونەر ورداسىندا جاس كومپوزيتور شىعارماشىلىققا ءبىرجولا دەن قويىپ, نازيپاعا ارناعان (كەيبىر دەرەكتەردە تاريحى بۇرمالانعان دەسەدى) «قايىقتا» ءانىن جازادى. اۋەزدى انگە اقىن ىزدەپ, نۇرسۇلتان الىمقۇلوۆتىڭ ەسىگىن قاققانى دا سپەكتاكلدە كورسەتىلەدى. اندەرى قازاقتىڭ اسپانىندا اۋەلەگەن سايىن شامشىدەن باقىتتى ادام جوق ەدى.
قويىلىمنىڭ تاربيەلىك ءمانى دە زور. جالىندى جاستىقتىڭ بۋىمەن شىعارماشىلىقتىڭ ورتاسىندا جۇرگەن ءشامشى جاقىندارىن ءبىر ءسات ەستەن شىعارىپ الىپ, اناسىنا توپىراق سالا الماي قالعانى دا كورىنىس تاپقان. جالپى سپەكتاكل كورەرمەندى كۇلدىردى, جىلاتتى, قۋانتتى. پاتريوتتىق سەزىمىن دە جانىدى. 1959 جىلعى كەڭەس وكىمەتىنىڭ سولاقاي ساياساتىنا نارازىلىق رەتىندە ءشامشى ەلدىڭ رۋحىن كوتەرەتىندەي مارش جازۋىم كەرەك دەپ «مەنىڭ قازاقستانىمدى» دۇنيەگە كەلتىردى. سول ءۇشىن وقۋدان دا شىعىپ قالعان...
– مىناۋ كارانتيننىڭ كەسىرىنەن مۇنداي مادەني شارالاردان كوپ ۋاقىت قول ءۇزىپ الدىق. بۇگىن مىنە, ءۆالستىڭ كورولى ءشامشى قالداياقوۆتىڭ 90 جىلدىعىنا وراي ساحنا شىمىلدىعى ءتۇرىلىپ, ء«ومىر-وزەن» قويىلىمىن كوردىك. العان اسەرىمدى سوزبەن جەتكىزە المايمىن. جاستار دا شىنايى ورىندادى. تالاپتارىنا نۇر جاۋسىن! – دەيدى كورەرمەن ەسەنبول ناقتىباي.
ءيا, جاستاردىڭ رولدەردى ويناۋى, ىرعاقتى بيلەرى, ءشامشىنىڭ اندەرىن ورىنداۋى وتە اسەرلى بولدى. ساحنا دەكوراتسياسى دا سول زاماننىڭ رۋحىن سەزىندىردى. قويىلىم سوڭىندا جينالعان حالىق ۇزاق قول سوعىپ, ونەرلى ورەندەرگە قوشەمەت كورسەتتى.
وسكەمەن
