تۇركىستان وبلىسىنىڭ بارلىق اۋداندىق اۋرۋحانالارى مەن ەمحانالارىندا ونكولوگيالىق اۋرۋلارمەن كۇرەس كۇنىنە وراي قاتەرلى ىسىكتىڭ الدىن الۋ ماقساتىندا «اشىق ەسىك كۇنى» ءوتتى. مىسالى, وبلىستىق كلينيكالىق اۋرۋحانانىڭ قۇرامىنداعى №5 ونكولوگيالىق ەمحانادا وتكەن شارادا وبلىس جانە قالا تۇرعىندارى ونكولوگ, ماممولوگ, ونكوگينەكولوگ ماماندارىنان كەڭەس الىپ, تەگىن تەكسەرۋلەردەن ءوتتى. سونداي-اق وبلىستىق كلينيكالىق اۋرۋحاناسىنىڭ ونكولوگيالىق قىزمەت جونىندەگى جاۋاپتى دارىگەرى م.تولەگەنوۆ باستاعان ونكوحيرۋرگيا جانە حيميوتەراپيا بولىمشەلەرىنىڭ قىزمەتكەرلەرى اتالعان دياگنوز بويىنشا ەمدەلىپ جاتقان پاتسيەنتتەردى قولداۋ ءىس-شاراسىن وتكىزدى. ال تولەبي اۋداندىق اۋرۋحاناسىندا وتكەن شارادا بىلىكتى دارىگەرلەردىڭ تەكسەرۋىنەن 57 تۇرعىن وتكەن. جالپى, انىقتالعان پاتولوگيالار سانى 45 بولسا, 8 تۇرعىن قاتەرلى ىسىككە كۇدىكتەلدى. جەرگىلىكتى دارىگەرلەر قاتەرلى ىسىكتى ەرتە انىقتاپ, الدىن الۋ ماقساتىندا تۇرعىندارعا دەر كەزىندە تەكسەرۋدەن ءوتىپ, ءوز دەنساۋلىقتارىنا جاۋاپتىلىقپەن قاراۋعا كەڭەس بەردى. «2018-2022 جىلدارى قاتەرلى ىسىك اۋرۋلارىمەن كۇرەسۋدەگى كەشەندى جوسپاردىڭ» ناتيجەسىندە ونكولوگيالىق اۋرۋعا كۇدىگى بار ناۋقاستار كومپيۋتەرلىك توموگرافيا مەن ماگنيتتىك-رەزونانستىق توموگرافيادان تەگىن وتۋگە مۇمكىندىك الدى. سونىمەن قاتار ىسىكتى تەرەڭ مولەكۋليارلىق-گەنەتيكالىق تەكسەرىستەن وتكىزۋ, شەتەلدىك ماماندارمەن «تەلەپاتولوگيا» كومەگىمەن كەڭەس الۋعا مۇمكىندىك جاسالدى. بۇل وتاندىق ونكولوگتەرگە دەرتپەن كۇرەسۋدە ۇلكەن كومەك. كەشەندى جوسپار اۋرۋدىڭ سوڭعى ساتىسىنداعى ناۋقاستاردى دا قامتىعان, وندا پاللياتيۆتىك كومەك كورسەتۋ ءۇشىن ءموبيلدى توپتار قۇرىپ, ولاردىڭ مىندەتتەرى كورسەتىلگەن.
– تۇركىستان وبلىسى قوعامدىق دەنساۋلىق ساقتاۋ باسقارماسىنىڭ بۇيرىعىمەن اۋداندىق اۋرۋحانالاردا 20 ءموبيلدى توپ قۇرىلىپ, ناۋقاستارعا ءۇي جاعدايىندا جان-جاقتى كومەك كورسەتۋدە. كەشەندى جوسپار ارقىلى وبلىسىمىز ونكولوگيالىق اۋرۋلار بويىنشا رەسپۋبليكادا سوڭعى 17-ورىندا, ال قاتەرلى ىسىكتەن ءولىم-ءجىتىم بويىنشا 16-ورىندا تۇر. ءبىزدىڭ باستى ماقساتىمىز – اۋرۋدىڭ الدىن الۋ نەمەسە دەر كەزىندە انىقتاۋ. بىلتىر تۇركىستان وبلىسى بويىنشا ءسۇت بەزى قاتەرلى ىسىگىنەن 72 210 ايەل, جاتىر موينى ىسىگىنەن 67 453 ايەل, ال تىك ىشەك قاتەرلى ىسىگىنەن 82 533 ادام سكرينينگتەن ءوتتى. سكرينينگپەن قامتۋ – 100%. بىراق بۇل العاشقى مەديتسينالىق سانيتارلىق كومەك كورسەتەتىن مەكەمەلەردىڭ وراسان زور ەڭبەگى ارقىلى جۇزەگە استى. ءاربىر ەمحانادا ايەلدەردى جانە ەرلەردى قاراۋ بولمەلەرى ۇيىمداستىرىلعان, ياعني بيىل ەمحاناعا ءبىرىنشى رەت كەلگەن ءاربىر ادام, وسى دارىگەرگە دەيىنگى بولمەلەردەن تەكسەرۋدەن وتۋگە مىندەتتى. بۇل پروفيلاكتيكالىق تەكسەرۋ كوزگە كورىنەتىن قاتەرلى ىسىكتەردى ۋاقتىلى انىقتاۋعا مۇمكىندىك بەرەدى, – دەيدى تۇركىستان وبلىسىنىڭ شتاتتان تىس باس ونكولوگى قارلىعاش وماروۆا.
ءوڭىردىڭ بارلىق ەمدەۋ مەكەمەلەرىندە وتكەن اكتسيانىڭ ناتيجەسىندە 360 ادامعا ونكولوگ, ماممولوگ, گينەكولوگتىڭ كەڭەسى بەرىلگەن. سونداي-اق 152 ادامعا ۋدز جاسالسا, 25 ادامعا اسقازانعا ەندوسكوپيالىق تەكسەرۋ جۇرگىزىلىپ, 47 ايەلدىڭ جاتىر موينىنان جاعىندى الىندى. تەكسەرىلۋ جۇمىستارىنىڭ قورىتىندىسى بويىنشا 30 ايەلدەن جاتىر موينى قاتەرلى ىسىگى انىقتالسا, وكىنىشكە قاراي 92 ايەلدەن ءسۇت بەزىنىڭ قاتەرلى ىسىگى ناقتىلانىپ وتىر. سالاعا جاۋاپتى مامانداردىڭ دەرەگىنشە, وبلىستىڭ ونكولوگيالىق ديسپانسەرلەرىندە 8 436 ناۋقاس تىركەۋدە تۇر. پاتسيەنتتەردىڭ 5 جىلدىق ءومىر ءسۇرۋ ۇزاقتىعى – 53,2 پايىزدى قۇرايدى. وبلىس سكرينينگتىك قامتۋ جۇمىستارى بويىنشا رەسپۋبليكانىڭ ۇزدىك بەس ءوڭىرىنىڭ قاتارىندا. وتكەن جىلى 11 اۋداندىق اۋرۋحانا مەن ەمحانانىڭ مامموگرافيالىق پاركى جاڭارعان. بۇل قاۋىپتى دەرتتىڭ الدىن الۋعا ۇلكەن سەپتىگىن تيگىزۋدە.
تۇركىستان وبلىسى
